Frenk Rajkard është rikthyer nga pushimet me shumë dëshirë për të punuar dhe gjatë "relaksit" ndoqi me vëmendje botërorin e zhvilluar në Gjermani. Trajneri i Barcelonës tha: "S'ka qenë një turne i madh." Të hënën e ardhshme fillon sezoni i ri dhe holandezi është i entuziazmuar si të ishte dita e parë e punës. Gjatë javëve të fundit, trajneri katalanas ka vëzhguar futbollistët e tij përmes televizorit, por duke filluar nga java e ardhshme do t'i ketë të gjithë në rresht për një. Ja cila ka qenë analiza që trajneri kampion Europe i ka bërë Kupës së Botës 2006...
Munguan ndeshjet e mëdha. Sipas këndvështrimit të Frenk Rajkardit, Kupa e Botës duhet të jepte më shumë. "Në aspektin e futbollit nuk ishte një turne i madh, me ndeshje të mëdha. Gjithsesi, ishte interesant deri në fund dhe kjo është ajo që u pëlqen tifozëve, - tha holandezi, i cili më pas shpjegoi mungesën e futbollit spektakolar. - Duhet të mendoni edhe për rëndësinë që ka një botëror i futbollit modern. Ka shumë tension dhe presion mbi futbollistët. Duhet të japin gjithmonë maksimumin, por ndonjëherë nuk arrijnë të bëjnë asgjë nga ato që kanë në mundësitë e tyre."
Italia e meritoi. Rajkardi ka kaluar pjesën më të madhe të karrierës së tij si futbollist me fanellën e Milanit në Itali. Për suksesin e "axurrëve" të Lipit, ai pohon: "Kur një vend i tërë e meriton, jam i lumtur për rezultatin përfundimtar të Kupës së Botës. Nuk ka të bëjë aspak e kaluara ime në Itali, gëzohem teksa shoh vende të mëdha që fitojnë, duke marrë frytet e investimeve kolosale që kanë bërë. Disa mund ta konsiderojnë edhe si një surprizë, por Italia e meritoi plotësisht suksesin."
Incidenti "Zidan". Trajneri holandez foli gjithashtu për episodin e finales, kur dhjetë minuta nga fundi Zidani goditi me kokë Materacin. "Eshtë e vështirë të kuptosh arsyen e një veprimi të tillë, për të cilin edhe vetë Zidani e pranoi se nuk ishte mënyra e duhur për të mbyllur një karrierë të lavdishme si të tijën, - tha Rajkardi. - Por nga ana tjetër, "yjet" e futbollit janë qenie njerëzore dhe mund të reagojnë në mënyra nga më të ndryshmet. Sigurisht, ajo që bëri "Zizu" është e dënueshme, por kjo nuk mund të ndikojë në karrierën e tij. Ai ka qenë futbollisti më i mirë i viteve të fundit dhe dua ta kujtoj vetëm për këtë."
E ardhmja. Gjithsesi, botërori mbaroi dhe tani Rajkardit i duhet të punojë për sezonin e ri që e "detyron" Barcelonën të mbrojë titullin në Spanjë dhe në Europë. Dje trajneri holandez është takuar për rreth një orë e 30 minuta me drejtori teknik, Txiki Begeristain, për të projektuar skuadrën e së ardhmes. Për gazetarët, Rajkardi tha: "E kam thënë gjithmonë që kam një skuadër të fortë, por gjithashtu jemi duke punuar me Txikin për të parë mundësinë e marrjes së ndonjë përforcimi. Këtë sezon do ta fillojmë me filozofinë e atij të kaluarit: gjithmonë në fushë për të fituar. Do të jemi gati në derbin ndaj Espanjolit për Superkupë.

Trajneri Kike Sançez Flores pranon...
Valencia "tundohet" nga Kristiano Ronaldo
Trajneri i Valencias, Kike Sançez Flores, ka përgëzuar lëvizjet që po bëjnë drejtuesit e tij në merkato dhe është shprehur se do të ishte i lumtur nëse do të kishte në radhët e skuadrës edhe Kristiano Ronaldon. "Në rast se do të ekzistojë mundësia që Kristiano të luajë me ne në sezonin e ardhshëm, jam i sigurt se drejtuesit e klubit do të bëjnë maksimumin për ta marrë, tha trajneri spanjoll gjatë një konference për shtyp. - Unë dhe i gjithë ambienti përreth skuadrës do të lumturohej nëse do të vinte ky kampion i së ardhmes, por nuk mund të flas më shumë, pasi është një futbollist që i përket Mançesterit. Mua si trajner nuk më shqetësojnë futbollistët që janë në qendër të vëmendjes, e rëndësishme është që në fushën e lojës të tregojnë se mund të bëjnë diferencën. Kemi një skuadër të fortë dhe Kristiano Ronaldo ndoshta do të dukej si një luks i tepërt, por unë si trajner nuk mund t'i refuzoj kurrsesi shërbimet e një talenti të tillë." Trajneri i Valencias pranon se nuk është larg edhe marrëveshja me mbrojtësin e Çelsit, Asier Del Horno: "Më duket një futbollist mjaft i mirë, por është një zgjedhje që i përket drejtorit teknik Karboni. Ai ka vetëm tre muaj që është larguar nga futbolli dhe jam i bindur se është njeriu i duhur për të gjetur një mbrojtës të aftë anësor. Del Horno më pëlqen, por më pëlqen edhe Moreti që vjet bëri një sezon të mrekullueshëm." Ndërsa në fund, Floresi tha: "Dua të përgënjeshtroj spekullimet mbi Aimarin. Unë nuk e kam kërkuar asnjëherë largimin e tij, pasi Pablo s'përbën një problem për mua."
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------