E ARDHMJA NUK EKZISTON PA KRISHTIN
Të gjithë presim një të ardhme më të mirë dhe përpiqemi që t’ia arrijmë qëllimit. Presim që ky vit të jetë më i mirë se viti që shkoi, sepse jemi përpjekur shumë që të shijojmë një të ardhme sa më të mirë. Por me gjithë përpjekjet tona në luftën e përditshme për një jetë sa më të mirë, besoj të gjithë mund të dëshmojmë se parvjet ishte më mirë se vjet.
Është e vërtetë se ia arritëm qëllimit të ngremë mirqënien e jetës një shkallë më lart, por nga ana tjetër cilësia e saj është më e dobët. Fjalë të tilla si, divorce, droga, vjedhje, vrasje janë bërë të zakonshme në jetën tonë të përditshme dhe asnjeri nuk pret që vitin tjetër ato të zvogëlohen, aq më tepër që ato të zhduken. Të gjithë jetojmë me frikën e së nesërmes dhe me ndjenjën e pasigurisë, e cila duket qartë në fytyrat e njerëzve. Të gjitha këto që jetojmë përditë dhe që na sjellin zhgënjim, ne njerëzit duhet ti kemi parasysh dhe të kërkojmë mënyrën për të ndërtuar të ardhmen tonë në themel të sigurtë, që të kemi rezultatin e duhur për veten tonë dhe për fëmijët tanë.
E ardhmja jonë nuk do të bëhet e mirë me urrejtje, të këqija, mëndjemadhësi, padrejtësi, të cilat rriten vazhdimisht në zemrat e njerëzve, por me dashuri. Prandaj kemi nevojë për një ndryshim rrënjësor në jetën tonë dhe këtë ndryshim mund ta bëjë vetëm Jezus Krishti. Këshillat e njerëzve nuk mund të ndryshojnë jetën e çdo njeriu. Çdo vit ne urojmë lumturi, gëzim, dashuri, paqe dhe çdo vit vërtetohet se këto urime janë të kota. Pa Krishtin njeriu nuk mund të shijojë lumturinë, paqen, gëzimin, dashurinë.Vetëm nëse Jezus Krishti do të vijë në jetën e njeriut, atëherë ai mund të bëhet me të vërtetë i lumtur. Perëndia është dashuri, dhe çdo njeri që jeton me Perëndinë shijon dashurinë e tij. Le të kthehemi te Perëndia që të na ndryshojë jetën tonë. Fjala e Perëndisë nëpërmjet Apostullit Pal na thotë: ’’Sepse edhe ne dikur ishim të pamendë, rebelë, endacakë, robër të lakmive të ndryshme dhe të qejfeve, duke jetuar në ligësi dhe në smirë, të urryer dhe duke e urryer njëri-tjetrin. Por kur u shfaq mirësia e Perëndisë, Shpëtimtarit tonë, dhe dashuria e tij për njerëzit, Ai na shpëtoi jo me anë të veprave të drejta që ne bëmë, por sipas mëshirës së tij, me anë të larjes së rilindjes dhe të ripërtëritjes së Frymës së Shenjtë, të cilën e derdhi me mbushëlli mbi ne me anë të Jezus Krishtit, Shpëtimtarit tonë, që ne të shfajsuar me anë të hirit të tij, të bëhemi trashgimtarë të jetës së përjetshme, sipas shpresës që kemi’’. Titit 3:3-7.
Fjala e Perëndisë, Ungjilli i Jezus Krishtit i tregon njeriut mënyrën sesi të ndërtojë të ardhmen me siguri. Vetë Jezus Krishti tha: ’’Prandaj, ai që i dëgjon këto fjalë të mia dhe i vë në praktikë, mund të krahasohet prej meje me një njeri të zgjuar, që e ka ndërtuar shtëpinë e tij mbi shkëmb. Ra shiu, erdhi përmbytja, frynë erërat dhe u përplasën mbi atë shtëpi; por ajo nuk u shëmb, sepse ishte themeluar mbi shkëmb. Përkundrazi ai që i dëgjon këto fjalë dhe nuk i vë në praktikë, do të krahasohet me një njeri budalla, që e ka ndërtuar shtëpinë e tij mbi rërë. Më pas ra shiu, erdhi përmbytja, frynë erërat dhe u përplasën mbi atë shtëpi; ajo u shëmb dhe rrënimi i saj qe i madh’’. Mateu 7:24-27.
Si përfundim vetëm me Jezus Krishtin mund të urojmë një të ardhme më të mirë dhe një vit të sigurtë në jetën tonë.


Nga Kosta Kondhili