Pas një serie me artistë dhe fotomodele, “Shekulli-Kontakt” këtë radhë është në gjurmët e një gazetari të njohur amerikan me origjinë shqiptare. Ai quhet Donald Llambro dhe është shef i reporterëve politikë në gazetën e madhe “The Washinton Times”. Ai është gjithashtu anëtar drejtues i sindikatës së kolumnistëve amerikanë (editorialistë). Donaldi intervistohet shpesh për çështje të politikës amerikane dhe nga “Zëri i Amerikës” në shqip, ku theksohet origjina e tij shqiptare. Donaldi është vlerësuar shumë në rrethet e medias amerikane për opozicionin real që i ka bërë kandidaturës së Kerrit gjatë fushatës elektorale kundër Bush. Ai evidentoi një kontradiktë në thëniet e Kerrit gjatë debatit të tij të dytë televiziv përballë Bushit. Në qarqet e gazetarisë amerikane thonë se kjo kundërvënie ndikoi jo pak në nivelin e mbështetjes elektorale të sfidantit të Bush. Konkretisht, kundërvënia ishte në thëniet e Kerrit lidhur me luftën në Irak. Dondald e vuri në pozicion të vështirë kandidatin për president, kur i kujtoi se gjatë debatit të dytë ai ishte shprehur: “Unë besoj që Sadam Hysein është një kërcënim”, ndërkohë që disa minuta më vonë gjatë debatit, Kerry u shpreh se “Bush preokupohet për Irakun, ndërkohë që ai nuk përbën asnjë kërcënim”. Në Tiranën e mbushur me akuza dhe kundërthënie, ndoshta Donaldi nuk do të ishte vlerësuar kaq shumë për një “vërejtje kaq të hollë”. Por ja që për fatin e tij, ai po e zhvillon karrierën në një vend shumë më të ndryshëm, ku qoftë edhe nga një paradoks mendimesh, njerëzit nxjerrin shumë mësime…

Shekulli
 




____________