Ndahet nga jeta Owen Pearson ndërsa shqiptarët e Londrës promovojnë veprën e tij të fundit. Tepër vonë për dekoratën e Presidentit të Shqipërisë.

U promovua volumi i tretë i librit “Shqipëria si Diktatorë dhe Demokraci” i autorit Owen Pearson. Autori vdiq vetëm një ditë para se të botohej libri, në fund të nëntorit. Megjithatë, personalitete të ndryshme u mblodhën në Parlamentin britanik dhe e mirëpritën publikimin. “Ai do ta çmonte faktin që ne jemi mbledhur për ta festuar dhe kujtuar jetën e tij këtu në Parlament, si dhe për ta festuar publikimin e librave të tij. Njëri prej tyre është “Shqipëria si Diktaturë dhe Demokraci”, tha John Grogan, deputet britanik. Ambasadori i Shqipërisë e çmoi shkrimtarin si mik të shqiptarëve. “Ne i propozuam presidentit të Shqipërisë që ta nderonte Owen Pearson me medalje të artë. Fatkeqësisht, ne nuk ishim në gjendje që ta nderonim personalisht, megjithatë ne do t’ia japim medaljen familjes së tij,” tha Kastriot Robo. Autori i mirënjohur, Noel Malcolm, autori i librit “Kosova: Histori e Shkurtër” tha: “Këto tri vepra kolosale shfaqin dashurinë që ai kishte ndaj punës. Ai ishte i apasionuar pas Shqipërisë”. Publikimi i këtij libri është mundësuar nga Qendra për Studime Shqiptare. Drejtori i kësaj qendre, Bejtullah Destani tha se edhe shoqata të tjera kanë investuar në publikimin e këtij libri.

“Ne kemi dhënë më shumë se 10 mijë sterlina gjatë periudhave të ndryshme dhe mundohemi të mbështesim promovimin e librave shqip dhe në gjuhën angleze, me aq mundësi sa kemi”, tha Agron Loxha, nga shoqata humanitare “Kosova Aid”. Njëri nga organizatorët kryesorë të këtij promovimi, zoti Alban Bytyci e vlerësoi autorin për kontributin që ka dhënë në shkrimin e historisë së Shqipërisë: “ Puna e të ndjerit Owen Pearson, është me të vërtetë drita e shkruar që i ka munguar historisë së shqiptarëve, dhe një shembull sesi kërkohet dhe shkruhet historia e pavarur dhe e mirëfilltë për një periudhë të një populli të pa zot”. Autori Owen Pearson ka shkruar librat: Shqipëria gjatë Okupimit dhe Luftës, Shqipëria në Shekullin 20’të, Shqipëria dhe Mbreti Zog dhe libri i tij i fundit “Shqipëria si Diktaturë dhe Demokraci”
 




____________

Lot Dielli