Bekham, shpëtimtari i futbollit në Amerikë            

--------------------------------------------------------------------------------
Anglezi synon ta bëjë këtë sport sa më popullor në SHBA, ashtu si Pele, Bekenbauer apo Krujf në të kaluarën...
13-01-2007
Bekham, shpëtimtari i futbollit në Amerikë




Kur Pele u transferua te Nju Jork Kozmos në kampionatin e Amerikës Veriore në mesin e viteve '70, u fol se futbolli kishte arritur më në fund në Shtetet e Bashkuara. Por jo. Ditën e Pavarësisë më 1988-n, kur FIFA i dha SHBA-së të drejtën për të organizuar Kampionatin Botëror 1994, besimtarët prapë menduan se tashmë futbolli kishte ardhur përfundimisht. Por prapë rezultoi e gabuar. Këtë javë, Devid Bekham, akoma në kulmin e formës fizike në moshën 31-vjeçare, nënshkroi një kontratë pesëvjeçare me vlerë 250 milionë dollarë, afërsisht 1 milion dollarë në javë, me klubin e futbollit Los Anxhelos Galaksi. Ai tha që u transferua jo për para, por për të ndihmuar klubin dhe sportin në Shtetet e Bashkuara. Dilema nëse do të ketë sukses aty ku dështuan Pele, Kupa e Botës 1994 dhe "maskota" e buzëqeshur e quajtur "Striker" (sulmues), mbart vërtet shumë dyshime. Pa dyshim, kampionati amerikan i futbollit ("Major League Soccer") do të marrë një impuls të fuqishëm për sa i takon popullaritetit, medias dhe pjesëmarrjes në stadiume që nga ardhja e pritur e Bekhamit në verë. Ivan Gazidis, zv/komisioneri i Ligës, shprehet se ardhja e Bekhamit është një gur i rëndësishëm themeli për MLS-në, drejtuesit e së cilës janë të vendosur të mos përsërisin gabimet e së kaluarës. Gazidis flet për një rritje progresive, të qëndrueshme të Ligës dhe sporti në SHBA dhe në Kanada, bashkë me ardhjen e Bekhamit, do të shtojnë objektivat e tyre. Por të thuhet që futbolli i nivelit të lartë do të zërë rrënjë të forta në sportet apo kulturën amerikane, është ndoshta një pretendim i tepërt për ta pritur vetëm nga Bekhami.
EMRAT E MËDHENJ - Në kohën e Pelesë, shumë analistë dhe drejtues të sportit ishin optimistë për ta vendosur futbollin në piedestalin e bejsbollit, NBA-së dhe regbisë amerikane. Atëherë "slogani" ishte pak a shumë i tillë: të sjellim emra të mëdhenj si Pele, Franc Bekenbauer dhe Xhorxh Best, dhe tifozët do të dynden e do të apasionohen pas futbollit. Pasi të tërhiqnin tifozët, sipas atyre, SHBA-ja mund të fillonte të zhvillonte lojtarët e vet dhe të bëhej fuqi e madhe në futbollin botëror. Në kulmin e vet, Nju Jork Kozmos tërhiqte regullisht 50 mijë tifozë dhe rekordi ishte mbi 70 mijë. Por më 1984-n ëndrra u shua. MLS dështoi. FIFA, organizmi drejtues i futbollit, e vetëdijshme për tregun e fuqishëm ende të pazbuluar në SHBA, ishte e vendosur që t'i jepte një mundësi këtij sporti dhe më 1988-n, organizimin e Kupës së Botës 1994 ia dha vendit të bejsbollit, Elvisit dhe "hot-dog"-ëve.
TRASHËGIMIA AMERIKANE - Pavarësisht promovimit dhe masave të organizatorëve për këto finale, futbolli prapë nuk arriti të vendoste rrënjë të thella në nivelet e larta. Trashëgimia nga USA '94 është që futbolli sot është një sport i shëndetshëm dhe emocionues për femrat dhe fëmijët në Shtetet e Bashkuara, por jashtë zonave etnike të vendosura qëkur, ky sport ka depërtuar pak në kulturën amerikane. MLS, e ngritur në mesin e viteve '90, ka prodhuar lojtarë të mirë që e meritojnë të luajnë në nivelet më të larta në Europë, çka ka bërë që SHBA-ja të marrë pjesë në pesë botërorët e fundit. Por finalet e 1994-s ilustrojnë saktë vendin e futbollit në mendësinë amerikane. Ato finale u luajtën në njëfarë "flluske futbolli": rreth stadiumeve, mijëra njerëz e dinin që po luheshin ndeshje dhe për shkak të përmasave të mëdha të stadiumeve amerikane, tifozëria në Kupën e Botës vendosi rekorde për sa u përket numrave. Por 3-4 kilometra larg nga vendi ku luheshin ndeshjet, jeta amerikane vazhdonte normalisht dhe pak vetë e dinin që po luhej futboll.
STIL "SHOWBIZ" - Bekham dhe gruaja, Viktoria "Posh Spice" Adams, patjetër që do të integrohen lehtësisht në industrinë e spektaklit (showbiz) dhe në jetën luksoze të Hollivudit dhe Los Anxhelosit. Çifti Bekham, që nga gazetat e skandaleve në Britani po quhen "Bucks" (d.m.th. Para), do të përfitojnë dhjetëra milionë dollarë për të bërë rolin e evangjelistëve sportivë në SHBA. Nuk dihet nëse amerikanët do të dëgjojnë mesazhin e tij. Kur futbolli në Angli dhe Europë vuante nga huliganizmi dhe stadiumet e amortizuara në vitet '80 dhe fillimi i viteve '90, NFL krijoi një ligë me skuadra europiane: Monarkët e Londrës, Dragojtë e Barcelonës, Galaktikët e Frankfurtit, midis të tjerave. NFL pa dritaren për të imponuar lojën e tyre përtej kufijve natyrorë, por përvoja e tyre ishte një sinonim i futbollit të lartë në SHBA tani: fillimisht turma të mëdha u tërhoqën nga spektakli i ri, por pastaj u pakësuan dramatikisht, duke e braktisur ligën në nivele lokale. Bekhami me bukurinë mashkullore, fisnikërinë dhe aftësitë e shkëlqyera në fushë, pritet të bëhet fenomen sportiv në SHBA. Nëse arrin të kthejë nderin duke bërë fenomen edhe sportin, atëherë "maskota Striker" do të buzëqeshë për një kohë të gjatë.