Kënga e Evropianit ka kushtuar deri tani 12 mijë euro. Pritet promovimi në vendet e Ballkanit. Synohet edhe Moska. Koleci pranon se xhirimi në Maqedoni është një gabim

Me lutjen në gjunjë për tu kthyer në shtëpi, Frederik Ndoci përfaqëson Shqipërinë në Festivalin Evropian 2007. Pas mbledhjes së datës 12 mars në Helsinki, është më e qartë rruga që do ndjekë kënga deri në natën e festivalit. Ka ditë që kënga dhe videoklipi transmetohen në ekranin e Televizionit Publik Shqiptar e përmes satelitit edhe përtej kufijve. Nuk ndodhi kështu me paraardhësin e Ndocit. Kënga e Luiz Ejllit nuk u promovua askund, gjë që ndikoi edhe në votim. Është e vështirë të krijosh një ide për këngën vetëm me një herë të dëgjuar në skenën e festivalit. Këtë vit duket se punët po ecin më mbarë. Deri tani nuk ka ankesa për anën financiare, autorë të pakënaqur, apo të papaguar, sadoqë është e vështirë të mësosh se sa është fondi i përcaktuar për pjesëmarrjen në Evropian. Shqiptarët, institucionet publike është fjala, ende e kanë shumë të vështirë të tregojnë xhepat. Mësohet se orkestrimi, masterizimi dhe bashkëpunimi me instrumentistë italianë kushtoi 6 mijë euro.

Ndërsa videoklipi i realizuar në Maqedoni ka kushtuar 5800 euro. Një shifër kjo për të cilën drejtorja e Radio Tiranës, njëkohësisht edhe drejtore e Festivalit të Këngës në RTSH, Zamira Koleci krenohet, pasi thotë se është gjysma e shpenzimeve që ishin parashikuar. "Sigurisht që kemi një fond më vetë për paraqitjen në Festivalin Evropian, me të cilat po mundohemi të bëjmë diçka të mirë, por nëse ka mundësi edhe t'i kursejmë. Pasi fondi i RTSH-së është i kufizuar",- thotë Koleci, duke shtuar se kjo nuk cënon korrektësinë në pagesat e shpenzimeve. Sa për promovimin e këngës, që edhe kjo do të kushtojë deri diku, Koleci tregon se po ndiqet një politikë. Mësohet se në Finlandë promovimi i këngës u mor përsipër nga disa shoqata shqiptarësh që sipas drejtores e bëjnë këtë punë "me dashuri dhe pa asnjë lloj interesi". "Po përgatitemi të çojmë stafin e këngës në disa vende, por ende jemi në pritje të përgjigjeve.

Në strategjinë tonë është që të shkojmë në ato vende ku është i nevojshëm lobingu", - thotë Koleci, duke pasur parasysh këtu vendet e Ballkanit, kryesisht vendet fqinje, prej të cilave edhe presim të marrim sasinë më të madhe të pikëve. Gjatë këtyre viteve të pjesëmarrjes shqiptare në Eurosong, pikët më të larta na kanë ardhur nga Greqia, Maqedonia, Mali i Zi e Serbia e ndonjë vend tjetër. Dhe janë pikërisht këto vende tek të cilat synohet të bëhet edhe promocion. "Moska është një vend tjetër ku synojmë të promovojmë këngën dhe të dërgojmë stafin", - thotë Koleci, teksa tregon se një nga "bllokadat" ku është e vështirë të çash është hapësira që dikur quhej Bashkimi Sovjetk. Ky është një problem që u ngrit edhe në Helsinki. Vota ruse është shumë e fuqishme", - thotë Zamira Koleci. Tashmë dihet që vota në Festivalin Evropian, më shumë se artistike është politike.

Historikisht republikat e ish-BS-së votojnë për njëra-tjetrën, Vendet e Ulëta, gjithashtu. Është kontaktuar me të gjitha ambasadat shqiptare nëpër Evropë, të cilat tashmë kanë nga një kopje të CD-së dhe DVD-së së këngës. Po kështu edhe të gjithë përfaqësuesit e vendeve të tjera kanë nga një syresh dhe në bazë të politikës së festivalit janë të detyruara ta shfaqin. Në Radio Televizionin Shqiptar po përgatitet një seri emisionesh mbi Festivalin Evropian dhe do transmetohen edhe tre syresh të përgatitura nga vetë EBU. Emisione që do shfaqen në televizonet e të gjithë vendeve konkurrente dhe ku Shqipëria është e pranishme. Në krahasim me një vit më parë duket se RTSH është më e angazhuar për paraqitjen në Festivalin Evropian. Realizuesit e këngës janë të kënaqur me bashkëpunimin dhe afatet. Përveç pjesëmarrjes për herë të parë në Eurosong, dy herët e tjera u shoqëruan me probleme. Kënga e Ledina Çelos u shoqërua me përplasje mes RTSH-së dhe autorëve të këngës. Çështja shkoi deri në gjyq.

Një vit më parë, Festivali Evropian nuk figuronte fare si zë më vete në buxhetin e RTSH-së. Autorët e realizuan këngën me shpenzimet e tyre, ndërkohë që paraqitja skenike ishte tërësisht e rastit, duke i hequr të tjera pikë në vlerësim. Këtë herë kemi edhe një videoklip më të mirë se një vit më parë. Nëse një vit më parë Luiz Ejlli tha se videoklipi i tyre është "çerek BBF-je", këtë herë cilësia është shumë e lartë dhe rezulton tepër e klikuar nëpër sitet e internetit ku ajo shfaqet. I vetmi problem me videoklipin është fakti që është xhiruar në Maqedoni. "Sigurisht që do të ishte mirë sikur në ato pak sekonda të promovohej turizmi shqiptar. E pranoj që është faji im, por nëse nuk gabon nuk mëson.

Gjithçka mbeti për në momentin e fundit dhe ishte e pamundur që videoklipi të realizohej këtu brenda një kohe aq të shkurtër", - thotë Koleci, duke shtuar se kjo eksperiencë do t'i shërbejë për edicionin e ardhshëm. Sa i përket ideve të hedhura për gjetjen e një formule tjetër për përzgjedhjen e këngës përfaqësuese në Evropina, Koleci thotë se kjo është një çështje që nuk ka vend për diskutime. Kjo është mënyra që përdoret edhe në vende të tjera, sipas saj, vetëm se festivali duhet të jetë me nivel. Koleci e pranon se ana teknike lë shumë për të dëshiruar në RTSH. "Kërkohen shumë investime dhe kjo nuk mund të behet me buxhetin e RTSH-së. Duhet ndjekur një strategji për thithjen e fondeve", - thotë Koleci.

Kënga "Hear my plea" ngjitet në skenën e Helsinkit në datën 10 maj. Fatkeqësisht Luiz Ejlli nuk na siguroi dot hyrjen në finale, kështu që Ndoci, duhet më parë të kalojë në gjysmëfinale.
 




____________

A mixture of Mjalt & Limon



Asnje nuk vdes i virgjer, jeta na e fut te gjithve!

Neper Europe behet ose 50% televotim ose 100% televotim, po asnjehere me 100% juri sic e ben festivali jone...

Juria sigurisht do zgjedhi nje kenge ne baze te gjithe pikave te profesionalizmit, por nuk merr shume ne konsiderate shijen e publikut.

Aq me teper qe ne Eurovision eshte 100% publik, dhe nuk do kete juri qe te merret me anen teknike te interpretimit. Mbase zonja Koleci duhet t'a degjoje kete sugjerim sepse eshte edhe arsyeja pse kenget nuk po pine shume uje ne Eurovision.....