Flet nëna e foshnjës, Soela Muça: Dua që e vogla ime të rritet e bukur dhe e shëndetshme

Pas martesës më mungonte vetëm vajza për t’u ndjerë plotësisht e lumtur”. Janë këto fjalët me të cilat e nis bisedën nëna e vogëlushes së lindur ditën e djeshme, Soela Muça, e cila dje ka mundur të shtrëngojë pas vetes fëmijën e saj të parë. “Vajza ka ndryshuar ditët tona si një çift i ri, na i ka zbukuruar ato dhe në të dy ndjehemi edhe më të dashuruar pas njëri-tjetrit”, shprehet nëna.

Shtatzënia
Vizitën e parë gjinekologjike Soela e ka bërë kur ishte vetëm 1-muajsh shtatzënë dhe tregon edhe emocionet e saj të para. “Nuk besoj se ka lajm më të bukur se sa të mësosh se së shpejti do të lindësh një fëmijë, e ndjen që gëzimi të buron nga shpirti”, shprehet nëna. Ajo tregon se në fillimet e shtatzënisë ajo ka qenë jashtë me pushime me bashkëshortin e saj dhe gjithë këto ditë i ka kaluar duke qenë shumë e kujdesshme ndaj foshnjës, por pa ditur gjininë e saj. Ekoja që ka përcaktuar gjininë e fëmijës është bërë pak ditë pasi prindërit janë kthyer nga pushimet, ku mundën të shuajnë kureshtjen dhe të mësojnë se në jetë do të vinte një vajzë. Nëna tregon për “Tirana Observer”, se i ka ruajtur të gjitha ekot e foshnjës, të cilat shumë shpejt do t’i rendisë njëra pas tjetrës në albumin e vogëlushes. “Në muajin shkurt dhe mars bëra eko dimensionale, të cilat janë me ngjyra, ndaj dhe foshnja shihet më qartë, pa harruar edhe disketën në të cilën janë të ruajtur të gjitha fotot që i janë bërë vajzës gjatë gjithë shtatzënisë”, shpjegon ajo.
Duket se eksperienca e parë e lindjes së një fëmije nuk ka qenë shumë e lehtë për 30-vjeçaren nga Tirana, e cila tregon se vështirësitë më të mëdha i janë paraqitur në muajt e fundit të pritjes së ardhjes në jetë të foshnjës. “Nuk është një përvojë e lehtë, por më ka dhuruar shumë kënaqësi, aq më tepër kur mendoja se dita kur do ta shihja për herë të parë po afronte, harroja çdo dhimbje”, thotë e emocionuar nëna. “E ndjeja që lëvizte gjatë gjithë kohës, kudo ku unë isha i ndjeja lëvizjet e saj”, thotë ajo. Por veç nënës këto lëvizje duket t’i kenë dhuruar shumë kënaqësi edhe babait të foshnjës, Sajmirit, i cili duket ta ketë pasur të vështirë të fshehë dashurinë dhe emocionin ndaj saj. “Tim shoqi i shkëlqenin sytë sa herë që bëhej fjalë për engjëllin tonë, më telefononte gjatë gjithë kohës për të pyetur për të dhe kur ajo lëvizte më prekte tek barku dhe përkëdhelte vajzën me shumë fjalë të ëmbla”, thotë 30-vjeçarja.

Lindja
Lindja e vogëlushes është bërë me operacion, por përpos këtij fakti, Soela tregon për gazetën se ka mundur të ruajë në kujtesë çastet e para të jetës së vajzës. “Munda të shoh nëpërmjet perdes çastin kur ajo erdhi në jetë, kur i prenë kordonin dhe ndiqja me sy çdo kujdes që i bëhej time bije, ishte një emocion dhe lumturi e papërshkrueshme”, thotë nëna. Edhe pse vogëlushja është vetëm njëditësh, nëna tregon për “Tirana Observer” dëshirat e saj të para dhe ëndrrat që ka thurur për vajzën. “Dua që të marrë tiparet më të bukura nga unë dhe bashkëshorti, dhe të bëhet shumë e bukur dhe gjithmonë gjatë shtatzënisë mendoja ditët kur do ta nxirrja shëtitje, do të luaja me të, ndaj pres me padurim të ikin ditët shpejt dhe të realizoj këto ëndrra”, shton ajo.

Emri
Ende nuk është marrë vendimi përfundimtar se cili do të jetë emri që do të mbajë vogëlushja. Sipas Soelës dhe Sajmirit, prindërve të vajzës dy nga alternativat më të mundshme janë Ajla dhe Erla.

Veshjet
Përzgjedhja e veshjeve të vogëlushes ka filluar menjëherë pasi Soela ka mësuar se së shpejti do të bëhej nënë, madje veshjet duket të kenë qenë një nga arsyet më të forta që ajo ka bërë ekon për përcaktimin e gjinisë së fëmijës. Nëna tregon se për herë të parë veshjet e vogëlushes i ka blerë kur ajo ishte vetëm 2-muajsh dhe i ka blerë jo një, por shumë veshje. “E kisha pritur me padurim ditën kur do të filloja të blija gjërat e time bije, ndaj atë ditë i kam blerë shumë gjëra, duke filluar nga pupat deri tek xhupi”, thotë ajo. Por veç Soelës për rrobat e fëmijës duket të ketë menduar edhe babai i vajzës, Sajmiri, i cili pas çdo udhëtimi të tij jashtë vendit tregohej i vëmendshëm të zgjidhte veshje për të. Ngjyrat që duket të jenë preferuar për garderobën e foshnjës janë e bardha dhe lejlaja.
Për sa i përket dhomës së gjumit prindërit kanë menduar që edhe për disa kohë fëmija të qëndrojë ne dhomën e tyre dhe pas disa muajsh të nisin përgatitjet për dhomën e saj të veçantë.

Mjekët
Falënderohen nga nëna të gjithë mjekët dhe mamitë e spitalit obstetrik gjinekologjik “Koço Gliozheni” për punën e shkëlqyer të realizuar nga ana e tyre. Një falënderimi veçantë shkon për mjekun Arjan Alika, i cili ka asistuar edhe lindjen e vogëlushes si dhe maminë Lindita Kume.

Nena
Edhe pse ka kaluar vetëm një ditë nga operacioni që i është dashur t’i në nënshtrohet për lindjen e vajzës së saj, gjendja shëndetësore e nënës, Soela Muça, paraqitet shumë e mirë. Mjekët kanë vendosur që ajo të mjekohet vetëm me perfuzion dhe qetësues. Aktualisht 30-vjeçarja nga Tirana ushtron profesionin e mësueses në një nga gjimnazet e kryeqytetit.

Blerina KACA
 




____________

Lot Dielli