Flet nëna e foshnjës, Jurisana Lena: “E ëndërronim një vajzë të bukur”

Eshtë gëzuar pa masë kur ka mësuar se në jetë do të vinte një vajzë. Madje më shumë se sa kur ka mësuar se është shtatzënë. Dëshirat, ëndrrat dhe planet për të ardhmen e vogëlushes janë shumë, por ajo çfarë ka më shumë rëndësi për nënën lidhet me faktin që vajza të gëzojë gjithmonë shëndet të mirë, të jetë e bukur dhe e lumtur. “Fëmijën e parë e doja patjetër vajzë”. Këto janë fjalët me të cilat e nis bisedën Jurisana Lena, nëna e vogëlushes njëditëshe, lindur në maternitetin e Tiranës. Nga ana tjetër, ajo tregon se që pas ditës që janë martuar prindërit e kanë dëshiruar shumë një fëmijë, aq shumë sa ditën kur është konfirmuar shtatzënia gjithçka u është dukur si një ëndërr. Gëzimi është shtuar edhe më shumë kur kanë parë në eko se foshnja do të ishte një vajzë, pasi pikërisht kjo kishte qenë edhe një nga dëshirat e tyre të hershme. Vogëlushja ka ardhur në jetë dy vjet pas martese dhe, sipas prindërve, lindja e saj i ka dhënë jetës së tyre një tjetër drejtim. “E ëndërronim një fëmijë dhe dëshironim vetëm të ishte mirë me shëndet dhe pse jo një vajzë e bukur”, shprehet Jurisana.

Shtatzënia
Ekon e parë Jurisana e ka bërë muajin e tretë të shtatzënisë, atëherë kur në monitor dallohej vetëm embrioni i fëmijës. Ndërsa eko-ja e dytë e foshnjës u bë kur ajo ishte 5 muajsh. Kjo eko morfologjike, sipas gjuhës mjekësore, përcaktoi përfundimisht se fëmija ishte i shëndetshëm, gjithashtu edhe që ishte një vajzë. “Atë foto e mbaj gjithmonë mbi tavolinën e dhomës time, sepse është një nga kujtimet e mia më të bukura të saj”, shprehet 22- vjeçarja. Lena tregon për “Tirana Observer” se që e vogël e imagjinonte veten e saj shumë të lumtur me njeriun e zemrës dhe me një fëmijë të shëndetshëm dhe pas realizimit të dëshirës së parë, edhe në muajt e shtatzënisë është treguar e vëmendshme të ruajë çdo detaj. Të gjitha fotot e eko-ve të vogëlushes janë të vendosura në një album dhe sigurisht pjesë e këtij albumi do të jetë edhe fotoja e botuar në “Tirana Observer”. “Është një dhuratë shumë e bukur që i bëhet jo vetëm vajzës sime, por edhe mua, më duket si një shpërblim i atyre dy vjetëve ankth për konfirmimin e shtatzënisë”, shton nëna. Mes emocionesh 22-vjeçarja kujton edhe lëvizjen e parë të fëmijës në muajin e katërt, të cilin e konsideron si një nga kujtimet më të veçanta të asaj periudhe. “Isha vetëm në shtëpi kur papritur ndjeva një goditje dhe nga gëzimi kisha një boshllëk në zemër, nisa të qaj”, kujton nëna.

Lindja
Duket se për 22-vjeçaren lindja ka qenë pak e vështirë, veçanërisht sepse i është nënshtruar një operacioni. Mjekët që janë kujdesur për Jurisanën dhe vogëlushen shprehen se gjendja e tyre shëndetësore është shumë e mirë. Duke qenë nën efektin e anestezisë së pjesshme nëna e ka të lehtë të risjellë në mend momentet e para të ardhjes në jetë të vajzës. “E mora në krahë, gjithçka më dukej e pabesueshme, i thashë: Të më rrosh, bija ime! Dhe fillova të qaj nga lumturia”, kujton e përlotur nëna. Gjatë bisedës Jurisana tregon se nuk ka menduar për ndonjë profesion specifik të vajzës kur të rritet, e vetmja gjë e sigurt është se prindërit do ta mbështesin vajzën në çdo vendim. “Ne asnjëherë nuk do të ndikojmë në zgjedhjet e saj, kjo është e sigurt”, thekson nëna.

Emri
Nuk është vendosur ende se cili do të jetë emri që do të mbajë foshnja. Jurisana dhe Erioni shprehen se kanë menduar që të jetë xhaxhai i fëmijës ai që të bëjë përzgjedhjen përfundimtare.
Rrobat kanë nisur të blihen që në muajt e parë nga nëna, e cila ka preferuar më shumë ngjyrën rozë për vogëlushen. “Gjyshet kanë punuar gjithçka me dorë, ndërsa unë i kam blerë, i kemi alternuar rrobat”, vazhdon ajo. Ndërkohë që për dhomën e vogëlushes janë kujdesur të dy prindërit dhe gjithçka është gati, përpos këtij fakti, ata kanë menduar që në muajt e parë vajza të qëndrojë në dhomën e prindërve, sepse kështu ata do ta kenë nën kujdes gjatë gjithë kohës.

Mjekët
Jurisana shprehet se lindja e vajzës për të nuk do të kishte qenë aq e lehtë pa punën e shkëlqyer të mjekëve të maternitetit “Mbretëresha Geraldinë”. Ajo shpreh mirënjohje dhe falënderim për të gjithë mamitë dhe mjekët e këtij materniteti, në veçanti për mjekët Demir Olli dhe Gilberta Hatibi.

Nena
Sipas mjekëve, gjendja shëndetësore e nënës aktualisht është shumë e mirë. Përpos këtij fakti ata kanë kërkuar qëndrimin e saj në maternitet edhe për 5 ditë të tjera në rast se paraqitet ndonjë shqetësim. Aktualisht 22-vjeçarja është e papunë dhe mendon që edhe për një vit të ketë primar kujdesin për të voglën.
 




____________

Lot Dielli