Çdo ndërtues, pushues apo investitor që kërkon të investojë për një truall apo godinë në zonën e Golemit, duhet më parë të informohet për planin urbanistik të kësaj zone.  Burime nga kjo komunë thanë se janë përcaktuar zonat në të cilat do të ndërtohen apartamentet e pushimit, restorantet, baret, hotelet, terrenet sportive, fshatrat turistik, parkimeve etj. Pak ditë më parë, kreu i Policisë Ndërtimore të Kavajës, Sokol Qehaja, përcaktoi banesat që do të prishen në këtë zonë turistike.

Plani urbanistik

Përfaqësues të Këshillit të Rregullimit të Territorit të Republikës së Shqipërisë (KRRTRSH) kanë miratuar tre vjet më parë planin urbanistik të zonës turistike Golem, Kavajë. Sipas këtij plani të miratuar nga Fatos Nano, janë 48 parcela të cilat do të shndërrohen në fshatra turistikë si dhe në komplekse me apartamente pushimi. Në 14 parcela do të ndërtohen restorante, lokale, objekte argëtimi. Gjithashtu 3 parcela do të shndërrohen në terrene sportive si dhe 8 të tjera do të ndërtohen hotelet turistike. Sipas këtij plani, janë përcaktuar 5 rreth-rrotullime. Tre të tillë ndodhen në aksin kryesor që lidh Durrësin me Lushnjën, ndërsa dy të tjerë janë pjesë e projektit në brendësi të Golemit. Aktualisht, në afërsi të bregdetit janë ndërtuar një sërë godinash për qëllime ekonomike. Ndërkohë me planin e ri urbanistik, këto godina do të shemben duke u kthyer në një brez gjelbërimi. Pas këtij brezi do të jepen lejet e ndërtimit.

Cilat banesa do prishen

Kreu i Policisë Ndërtimore të Kavajës, Sokol Qehaja, thotë se është gati plani për shkatërrimin e ndërtesave dhe pastrimin e bregdetit nga inertet që do të krijohen. Sipas tij, sapo të përfundojë aksioni i policisë në Vlorë, do të nisë menjëherë dhe shkatërrimi i ndërtesave pa leje në plazhin e Golemit. "Ajo që mund të them unë, në bazë të urdhrave dhe dokumentacionit që kam, është se pa nisur e përfunduar punë në Vlorë, nuk mund të nisë në Kavajë", thotë Qehaja. Ndërkohë që shton se i vetmi problem është nëse polica dhe autoritetet e tjera përgjegjëse për pastrimin e plazhit do të jenë në gjendje që brenda afatit të hapjes së sezonit turistik të pastrojnë bregdetin nga inertet që do të krijohen nga prishja. Megjithatë, nëse policia dhe autoritetet vendore nuk do të jenë në kohë për të përfunduar aksionin, atëherë ka mundësi që aksioni të shtyhet pas sezonit turistik. Ndërkohë që paralajmërimin e parë për prishjen e banesave pronarët e vilave dhe ndërtesave të tjera në Golem tashmë e kanë marrë nga ana e Policisë Ndërtimore.

Vendimi/ Nazmi Sinarezi kompensohet me 520 mijë lekë

Këshilli i Ministrave miratoi dje në mbledhjen e tij vendimin për shpronësimin, për interes publik të pronarit të pasurisë së paluajtshme, pronë private, që preket nga realizimi i projektit të furnizimit me ujë nga rezervuari i Manskurisë, Golem. Pronari i pasurisë së paluajtshme, pronë private, që shpronësohet, Nazmi Sinarezi, do të kompensohet në vlerë të plotë, për sipërfaqen 650 metër katror, tokë bujqësore, me çmim 800 lekë për metër katror, me vlerë të përgjithshme 520 000 lekë. Shpronësimi dhe likuidimi do të bëhet brenda muajit maj 2007. Burime nga Kryeministria thanë se ky vendim mbështetet në nenin 100 të Kushtetutës, të neneve 5, pika 1, 20 e 21, të ligjit Nr.8561.
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------