Sipas zv/ministrit të Shëndetësisë, Shqipëria renditet ndër vendet me përqindjen me të lartë të duhanpirjes

Vendi ynë renditet në vendet me përqindje të lartë të duhanpirjes. Jo pak, por rreth 60 për qind e meshkujve dhe 18 për qind e femrave konsumojnë duhan, madje këto të fundit kanë një tendencë në rritje ndaj fenomenit. Por, ajo çka është tronditëse, studimet e fundit tregojnë se adoleshentët e moshave 12-15-vjeç janë të përfshirë në këtë fenomen pasi 16.8 për qind e tyre pinë duhanin rregullisht.

Kjo u bë e ditur dje, me rastin e Ditës Botërore të Luftës Kundra Duhanit, nga zv/ministri i Shëndetësisë, Arben Ivanai, i cili theksoi se duhanpirja është një prej kërcënimeve më të mëdha për shëndetin në Shqipëri. Duke mbështetur moton "Mjedise me 100 për qind pa duhan" specialistët e shëndetësisë pohojnë se studimet tregojnë se fëmijët shqiptarë janë të rrezikuar nga duhani, pasi 9 në 10 fëmijë qëndrojnë në ambiente me tym duhani çka dëmton rëndë shëndetin e tyre. "Për këtë, Ministria e Shëndetësisë është angazhuar në kontrollet 24-orëshe për zbatimin e ligjit të duhanit",- pohon Ivanai. Ndërkohë, të dhënat e studimeve tregojnë se shqiptarët jo vetëm që pinë duhan në ambiente të mbyllura, por harxhojnë miliona euro në vit duke blerë duhan. "Shqiptarët harxhojnë 300 milionë euro në vit, për të blerë cigare",- theksoi Ivanai.