Pas këtij shqetësimi të qytetarit Orhan, ne u drejtuam në Ministrinë e Mjedisit, Pyjeve dhe Administrimit të Ujërave. Atje na bënë të ditur se prej shtatorit të kaluar ka nisur një projekt 5-vjeçar, me kontribut të gjithanshëm, që shkon në mbi 12 milionë dollarë, për të mbrojtur Liqenin e Prespës.

Sipas projektit, që mbaron në shtator 2011, qeveria shqiptare, Fondi Global për Mjedisin (GEF) dhe Programi i Kombeve të Bashkuara për Zhvillimin janë angazhuar për të mbështetur përdorimin e burimeve të energjisë së rinovueshme, për të mbrojtur bio-diversitetin dhe për të bërë më eficiente angazhimet në konventat ndërkombëtare mjedisore. GEF financon shumicën e projekteve mjedisore, me kontribute financiare edhe nga qeveria shqiptare. Por në këtë nismë janë bashkuar edhe Ministria e Mjedisit, Pyjeve dhe Administrimit të Ujërave, Agjencia Rajonale e Mjedisit (ARM) në Korçë, disa drejtori, disa komuna dhe biznese private në zonë, si dhe qeveritë e ish-Republikës Jugosllave të Maqedonisë dhe Greqisë, dhe disa banka dhe agjenci të huaja.

Objektivi i projektit është që të nxisë adaptimin e menaxhimit të integruar të ekosistemit, në zonën ndërkufitare të bazenit të Liqenit të Prespës në ish-Republikën Jugosllave të Maqedonisë, Shqipëri dhe Greqi, për të ruajtur bio-diversitetin e rëndësishëm në shkallë globale, për të zbutur ndotjen në liqenet ndërkufitare dhe për të siguruar një bazë të qëndrueshme për zhvillimin e mëtejshëm ekonomik dhe shoqëror të bazenit.

Qeveritë e tre vendeve kanë rënë dakord të punojnë së bashku, për të zvogëluar ndotjen në liqene dhe për të prezantuar praktika të menaxhimit mjedisor në bazenin e Prespës, duke integruar qëllimet ekologjike, ekonomike dhe sociale.

Projekti bazohet në një projekt të mëparshëm 2-vjeçar, i cili promovoi menaxhimin e ekosistemit të integruar në Park dhe zgjeroi bashkëpunimin midis tre vendeve pjesëmarrëse. Ndër arritjet e tjera vlen të përmendet se, projekti i parë hodhi bazat teknike për një projekt me përmasa të plota, duke përfshirë një vlerësim bazë të bio-diversitetit, një studim të kërcënimeve në ekosistemin e Liqenit të Prespës dhe zgjidhjet e mundshme.

Projekti i Parkut te Prespës do të mbrojë banorët lokalë dhe vendbanimet e tyre (të tashme dhe të ardhme) në procesin e mbrojtjes së mjedisit përreth tyre, duke minimizuar shkaqet njerëzore të cilat sjellin shkatërrimin, degradimin ose dëmtimin e ekosistemit natyror të Prespës.

Parku i Prespës, një pjesë e papërsëritshme dhe e kërcënuar

-Në pjesën shqiptare të Parkut të Prespës popullsia vlerësohet si e qëndrueshme dhe në rritje, me një dendësi relativisht të lartë, prej 20 banorë për km2. Nga kjo popullsi, 23% janë të papunë dhe e ardhura mesatare vjetore është $700. Rreth 70% e fuqisë punëtore merren me bujqësi. Industria nuk është e zhvilluar në këtë zonë.

-Frutat e egra dhe bimët mjekësore, përbëjnë një burim të rëndësishëm të ardhurash për banorët e zonës.

-Speciet unike: flora e pjesës shqiptare të Parkut Kombëtar të Prespës, ka rreth 1000 specie ose 30% të gjithë florës së vendit.

-Ndodhen 50 lloje kafshësh dhe 19 lloje bimësh, të cilat gjenden vetëm në pellgun ujëmbledhës të Prespës, 1600 lloje fluturash dhe një larmishmëri amfibësh dhe reptilësh.

-Parku i Prespës shërben si një vend i rëndësishëm për ushqimin, strehimin dhe rritjen e të paktën 91 specieve të zogjve migratorë, ku përfshihet edhe Pelikani Dalmat, që është mjaft i rrezikuar.

-Të paktën, 19 specie kafshësh në Park janë të rrezikuara.

-Zhvillimi i turizmit në zonë është ende shumë i dobët, por lidhja midis mbrojtjes së mjedisit dhe turizmit, po bëhen më të qarta dhe më të rëndësishme në kushtet e zhvillimit të eko-turizmit në rajon dhe në Shqipëri.
 




____________
Direktoria , Galeria


Piracy is a crime! So, am I a criminal?