Ros Braun është i bindur se Rubens Barirkelo, një nga pilotët me më shumë eksperiencë në Formulën 1, do të ketë mundësi këtë sezon të duelojë me më të mirët. Në këtë sezon Barrikelo do të thyejë rekordin e Rikardo Patrezes, për sa u përket garave të zhvilluara. Ros Braun ka punuar për rreth 6 vjet me pilotin brazilian 35 vjeçar. Ai është shprehur optimist për paraqitjen e tij dhe të pilotit tjetër të Hondës, Xhenson Baton, për këtë sezon. "Me Rubensin te Ferrari kemi arritur disa fitore, - ka deklaruar drejtori i përgjithshëm i skuadrës Honda. - Ai ka arritur të renditet dy herë në vendin e dytë, pas Majkëll Shumakerin, në klasifikimin e përgjithshëm. Nëse nuk do të kishte qenë Majkëlli atje, Rubensi do të shpallej kampion bote. Në atë kohë nuk binte shumë në sy, por Rubensi jepte kontribut të madh te ajo skuadër, pasi ai ka pasur gjithmonë një gjykim të saktë për makinën. Ai kupton shumë nga ana teknike dhe në disa raste arrinte të kapte edhe disa probleme që nuk i kapte Majkëlli. Sezoni i kaluar për të ka qenë shumë i vështirë, por nga ajo që shoh tani më duket entuziast. Kanë kaluar 2 3 vjet që ne nuk kemi punuar bashkë, por ai vazhdon të ketë marrëdhënie dhe komunikim shumë të mirë me mua. Mendoj se si Rubensi ashtu edhe Xhensoni kanë mundësi për të fituar gara me Hondën. Ende ne nuk kemi arritur t'ua japim atyre makinën që ata do të donin, por kam besim se do t'ia dalin mbanë dhe do të arrijnë atë që kërkojnë. Edhe për sa i përket kolaudatorit, ne nuk kemi zgjedhur një pilot të ri me dëshirën e madhe për të rënë në sy, por një pilot profesionist që kupton shumë nga ana teknike dhe, për mendimin tim, zgjedhja e Aleksandër Vurzit është e mira." 53 vjeçari Braun ka menduar t'i ndajë përgjegjësitë me drejtorin teknik Nik Fraj, një tjetër protagonist i Formulës 1. Braun për 10 vjet ka qenë drejtor teknik te skuadra Ferrari dhe padyshim që është nga më të mirët në këtë pozicion, për këtë sport. "Aventura ime me atë skuadër përfundoi. Kam kaluar momente shumë të bukura tek ajo skuadër, por vendosa vitin e kaluar që të qëndroj pushim. Doja të provoja diçka ndryshe. Nuk kishte ndonjë motivacion të punoje me një skuadër që ishte më e mira dhe që i kishte gjërat në mënyrë perfekte. Mendova se nuk duhet të tërhiqesha dhe të vazhdoja me diçka tjetër. Unë vazhdoj të komunikoj me drejtuesit e Ferrarit, kam ende marrëdhënie të mira. Formula 1 është një sport i përbërë nga shumë personazhe dhe mendoj se ne kemi ide të shumta, të cilat duhet t'i ndajmë së bashku. Ndoshta po të më kishin kërkuar të lëvizja përpara disa vitesh nuk do ta bëja, por tashmë mendova se çdo gjë kishte shkuar në atë pikë ku më duhej të ndryshoja." Ndërkohë te Honda, Ros Brauni ka gjetur edhe projektin "Endrra e Tokës". "Mendoj se kjo është një iniciativë vërtet e madhe. Kur erdha në fillim te kjo skuadër nuk e kuptoja plotësisht këtë projekt, por tashmë mendoj se është një iniciativë e madhe dhe bëhet fjalë për diçka unike: pra ta përdorësh sportin për të dhënë një mesazh të madh. Më vjen mirë gjithashtu që Honda është skuadër me një buxhet të madh dhe që shpenzon për anën teknike, për të arritur nivele sa më të larta. Ne e kuptojmë se duhet t'i ulim disi shpenzimet në Formulën 1, por, nga ana tjetër duhet të kemi kujdes që të mos penalizojmë asnjë skuadër. Sukseset nuk arrihen pa shpenzuar dhe pa djerdhur shumë djersë. Nuk duhet të harrojmë se ai që e bën interesante Formulën 1 është dueli intensiv mes inxhinierëve dhe pilotëve. Brenda këtij dueli ka shumë zhurmë, por shpejt edhe unë mendoj se, po t'ia heqim këtë gjë Formulës 1, atëherë do ta shkatërrojmë," ka përfunduar Ros Braun.
 




____________
\"Mos shikoni kishat as xhamijat se feja e shqiptarit eshte shqiptaria.\"