Dhërmiu, një nga pikat turistike më të frekuentuara në Shqipëri

Plazhi i Dhërmiut është një nga vendet më të bukura të Shqipërisë. Bregdeti i thyer i jep një intimitet të veçantë secilit prej gjireve të vegjël. Uji i kthjellët krijon një kombinim fantastik në plazhin me guralecë.

Në qoftë se është e vërtetë se jeta e njeriut është anije që lundron, atëherë limani në të cilin njeriu ndalet është vendlindja e tij. Me të tilla domethënie të udhëtimit edhe njeriu edhe vendlindja janë udhëtarë në rrugë: edhe afër edhe larg njëri tjetrit. Por vendlindja nuk zgjidhet, ajo ndodh.
Në këtë kontekst, na mbetet thjesht ta njohim dhe të mësojmë ta duam, edhe kur vendi ku kemi lerë nuk është i pasur, edhe kur nuk ka emër të mirë. Këto e ndjesi e të tjera të shoqërojnë kudo ku udhëton nëpër Shqipëri, sidomos në jugun e saj, të përfolur për bukuritë, por ende të pa përfshirë në hartat turistike botërore.
Dhërmiu, fshati i vogël që premton shumë
Fshati me emrin Dhërmi ose Drimadës (në greqisht Pylli me Lisa) ndodhet poshtë malit të Çikës, me lartësi 2051m. Nga pozicioni gjeografik që ka, Dhërmiu krijon një oaz larg qyteteve, mediave dhe zhurmës. Afër tij ndodhet edhe shpella e famshme e Piratëve. Larg hoteleve të pushimit, 10 minuta me makinë ndodhen të vetmet dyqane ku njerëzit mund të furnizohen. Fshati është i vjetër po kështu dhe kisha në majë të malit, një nga më të vjetrat në Shqipëri. Rrugica të vogla, pa infrastrukturë, çdo gjë të bën ta ndiesh veten në një epokë tjetër.
Ndryshe nga ç'jemi mësuar, nëpër këto vende nuk shkohet me makinë. Eshtë rast i mirë që të lëvizësh këmbët dhe të kujtosh kohën kur këto ishin i vetmi mjet në dispozicion. Fatkeqësisht, të gjitha këto janë prezantimi i parë për turistët e huaj, që më pas mrekullohem nga pamjet e asaj që quhet riviera shqiptare. Deti Jon formon shpesh mpleksje të veçanta dhe harmonike me kodrat dhe malet. Përveç bukurisë natyrore, fshati ka edhe vlera kulturore e historike. Këtu ndodhen tre kisha, të cilat kryesisht janë greke: Shën Mëria, një ndërtesë e vogël e shekullit të XIII-të-XIV-të; kisha e Ipapandit, me afreske nga shekulli i XVII dhe XIX; dhe kisha e Shën Stefanit.
Përveç plazheve të virgjëra dhe bukurisë natyrore, Dhërmiu ofron shumë mundësi për sportet e ujit dhe hedhjet me parashutë, të cilat krijojnë bazat e një turizmi ndërkombëtar.

Po ikën edhe rëra në plazhin e Dhërmiut

Një problem shqetësues i plazhit është përdorimi pa kriter i rërës për ndërtimet e reja që bëhen në fshat. Çdo ditë rritet numri i IFA-ve që hapin gropa dhe marrin rërën, duke e masakruar plazhin me të bukur ne Shqipëri. Ky fakt nervozon pushuesit, përfshi këtu edhe shumë të huaj që kanë ardhur nga shumë vende, por nuk ka shqetësuar aspak policinë ndërtimore, uniformat blu dhe aq më pak Bashkinë e Himarës në juridiksion të së cilës është plazhi i Dhërmiut.
Vendasit të thonë se bëhen ndërtime të reja në fshat, ndërtesa 2-3-4 e deri në 5 katëshe, por kurrsesi ata nuk justifikojnë gërryerjen e rërës në plazh. Eshtë e tmerrshme të shikosh një skenë të tillë, ndërsa për bukurinë e Dhërmiut flasin të huajt deri nga Amerika. Kjo konsiderohet një çmenduri e këtyre qytetarëve, por edhe një neglizhencë e pajustifikueshme e qeveritareve që heshtin para këtij fakti. Kështu ka heshtur Bashkia e Himarës edhe kur bëhej fjalë për anijen greke, që përgjatë dy viteve merrte rërë nga plazhi i bukur i qytetit të Himarës dhe e dërgonte në favor të firmave ndërtuese në shumë qytete greke. “Duhen ndaluar IFA-t”,- është ky alarmi që japin vendasit, por edhe pushuesit në Dhërmi. Sa më shpejt të pengohet marrja e rërës, pasi kur të kujtohen organizmat shtetërore që merren me këto probleme, Dhërmiu do të jetë shëmtuar keqas.

Jeta në verë

Në bregdetin jugor shqiptar, në fshatin Dhërmi, aktiviteti kryesor ekonomik është turizmi, edhe pse vitet e fundit me rregullimin e rrugës së Llogarasë si dhe zgjatjen e pjesës së autostradës Dhërmiu shfrytëzohet nga turistët kryeqytetas edhe për fundjavë. Nga Tirana duhen pak më shumë se tre orë udhëtim me makinë private pa ndalesa. Por mund të shkohet edhe duke shfrytëzuar mjetet publike. Mund të merren autobusat apo furgonat që mbërrijnë në Vlorë dhe që nisen çdo gjysmë ore nga Tirana, pastaj aty gjen menjëherë në mëngjes rreth orës 9.00 autobusin që shkon në Himarë apo furgona të tjerë që bëjnë linjën e bregdetit. Gjatë muajve të verës vendoset edhe një linjë direkte nga Tirana në bregdet.
Gjatë periudhës së dimrit fshati duket i shkretë, sepse shumë banorë shkojnë në Greqi për të kaluar ato muaj. Të tjerë gjenden aty duke u marrë me ndërtime, të cilat përpiqen pjesërisht apo krejtësisht t’i kenë përfunduar përpara fillimit të muajit korrik, muaj ky që shënon edhe dyndjet me turistë. Çdo vit, për shkak të ndërtimeve rritet numri i vendeve të fjetjes, të cilat janë jo vetëm hotele, por edhe dhoma apo apartamente me kushte komode në shtëpi private. Çmimet e fjetjes janë nga më të ndryshmet edhe pse në përgjithësi janë relativisht më shtrenjtë sesa në zonat e tjera bregdetare. Dhomat në hotele shkojnë nga një maksimum 50 dollarë nata deri në 20 dollarë. Por mund të gjenden edhe çmime më të favorshme, por jo në periudhën 15 korrik –15 gusht. Sidoqoftë është mirë që fjetja të prenotohet më përpara kur mendohet të rrihet për një periudhë disa ditore.

Mbrëmje diskoje dhe dëfrimi

Ajo që e dallon plazhin e Dhërmiut është gjelbërimi i shumtë që rrethon hotelet e vogla të ndodhura pranë duke formuar një kompleks shumë të veçantë dhe të bukur. Plantacioneve me agrume dhe ullinj aty i shtohen pishat e shumta bregdetare, rrapet me hije të freskëta dhe shumë lulishte të ndërtuara dhe të mbajtura me kujdes që hijeshojnë ambientet rreth hoteleve dhe lokaleve. Nuk ka nevojë që blesh ujë në shishe, sepse uji i Dhërmuit buron nga shkëmbenjtë dhe ruan freskinë edhe në pikun e verës.
Perëndimi është moment që shijohet në qetësi të plotë. Në këtë orë njerëzit ikin nga plazhi dhe bëhen gati të shkojnë të hanë darkë. Ushqimi dhe shërbimi shpesh lënë për të dëshiruar, sepse nuk kanë patur shumë konkurrencë dhe drejtohen nga njerëz krejt të zakonshëm, pa ndonjë specializim në turizëm apo hoteleri. Në shtëpitë ku mund të marrësh dhomë me qera, mund të gatuash vetë por zakonisht amvisa e shtëpisë mund të gatuajë sipas kërkesës gjellët tradicionale. Nëpër restorante gatuhen kryesisht prodhimet e detit si dhe picat. Por kujdes nga çmimet! Mos ngurroni të pyesni sesa kushton, sepse do të gjendeni në moment të vështirë. Për më kujdes hiqni mënjanë paratë që ju nevojiten për kthim kështu do të jeni më të qetë e më të sigurt.
Ndër hotelet, më i njohuri është Grand Hotel Dhërmi, me 50 dhoma ku për sportet në ujë ofrohet ndihmë e pajisje si barka, canoes dhe vela sërfi që mund të merren me qera.
Në plazhin e Dhërmiut janë ngritur tre diskoteka verore shumë të frekuentura nga të rinjtë ku muzika vazhdon deri në orët e para të mëngjesit. Të jesh aty është me të vërtetë një eksperiencë e bukur, sepse në orët e para të mëngjesit grupet e të rinjve e dëgjojnë muzikën ritmike të diskos në rërën e plazhit. Shpesh gjatë bregut mund të shohësh të rinjtë të ndezin zjarre dhe të bisedojnë gjatë rreth tyre, shumë edhe në krahët e të dashurve të tyre.
 




____________

Dhermi.
 




____________