Kompania telefonike spanjolle duket se do të shkëputet nga motoçiklizmi dhe Formula 1

"Telefonica", 20 milionë euro për Barcelonën

Endi Tufa


 Një reagim disi i çuditshëm mund të zhbllokojë çështjen e sponsorëve te Barcelona. Sipas disa mediave spanjolle, lëvizja e kampionit të botës në Formulën 1, Fernando Alonso, nga Renault-ja te McLaren-Mercedes-i, ka sjellë edhe disa lëvizje sponsorësh. Një ndikim të madh ka pasur kjo lëvizje edhe te sponsori i tij më i madh, "Telefonica". Firma aspanjolle e telekomunikacionit është prezente pothuajse në të gjitha sportet motoristike. Përpara disa kohësh, kjo firmë kishte vendosur të sponsorizonte shumë mbi Alonson dhe Renault-në në Formulën 1. Sipas fjalëve që qarkullonin në atë kohë, mendohej se ata kishin arritur një kontratë prej 12 milionë eurosh në vit. Nga ana tjetër, edhe në garat e motoçiklizmit, "Telefonica" ishte prezente. Ajo sponsorizonte skuderinë e Gresinit, në kategorinë më të madhe Moto Gp, dhe atë të kampionit të botës në 250cc, Daniel Pedrozës. Shpenzimet e kësaj firme në këtë sport kapnin shifrën e 10 milionë eurove. Megjithatë, planet e firmës spanjolle me sa duket janë prishur. Në vitin 2007, Fernando Alonso do të garojë për skuderinë McLaren-Mercedes, e cila po në këtë vit do të ketë si sponsor kryesor një tjetër kompani telefonike, "Vodafone". Edhe kampioni i botës në klasin 250cc do të kalojë në sezonin e ardhshëm në kategorinë Moto Gp, te Honda zyrtare HRC. Për këtë arsye, "Telefonica"-s do t'i duhet të rishohë kontratat e saj, pasi në këtë skuderi sponsor kryesor është një kompani tjetër. Kjo kompani ka si synim dy kampionët më të mëdhenj spanjollë, Fernando Alonson në Formulën 1 dhe Daniel Pedrozën në motoçiklizëm. Duke parë që me këta objektiva rrugët janë të mbyllura, "Telefonica" po mundohet të ndryshojë drejtim. Objektivi i tyre i radhës, me sa duket, është skuadra spanjolle e futbollit, Barcelona. Duket se në këtë tratativë ka më shumë mundësi. Sipas zërave të fundit, oferta që i ka bërë kjo kompani presidentit Joan Laporta, është 20 milionë euro. Kjo shifër me sa duket vjen pas kursimeve që ka bërë kompania nga tërheqja që ka bërë nga Formula 1 dhe motoçiklizmi. Në të parën, sponsorizimi shkonte në 12 milionë euro, ndërsa në të dytën deri në 10 milionë. Zëra nga skuadra katalane flasin për një optimizëm në lidhje me këtë ofertë dhe sipas tyre shumë shpejt mund të arrihet një marrëveshje. Megjithatë, pritet që kompania e basteve në internet, Betandwin, të mos e rinovojë më kontratën që ka me këtë skuadër. Në të vërtetë, drejtuesit e kësaj firme austriake ishin ftuar nga drejtuesit e Barcelonës për të riparë ofertën që e kishin bërë një vit më parë. Ata për momentin paguajnë 17 milionë euro në vit. Kalimi nga 17 milionë euro në 20 milionë mund të jetë i rëndë për këtë kompani. Gjithsesi, duket se "Telefonica" është e gatshme ta japë këtë shumë parash për të sponsorizuar Barcelonën, një nga skuadrat më të suksesshme në Spanjë dhe në Europë.
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------