Një aeroplan me të paktën 170 pasagjerë në bord është përplasur gjatë uljes në qytetin brazilian të Sao Paulos.

Mendohet se kanë gjetur vdekjen të gjithë pasagjerët dhe disa persona te tjerë qe ndodheshin në zonën ku u përplas aeroplani. Disa dhjetëra trupa janë nxjerrë nga rrënojat e aeroplanit në aeroportin Kongonhas. Aeroplani i tipit Airbus-320, i shoqërisë braziliane TAM, njoftohet të ketë dalë jashtë pistës para se të përplasej me një ngarkesë dhe një pikë karburanti.

Aeroplani fluturonte nga qyteti jugor i Porto Alegres.

Një korrespondent i BBC-së në Sao Paolo thotë se moti i keq me shi dhe erëra të forta u ka sjellë vështirësi të mëdha ekipeve të shpëtimit. Presidenti Lula da Silva ka mbajtur një mbledhje emergjente të kabinetit. Televizioni brazilian ka shfaqur pamje me shpërthime flakësh, ndërsa shërbime të përforcuara të urgjencës kanë mbërritur në vendngjarje. Dje një avion rrëshqiti, doli jashtë pistës dhe u ndal në fushën me bar të aeroportit. Gjatë atij incidenti nuk pati të lënduar.

Në këtë aeroport, më i ngarkuari në Brazil, ka pasur incidente të ngjashme edhe më parë. Siguria e fluturimeve në Brazil është problem madhor që prej përplasjes së vitit të kaluar të një aeroplani pasagjeresh me një avion privat mbi Amazonë. Në atë aksident humbën jetën 154 vetë, duke e shndërruar atë rast në incidentin më të rëndë ajror në historinë e Brazilit.
 




____________
Galeria Shqiptare Direktoria Shqiptare Kërko në Google