Në festimet e Ditës së Pavarësisë në SHBA, përkrah librave të Kadaresë, në ankand dhe bluza e Igli Tares



Bluza me autografin e futbollistit të kombëtares Igli Tare është shitur më shtrenjtë se librat e shkrimtarit të madh shqiptar, Ismail Kadare, në një ankand të zhvilluar në Boston të SHBA-së nga komuniteti shqiptar që jeton atje me rastin e Ditës së Pavarësisë. Në ankandin e ashtuquajtur të heshtur është vënë në shitje, përkrah librave me autografin e shkrimtarit Ismail Kadare, edhe një bluzë e Igli Tares me autografin e kapitenit të kombëtares kuqezi. Katër libra të Kadarese, firmosur nga autori enkas për festimet e Pavarësisë në Boston, janë shitur për shuma të konsiderueshme në ankand, që ka qenë pjesë e mbrëmjes festive, zhvilluar në Boston. Libri "Përballë pasqyrës së një gruaje" ka rënë "pre" e 250 dollarëve. "Lulet e ftohta të marsit" është blerë për 100 dollarë, ndërsa veprat "Pasardhësi" dhe "Vajza e Agamemnonit" janë blerë përkatësisht për 55 dhe 50 dollarë secila. Ndërsa bluza me autografin e kapitenit të kombëtares shqiptare, Igli Tare, është shitur në ankand për 200 USD. Një tjetër objekt "i lakmueshëm" në ankandin e heshtur ka qenë edhe fotografia e Xhim Belushit me firmën e tij, e cila ka grumbulluar 50 dollarë, shumë herë më pak se bluza e futbollistit Igli Tare. Të gjitha janë blerë nga komuniteti shqiptar që ndodhet në Boston. Sipas bashkatdhetarit tonë në Boston, Alfred Lela, që ka qenë i pranishëm në festimet e zhvilluara dhe në ankandin "e heshtur", komuniteti shqiptar i Masaçusetsit ka festuar 93-vjetorin e Pavarësisë dhe 600-vjetorin e Skënderbeut, ku është zhvilluar edhe një darkë e madhe festive. Kjo ceremoni, e cila "pa dritë" tre vite me parë, mblodhi në sheshin para Bashkisë së Bostonit qindra shqiptarë, që festuan me muzikë dhe valle popullore shqiptare përvjetorin e radhës së Pavarësisë.
Veç kësaj, darka ka pasur detaje të tjera, siç ishte zhvillimi i ankandit të heshtur me objekte me ngjyrim shqiptar (mes të tjerave u vu në shitje edhe bluza me autografin e Tares) si dhe një kënd historik kushtuar Skënderbeut. Të ardhurat e grumbulluara në ankandin e heshtur, i cili ka qenë një nga pjesët e darkës së Pavarësisë, kanë shkuar në Fondin e Bursave për studentët shqiptarë, nismë e Organizatës Kombëtare Shqiptaro Amerikane.
 

Igli tare eshte nje futbollist i madh