Vogëlushi i lindur dje duket se ka preferuar të surprizojë prindërit, pasi është ngjizur gjatë kohës kur ata ishin ende në fejesë. Por jo vetëm kaq, edhe për lëvizjen e parë ai ka gjetur një moment shumë të veçantë, ditën kur Migena dhe Eltoni kryen ceremoninë martesore. “Mbaj mend që kam ndjerë një goditje si një impuls, atë çast isha duke u grimuar dhe vetëm pas një ore nisi dasma ime, ishte dhurata më e bukur e asaj dite”, thotë mes emocionesh nëna e foshnjës. Lajmin se do bëheshin me një fëmijë e kanë pritur me shumë lumturi si Migena dhe Eltoni, po të njëjtin gëzim kanë shprehur edhe familjarët e tyre. “Im shoq u çmend nga lumturia kur mësoi lajmin, po ashtu edhe gjyshërit ishin entuziastë që do të bëheshin me një nipçe të vogël”, shton 26-vjeçarja.

Shtatzënia
Vizitën e parë gjinekologjike Migena e ka bërë kur ishte 2 muajsh, kur edhe ka marrë lajmin se së shpejti do t’i jepte jetë një fëmije. Edhe pse ishte ende në fejesë, por njëkohësisht i duhet të mbarojë edhe vitin e fundit të universitetit, lajmi dhe më vonë kujdesi për fëmijën ka qenë në plan të parë. “Nuk u mërzita, edhe nëse do të ndodhte në çastin kur merr fëmijën në krahë pendohesh edhe për një çast trishtimi që mund të kesh pasur, ai ishte fëmija im, fryti i një dashurie të madhe mes meje dhe Eltonit, dhe kjo vetëm na lumturoi”, thotë Tuhuri. Ndryshe nga shumë prindër të tjerë, çifti tregon se që kur ishin të dashuruar edhe kur mësuan për foshnjën, dëshironin shumë të kishin një vajzë. “Eltoni thotë gjithmonë se është më mirë të kesh një vajzë, se janë shumë të ëmbla dhe të bukura, edhe unë si nënë doja vajzë”, shpjegon ajo. Përpos këtyre dëshirave, kur në 31 nëntor prindërit kanë mësuar se do të gëzoheshin me një djalë, nuk janë trishtuar, madje kjo ka qenë edhe arsyeja që kanë menduar për një fëmijë të dytë. “Nëse do të ishte vajzë, nuk do mendonim për fëmijë tjetër, ne u gëzuam me një djalë, tashmë na mbetet që pas disa vitesh të bëhemi edhe me një vajzë”, shprehet 26-vjeçarja Migena mes buzëqeshjesh.

Lindja
Lindja e fëmijës është bërë me operacion, kjo për shkak të peshës së tij prej 4.2 kilogramë, por edhe sepse ai ka qenë e rrethuar me kordon. Përpos këtyre, mjekët që janë kujdesur për ardhjen në jetë të djalit shprehen se gjendja e tij shëndetësore paraqitet shumë e mirë. Duke qenë nën efektin e anestezisë së pjesshme nëna e ka pasur të lehtë të ndjekë me sy çdo kujdes që i është bërë të voglit, por edhe të fiksojë orën e saktë të ardhjes së tij në jetë. “Ishte ora 10:15 kur i dëgjova zërin për herë të parë dhe kur ma vunë sipër gjoksit zemra filloi të më rrihte shumë shpejt, ishte kënaqësia më madhe për mua”, thotë Migena.

Emri
Djali do të quhet Livio. Ka qenë nipi i Eltonit ai ka që sugjeruar këtë alternativë, e cila ka marrë aprovimin e të dy prindërve. “Livio na u duk një emër shumë i bukur dhe i ëmbël, e kemi marrë këtë vendim disa muaj para se ai të vinte në jetë”, shton Tuhuri. Dhurata e parë që i është bërë foshnjës ka qenë një komplet bojë qielli nga gjyshja e tij, të cilin Migena ia ka veshur menjëherë pas ardhjes së tij në jetë. Ngjyrat që duket të jenë preferuar për garderobën e djalit janë e bardha, bojën qielli dhe e kuqja. Për sa i përket dhomës së gjumit prindërit kanë menduar që edhe për një vit foshnja të qëndrojë me ta dhe më pas të ketë dhomën e tij të veçantë.

Mjekët
Migena falënderon të gjithë mjekët dhe mamitë e spitalit universitar obstetrik gjinekologjik “Mbretëresha Geraldinë” që janë kujdesur për shëndetin e saj dhe vogëlushit. Një falënderim i veçantë shkon për mjekun Shkëlqim Balili dhe maminë Rudina Metani.

Nena
Sipas mjekëve që janë kujdesur për Migena Tuhurin, gjendja shëndetësore e nënës pas lindjes së fëmijës është shumë e mirë. Nisur nga ky fakt, ata i kanë rekomanduar vetëm marrjen e disa vitaminave dhe pushim absolut. Aktualisht nëna është studente në Universitetin Bujqësor dhe mendon t’i rikthehet studimeve pas disa ditësh.
 




____________

Lot Dielli