Vera që po vjen është paraprirë dhe me lançimin e modës së këtij sezoni. Modë që nuk presupozon vetëm veshjen, por edhe flokët, look-un tonë. Për këtë arsye, vetëm pak kohë më parë është organizuar në Bologna, (Itali) panairi i përvitshëm, ku parukierë nga e gjithë Evropa kanë diskutuar e performuar stilet e reja dhe tendencat e flokëve. Dhe pikërisht për të gjitha ato vajza që janë të apasionuara pas modës dhe që padyshim kanë nevojë për një guidë të modës së sivjetshme, “Bluetooth” ua ofron atë. Kemi ndaluar në një prej salloneve të bukurisë më të njohura në kryeqytet, për t’u servirur tendencat e këtij sezoni. Si duhet t’i mbajmë flokët? Cilat janë ngjyrat e përshtatshme të tyre? Cili është grimi që na këshillon moda sot për çdo ditë, për një eveniment, apo si duhet të jetë një nuse e stiluar dhe çfarë tualeti duhet të përdorë? Të gjitha këto do t’i mësoni më poshtë
Flokë të shkurtër, me ngjyra natyrale, ngjyrë platini ose të verdhë për evenimente, gruaja e viteve ‘800 në flokë dhe në grim, janë këto tendencat e modës së këtij viti. Klodi Mengri, drejtuese e sallonit të bukurisë “Clo”, ( që gjendet tek tek pallati i bar ish-Mjelmës në katin e IX) tregon se tendencat e kësaj vere bazohen në emrat më të mëdhenj të botës së modës sot.

Tendencat në verë
Mes luftës së flokëve të gjatë dhe atij të shkurtër, përsëri triumfon floku i gjatë, por gjithsesi më shumë se të gjitha vitet e tjera është rekomanduar floku i shkurtër “colo scoperto”, ku nënkuptohet qafa e nxjerrë. Është rikthyer në tendencat e ‘alta modës’ gruaja e viteve ‘800 ‘donna nobile’, ku kemi një fytyrë të bardhë gati pa vetulla, pa buzë dhe me flokët platin. “Pra është pikërisht gruaja e viteve ‘800, me flokët e verdha platin dhe në tonalitetet më të lehta, më normale, më njerëzore”, - shpjegon Mengri. Tek ngjyrat e flokëve me rekomandime të emrave më të mëdhenj të modës sot, është e këshillueshme flokët me goditjet e diellit. Domethënë, ndërthurje ngjyrash të tonaliteteve të njëjta me tone në lëvizje të vogla, që do të thotë, flokë natyralë sikundër dielli të lë atë lloj shije. Brunia nuk është absolutisht e rekomanduar për verën.

Tendencat në grim
Për sa i përket grimit janë shumë pastel, ku përdoret shumë e bardha në pjesët e brendshme të syrit dhe pasteli dhe shumë pak buzë të lyera. Ndërsa në darkë apo në evenimente, ekziston akoma ngjyra e buzëve me të kuqin e fortë dhe flokët e verdhë, por që në linjat e përgjithshme të verës është pasteli. Këshillohet tualet me ngjyra të buta dhe të qeshura. Shpeshherë edhe pak ekzibicion në lyerjen e ngjyrës së buzëve dhe syve. Një diferencë, një kombinim i keqkuptuar si të thuash një lejla me një të kuqe në buzë, apo një bojë qielli në sy dhe një rozë të fortë në buzë. “Këto lloj divergjencash janë shumë në modë. Unë mendoj se është shumë e bukur kjo, mjaft kreative”, - shton ajo.
Tendencat tek nuset
“Është interesante tek nuset që ende nuk arrin të aplikohet tek ne, ajo çka moda ofron sot, që është flokë gati i pakrehur, i lënë shumë i zakonshëm, kjo edhe në tendencën e përgjithshme, pasi e gjitha ndjek të gjithën. Edhe tek floku i përditshëm edhe tek flokët e nuses, është i njëjti stil që është në modë”, - shprehet Mengri. Tek nusja duhet patjetër që të shkojë me stilin e përgjithshëm të fustanit. Ajo që rekomandohet këtë vit është përsëri një fustan shumë romantik shumë i përpunuar dhe sigurisht tek flokët ka një tendencë të atyre viteve, por e sjellë në kuptimin kezhuëll, në kuptimin e të lënit pak më lirshëm, të lënë pak si të pakrehur, të lënë jo si shumë të përpunuar me përdredhje të thjeshta, të lënë në atë mënyrë, që të duket se nuk ke qenë tek parukierja. “Mua më pëlqen ky lloj modeli dhe është stili im. Po e gjej shumë pak të aplikueshëm tek njerëzit, shumë pak njerëz e kapin dhe e kuptojnë më shpejt. Edhe në qoftë se u pëlqen të veshin një fustan të atyre viteve dhe të atij stili, flokun e kanë lënë pak mbrapa. Duhet në fakt që të bashkohen, të ndjehet një e tëra. Sidomos nuset mendojnë, që atë ditë duhet të jenë në një perfeksion por këtë perfeksion e shohin vetëm në gjërat e forta, ndërkohë që perfektja është kur e gjitha është e shkrirë, kur e gjitha është e të njëjtit stil, e gjitha është e menduar mjaft mirë. Ajo përbën pastaj perfeksionin”, - vazhdon ajo.

Shqiptarët përballë modës
Sipas Mengrit, “shqiptarët tentojnë dhe iu pëlqen shumë ta ndjekin modën, por brenda kuadrit të vetë. Problemi është se imitojnë shumë njëri-tjetrin, janë akoma një stereotip”. Shpesh herë është dhe gabimi i atyre që ua servirin, gabim i parukiereve. Njerëzit kanë diçka tjetër në mendje dhe nuk arrihet të kapet nga parukieret nuk e gjejnë ta bëjnë të tyren një lloj modeli. Por që tendencat aplikohen. “Unë personalisht tek klientet e mia jam e kënaqur mund të them se një pjesë e mirë e tyre e kuptojnë tendencën e modës, e pranojnë atë, e aplikojnë. Unë në përgjithësi jam në të qenurin moderne, me stil por brenda një natyre dhe individualitetit të tyre dhe pa i nxjerrë nga personaliteti i tyre. Sepse kur njerëzit i shkëput nga personaliteti i tyre nuk më pëlqen më del diçka e paqenë dhe gjithmonë jam drejt asaj që të ketë një harmoni të personalitetit dhe llok-ut të personit”, vazhdon Mengri, e cila eksploron në këtë fushë qysh prej 17 vjetësh. Me një klientelë që varion nga ata që pëlqejnë të ndjekin tendencat e deri tek personazhet e njohur të skenës shqiptare, Klodi tregohet mjaft modeste duke mbajtur sekret emrin e secilit prej tyre dhe duke thënë se “Nuk mund të them se janë personazhe të njohur, ata që vijnë këtu, sepse janë personazhe të vërtetë, njerëz që unë jam e kënaqur që rri me ta. Por nuk dua t’i veçoj i dua të gjithë njësoj, i dua shumë fort”.

Sa kushton të qenurit modern?
Prerja 1.500 lekë
Krehja e flokut të mesëm 500 lekë
Krehja e flokut të gjatë 700 lekë
Stilimi dhe grimi i një nuseje
15 000 lekë

“Besoj se njerëzit me çmimet janë të kënaqur, ndërkohë që unë jo, sepse për shërbimin që bëj çmimet janë të lira. Çfarë ofroj është lirë, por ky është tregu”, - tregon Mengri. Sipas saj, “sot gjithsekush ka vendin e vet në treg dhe unë jam përpjekur dhe nuk mund të bëj ndryshe, që të përdor produktet më të mira që mund të jenë sot në treg. Për shembull në grim këmbëngul në atë që është cilësore, sepse është e vërtetë të ketë rëndësi e para që të ketë konsistencë dhe të ketë dhe cilësinë e duhur. Unë përdor markën “Mek” që është një nga më të mirat profesionale. Përdoret në sfilita është shumë e mirë dhe në përbërjet e tjera përpiqem të gjej më të mirën. Dhe kjo justifikon dhe arsyen përse them që çmimet janë të lira. Sepse duke përdorur produkte të mira kushtojnë”.
 




____________

Me pelqen kjo moda e fundit, por kurre nuk do ti lyeja floket shume bjonde dhe te vendosja buzkuq shume te flakte
 




____________
I Love 2 B Loved By U