Në garën e Saksenring është rikthyer dueli midis dy pilotëve italianë, Valentino Rosi dhe Marko Melandri

 Gara e Gjermanisë, vazhdon "mrekullia Rosi"

Endi Tufa


 Valentino Rosi ka triumfuar edhe në Saksenring të Gjermanisë, por në përfundim të garës ka bërë një gjest përulësie: "Ditën e shtunë e vura në dyshim motorin tim, por tashmë e ndiej veten në faj dhe kërkoj falje." Piloti italian i Yamahas ka arritur të fitojë Çmimin e Madh të Gjermanisë pas një dueli të ashpër me dy Honda, atë të Marko Melandrit dhe Niki Heidenit. Mënyra e tij e festimit këtë herë ka qenë e ndryshme. Ai ka veshur fanellën e përfaqësueses italiane të futbollit me numrin e Materacit. Pas këtij festimi, "Doktori" ka folur për këtë fundjavë. "Pas provave të ditës së shtunë, të them të drejtën e vura në dyshim motorin tim, për herë të parë që kur kam ardhur në këtë skuadër. Kisha shumë vështirësi gjatë provave zyrtare dhe nuk po arrija të kuptoja se ku qëndronte problemi. Megjithatë, pas kësaj gare të mrekullueshme, më duhet t'i kërkoj falje motorit dhe të falënderoj të gjithë grupin e mekanikëve që kanë punuar shumë për të arritur këtu." Më pas Valentino ka folur për parakalimin e mrekullueshëm që i bëri Marko Melandrit: "Ishte një betejë e ashpër mes të dyve dhe për këtë dua ta përgëzoj Markon. Unë dhe ai ishim ndër protagonistët kryesorë." Në konferencën për shtyp, një gazetar e ka pyetur edhe për fanellën e Materacit të përfaqësueses së Italisë. "Ma dhuroi ai dhe unë i thashë se nëse do të arrija të fitoja, do ta vishja në podium," ka përfunduar Rosi.
I kënaqur nga kjo garë ka qenë edhe Marko Melandri, i cili u rendit në vendin e dytë. "Fitorja e Valentinos ishte me shumë vlerë, pasi së bashku zhvilluam një duel të ashpër dhe shumë të bukur. Provova disa herë ta parakaloja, por ishte e vështirë, megjithatë jam i sigurt se të gjithë janë argëtuar, në mënyrë të veçantë ata që e kanë parë garën në televizor apo nëpër tribuna, ka thënë Marko Melandri, i cili në fund ka shtuar: "Nëse do të vazhdoj kështu çdo fundjavë, atëherë ju siguroj se shumë shpejt do ta parakaloj Valentinon. Për skuadrën time kjo ishte një fundjavë e mrekullueshme. E rifilluam gjithçka nga zeroja dhe ia dolëm mbanë të renditeshim në vendin e dytë."
Edhe Niki Heiden ka mbetur i kënaqur me vendin e tretë në garën e Gjermanisë. "Në fillim motori im ishte në gjendje shumë të mirë, por më pas gjërat ndryshuan. Rosi dhe Melandri përpara ishin shumë agresivë dhe unë nuk kisha asnjë mundësi të përballesha me ta, edhe pse dhashë maksimumin. Mund të arrija një rezultat edhe më të mirë, sepse motori ishte kompetitiv, por e përsëris edhe një herë se Rosi me Melandrin ishin të pakapshëm," ka përfunduar Niki Heiden.

Klasi 250cc
Takahashi arrin fitoren e 200 të për Hondën
Ka qenë piloti japonez i Hondës, Juki Takahashi, ai që ka fituar Çmimin e Madh të Gjermanisë për klasin 250cc. Në të vërtetë, kjo ka qenë një fitore e veçantë për skuadrën e tij Honda, e cila me këtë të Gjermanisë regjistroi fitoren e 200 të në klasin 250cc. "Një pilot me mbiemrin Takahashi i kishte dhuruar Hondës fitoren e parë në këtë kategori dhe ndoshta ishte radha ime të regjistroja fitoren e 200 të për këtë skuadër. Ndihem shumë krenar për këtë sukses dhe i nderuar nga skuadra," ka thënë piloti japonez, Juki Takahashi, në përfundim të garës. "Për sa i përket parakalimit të De Anxhelisit në fundin e garë, mund të them se kisha disa xhiro që e studioja. Për më shumë, në xhirot e fundit u duk se ai kishte probleme dhe unë ia dola mbanë ta parakaloja," ka përfunduar Takahashi.

Klasi 125cc
Pasini, fitore mes polemikave
Matia Pasini ka fituar garën e Gjermanisë për klasin 125cc, edhe pse më pas ka pasur një polemikë me Alvaro Bautistën. Spanjolli, shoku i tij i skuadrës tek Aprilia MVA, e akuzoi se e kishte penguar në mënyrë të parregullt në fundin e garës. "Unë ia zura rrugën pasi edhe ai, një xhiro më parë, ma zuri shumë keq trajektoren. Nëse të tjerët janë korrektë me mua, edhe unë jam me ata, por nëse më bëjnë gjëra të tilla, edhe unë ia kthej me të njëjtën monedhë," ka thënë Pasini. Më pas ai ka folur për garën. "Ishte një garë e bukur dhe e vështirë, por dhashë maksimumin tim deri në finish. Jam i kënaqur që gjërat shkuan kaq mirë për mua," ka përfunduar italiani, Matia Pasini.
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------