Organizatorët e botërorit, Gjermania, do të presin Kosta Rikën në ndeshjen e parë, e cila do të jetë dhe ajo që do të hapë zyrtarisht më 9 qershor në Mynih këtë kampionat botëror 2006. Më pas, ndeshja e tyre e dytë do të jetë ajo me Poloninë pas 5 ditësh në Dortmund. Do të merren masa të mëdha sigurie nga policia gjermane, për të shmangur çdo incident midis huliganëve polakë dhe tifozerisë gjermane. Më pas, Gjermania do të vazhdojë ndeshjet e saj të grupit A, me përballjen e 20 qershorit në Berlin kundër Ekuadorit.
Kampionët e botës në fuqi, Brazili, do të fillojnë të mbrojnë trofeun e tyre në ndeshjen e parë ndaj Kroacisë në Berlin, ndërsa më pas do t'i duhet të përballen më 12 qershor me Japoninë, e cila udhëhiqet nga ish ylli i futbollit brazilian, Ziko. Ndeshja e tyre e fundit do të jetë ajo kundër Australisë, që do të përcaktojë dhe skuadrat e kualifikuara të grupit F. Australia ka arritur të kualifikohet për në finalet e këtij botërori, për herë të parë në historinë e saj.
Pa dyshim që grupi i hekurt cilësohet ai i Argjentinës, kur përveç kësaj skuadre përfshihet edhe Holanda, Serbi&Mali i Zi dhe Bregu i Fildishtë. Pra janë pikërisht këto skuadra që përbëjnë grupin C. Holanda ka arritur në Botërorin e vitit 1974 deri në finale, ku është përballur dhe është mundur nga Gjermania. Pas katër vitesh përballet po në finale me Argjentinën, ku sërish është mundur. Përveç Argjentinës, atyre do t'u duhet të përballen me Bregun e Fildishtë dhe Serbi&Mali i Zi, dy skuadra që konsiderohen si surprizat e këtij kampionati.
Trajnerit të përfaqësueses së Anglisë, Sven Goran Erikson, do t'i duhet të përballet me përfaqësuesen e vendit të tij, Suedinë, në grupin B. Dy skuadrat e tjera që plotësojnë këtë grup, janë Paraguaji dhe Trinidad&Tabago. Një pjesë e mirë e kësaj të fundit luan në kampionatin anglez, një ndër ta është edhe Duajt Jork, i cili në të vërtetë është më i njohuri. Anglia do të përballet me Paraguajin në ndeshjen e saj të parë në Frankfurt më 10 qershor, përpara se të ndeshet me Trinidadin në Nurenberg dhe më 15 qershor me Suedinë.
Franca dhe Zvicra kanë rënë në të njëjtin grup. Ata do të përballen që në ndeshjen e parë në Shtutgart, më 13 qershor. Më pas, Franca do të përballet me Korenë e Jugut dhe afrikanët e Togos më 23 qershor. Ukraina, e cila është kualifikuar në këtë sezon për herë të parë, ndodhet në të njëjtin grup me Spanjën, Tunizinë dhe Arabinë Saudite. Italia, SHBA ja, Republika Çeke dhe Gana ndodhen në grupin E. Ndërkohë që në grupin D ndodhet Portugalia, Angola, Meksika dhe Irani.

Spanja: Kemi qenë me fat
Sulmuesi i kombëtares spanjolle, Fernando Torres, shpreson se Spanja do të ketë mësuar nga gabimet e së kaluarës dhe do t'ia dalë mbanë të kalojë nga grupi i saj ku bëjnë pjesë edhe Ukraina, Arabia Saudite dhe Tunizia. "Në letër duket një grup i lehtë, por duhet të kemi kujdes, sepse edhe në të kaluarën kemi vuajtur prej nënvlerësimit. Të gjitha ndeshjet duhen marrë me impenjimin maksimal, për të evituar surpriza të pakëndshme. Shpresoj të mos përsërisim gabimet e së kaluarës." Ndërsa mesfushori Visente shtoi: "Kemi qenë me fat. Jam i kënaqur me këtë grup. Jemi kualifikuar në botëror falë "play off" it, por kam besim se skuadra do të bëjë diçka të rëndësishme në Gjermani." Ndërkohë, një tjetër mesfushor, Hoakin, u shpreh në lidhje me shortin: "Eshtë një grup nga i cili mund të kualifikohemi pa probleme, në rast se tregojmë kujdesin e duhur. U druhesha disa skuadrave, të cilat fatmirësisht i evituam. Mund të fitojmë ndaj të tre kundërshtarëve që do të kemi përballë."

Devid Bekham: Jemi favoritë!
Kapiteni i Anglisë, Devid Bekham, beson se skuadra e tij i ka të gjitha mundësitë të fitojë Kupën e Botës. Kjo edhe në bazë të shortit, i cili i ka vënë "luanët" në të njëjtin grup me Trinidadin, Suedinë dhe Paraguajin. "Nëse punojmë shumë dhe luajmë me mundësitë tona, kemi shanset të festojmë në Gjermani, tha kapiteni i Anglisë. - Duke parë shortin e botërorit, u entuziazmova shumë dhe po pres me padurim që kjo veprimtari të fillojë. Do të ndeshemi me Suedinë, një kundërshtar tradicional, duke parë që kemi trajnerin suedez dhe shumë prej tyre luajnë në Premier Ligë. Më pas do të kem përballë edhe një shok të vjetër, Jorkun, me Trinidadin. Kam shumë kujtime të bukura me të, por në botëror më duhet ta mund. Paraguaj? E njoh pak. Do të thotë që do të informohem për këtë skuadër gjatë kohës që do të pëgatitemi për kampionatin botëror." Më pas, mesfushori i Realit tregon mënyrën se si fitohet në një veprimtari të tillë: "Me futbollin e vjetër është e vështirë të fitohet. Duhet të tregojmë hapat përpara që kemi bërë kohët e fundit dhe t'i tregojmë të gjithë botës se jemi favoritë."

Sipas trajnerit të përfaqësueses gjermane, rivalët e grupit nuk mund të nënvleftësohen
Klinsman: Shorti, gjysma e së keqes
Trajneri i Gjermanisë, Jurgen Klinsman, është shprehur se gjërat mund të kishin shkuar edhe më keq për skuadrën e tij në shortin e djeshëm. Organizatorët do të kenë në grupin A: Kosta Rikën, Poloninë dhe Ekuadorin. "Gjërat mund të kishin shkuar më keq. Ne jemi të kënaqur, edhe pse mendoj se ky grup është i ekuilibruar, ka thënë Klinsmani. Çdo skuadër mund të konsiderohet e vështirë, këtë e dinë të gjithë. Asnjëri nga rivalët nuk mund të nënvleftësohet. Secila ndeshje ka historinë e saj, megjithatë e përsëris edhe një herë se gjërat mund të shkonin më keq. Ekuadori do të jetë një kundërshtar i vështirë. Ata kanë arritur të mundin Brazilin në turin kualifikues. Kosta Rika ndodhet në vendin e tretë pas SHBA së dhe Meksikës. Natyrisht, nuk mund të them se janë më pak të fortë polakët. Ata kanë arritur të zhvillojnë një lojë shumë të mirë në fazën me grupe, duhet të kujtojmë se luanin në të njëjtin grup me Anglinë. Megjithëse konsiderohen të gjitha ndeshje të forta, ne do të punojmë shumë për t'i dhënë publikut tonë atë që meriton dhe kërkon. Kemi një skuadër të re dhe pa dyshim që na duhet shumë mbështetja e tifozerisë." Sipas Klinsmanit, Gjermania tashmë do të mendojë të luajë më shumë me skuadrat europiane në miqësore, përpara fillimit të kampionatit botëror. Gjithsesi, kjo gjë nuk e përjashton faktin se mund të luajnë edhe në Amerikën Jugore apo Qendrore. Po sipas tij, grupi C, ku ndodhet Argjentina, Bregu i Fildishtë dhe Holanda së bashku me Serbi-Mali i Zi, duket se është grupi më i fortë.

Lipi: Edhe i kënaqur, edhe i mërzitur
"Na ka rënë një grup shumë i vështirë, ku përfshihen skuadra të forta si Republika Çeke, ka thënë ish lojtari i përfaqësueses italiane, Xhanluka Viali, menjëherë pas hedhjes së shortit. - Do të përballemi me një fillim të vështirë në këtë kampionat botëror. Do të na duhet të jemi në formë që nga ndeshja e parë, përndryshe do të rikthehemi në "shtëpi" shumë shpejt," përfunduar ish sulmuesi "axurr". Ndërkohë, një tjetër ish lojtar i përfaqësueses italiane, Paolo Rosi, ka deklaruar: "Gjithsesi, mund të them se Republika Çeke dhe ne jemi skuadrat më të forta në grup. Gana është një skuadër që nuk e njohim shumë mirë, ndërkohë që Amerika ka një skuadër solide. Nuk mund të themi se na kanë rënë skuadrat më të forta, megjithatë kjo nuk do të thotë se do ta kemi të lehtë. Në përgjithësi, duke njohur aftësitë e përfaqësueses sonë, besoj se do t'ia dalim me sukses nga kjo fazë e parë në grupe," ka përfunduar Rosi. Ndërsa trajneri i përfaqësueses italiane ka thënë: "Jam i kënaqur, por edhe i mërzitur. Eshtë një grup i vështirë, por të gjitha skuadrat e këtij botërori duheshin pasur kujdes. Mund të themi se kemi dy ndeshje me Çekinë dhe SHBA-në, të cilat ndodhen më lart se ne në renditjen e FIFA-s, megjithëse ky nuk është një problem. Skuadra po përmirësohet dhe do të jetë e gatshme për botërorin e ardhshëm. Italia nuk ndihet inferiore ndaj askujt."

Parreira: Do të jetë luftë nervash
Brazili, skuadra kampione e botës, do të bëjë pjesë në grupin F së bashku me Australinë, Japoninë dhe Kroacinë. Sipas trajnerit të "Selesaos", në këtë grup pritet një luftë e fortë nervash: "Në terma teknik, nuk është një grup i fortë, por nëse synojmë kualifikimin, duhet të jemi të fortë psikologjikisht. Do të jetë një luftë nervash. Mendoj se të trija skuadrat kanë nivel më të ulët se i yni, por të trija mund të pretendojnë të vazhdojnë më tej. Australia na ka krijuar probleme edhe në Kupën e Konfederatave. Futbollistët e saj më të mirë luajnë në Europë, ndërsa me Japoninë punon një njohës i vjetër i skuadrës sonë, Ziko. Kroacia? Fakti që luhet në Europë, u jep atyre mundësinë të pretendojnë për në 1/8 t."

Bregu i Fildishtë: Jemi në grupin "e hekurt"
Henri Mishel, trajneri i Bregut të Fildishtë, tha se grupi në të cilin do të bëjë pjesë skuadra e tij, e përbërë nga Holanda, Argjentina dhe Serbia, është grupi më i fortë i Gjermanisë 2006. Misheli tha për gazetarët: "Unë mendoj se është grupi më i fortë. Na presin ndeshje të vështira dhe për t'ia dalë mbanë, na duhet të luajmë një futboll me nivel. Argjentina dihet se kush është dhe Holanda është një nga skuadrat europiane që luan futbollin më të bukur. Bregu i Fildishtë do të luajë ndaj Argjentinës në ndeshjen e parë të saj, në një Kupë Bote."

Ekuadori shpreson te kualifikimi
Mbrojtësi i Ekuadorit, Ulies de la Kruz, e përshkroi grupin në të cilin do të bëj pjesë skuadra e tij, si të vështirë, por jo të pamundur për t'u kualifikuar. Ekuadori bën pjesë në grupin A së bashku me Gjermaninë, Kosta Rikën dhe Poloninë. "Eshtë një grup i vështirë, por që nuk na e heq mundësinë për t'u kualifikuar, tha De la Kruz për gazetarët. - Me Gjermaninë vendëse do të jetë një përballje e vështirë, ndërsa me dy skuadrat e tjera mendoj se mund të synojmë fitoren."
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------