Lexohet pas 13 vjetësh pretenca ndaj pjesëtarëve të organizatës “Hakmarrja për drejtësi”. Prokuroria iu ka dhënë fund hetimeve ditën e djeshme, kur ka paraqitur edhe konkluzionet përfundimtare në Gjykatën e Krimeve të Rënda. Sipas konkluzioneve të prokurorisë, organi i akuzës ka kërkuar dënimin e 10 të pandehurve, nga të cilët, për tre kërkohet dënim i përjetshëm, ndërsa për 7 të tjerë kërkohen 143 vjet burg.


Konkluzionet


Prokuroria e Krimeve të Rënda ka lexuar ditën e djeshme për 4 orë me radhë gjithë dosjen dhe akuzat në ngarkim të Orik Shytit, Altin Arapit, Gentian Cakës, Nikolin Novruzajt, Roland Shytit, Leart Shytit, Kreshnik Spahiut, Pasho Novruzajt, Gëzim Gjonit dhe Dritan Hate, të cilët akuzohen si pjesëtarë të bandës kriminale “Hakmarrja për drejtësi”. Prokurorët e kësaj çështjeje, Eneid Nakuçi dhe Genci Qano, kanë radhitur akuzat që rëndojnë ndaj tyre, si vrasja e drejtorit të përgjithshëm të burgjeve, Bujar Kaloshi, vrasja e Genci Sinës, shoferit të ish-kryeprokurorit Theodhori Sollaku, vjedhja e “VEFA”-s dhe “Gjallicës”, rrëmbimi i një të mituri në qytetin e Vlorës, akti terrorist pranë “VEFA”-s në Tiranë dhe një sërë vrasjesh dhe grabitjesh të tjera. Në përfundim të leximit të dosjes voluminoze të hetimeve të prokurorisë, përfaqësuesit e organit të akuzës kanë kërkuar për kreun e kësaj organizate kriminale, Orik Shyti, ndaj të cilit rëndojnë plot 17 akuza, dënimin e tij me 3 burgime të përjetshme, por që në bashkim të dënimeve ai është dënuar me një burgim të përjetshëm. Me nga dy burgime të përjetshme është kërkuar edhe dënimi i dy prej krerëve kryesorë pas Orik Shytit në organizatën “Hakmarrja për drejtësi”, Altin Arapi dhe Gentian Çaka, të cilët në bashkim të dy dënimeve të tyre mund të dënohen me burgim të përjetshëm. Ndërkohë, organi i akuzës është treguar mjaft i ashpër edhe me të akuzuarit e tjerë si pjesëtarë të kësaj organizate, ku ka kërkuar dënimin me nga 25 vjet burg për Roland dhe Lerat Shytin, ndërsa për Kreshnik Spahiun dhe Dritan Haten është kërkuar dënimi respektivisht 22 dhe 21 vjet burg. Ndërkohë, për dy vëllezërit Nikolin Novruzi dhe Pasho Novruzaj, të cilët gjenden si azilantë në Holandë, organi i akuzës ka kërkuar dënimin e tyre me 24 dhe 21 vjet burg, ndërsa për të pandehurin tjetër, Gëzim Gjoni, prokuroria ka kërkuar dënimin e tij me 8 vjet burg.


Organizata


“Hakmarrja për drejtësi”, e cila cilësohet si një nga organizatat më të fuqishme kriminale që kanë ekzistuar në vendin tonë mendohet se i ka fillesat e saj që prej vitit 1992. Mbi këtë organizatë rëndojnë një numër i madh veprash kriminale, ndërsa në bankën e të akuzuarve ndodhen 10 të dyshuar, nga të cilët asnjë nuk ndodhet në qeli. Kështu, Altin Arapi, mbi të cilin rëndojnë plot 24 akuza, më e fundit ajo e vrasjes së Genci Sinës, shoferit të familjes së ish-kryeprokurorit Theodhori Sollaku, ka fituar azil politik në Belgjikë, vend në të cilin edhe u arrestua gjatë vitit 2004. Ndërkohë, edhe dy prej krerëve kryesorë të kësaj organizate, Orik Shyti dhe Kreshnik Spahiu kanë fituar strehim politik në Zvicër, vend në të cilin u prangosën më 6 shkurt 2004, ndërsa dy vëllezërit Nikolin e Pasho Novruzaj kanë fituar azil politik në Holandë. Dy prej të pandehurve, Gëzim Gjoni dhe Dritan Hate, të cilët u arrestuan pas vitit 2001, tashmë kanë fituar lirinë, pasi kanë tejkaluar afatet e paraburgimit, ndërsa Roland e Leart Shyti, si dhe Gentian Caka janë shpallur në kërkim ndërkombëtar.



Pretenca


Altin Arapi - burg të përjetshëm

Orik Shyti - burg të përjetshëm

Gentian Caka - burg të përjetshëm

Nikolin Novruzi - 24 vjet burg

Roland Shyti - 25 vjet burg

Leart Shyti - 22 vjet burg

Kreshnik Spahiu - 22 vjet burg

Pasho Novruzaj - 21 vjet burg

Dritan Hate - 21 vjet burg

Gëzim Gjoni - 8 vjet burg


Disa prej krimeve për të cilat akuzohen të pandehurit përgjatë viteve 1992-1996


1- Vrasja e Bujar Kaloshit 26.07.1996

2- Vrasja e Pirro Koninit 12.04.1995

3- Vrasja e S. Jatës 15.12.1993

4- Rrëmbimi i Erion Nushit 30.10.1995

5- Autobomba te “VEFA” në Tiranë 26.02.1996

6- Vjedhja e arkës së kursimeve të lagjes nr.8 02.06.1992

7- Arka e zhdoganimit 09.12.1992

8- Banka e Tiranës 29.01.1993

9- Vjedhja e pistoletës së Demir Lamit 30.06.1993

10- Vjedhja e “Swiss Air” 17.12.1993

11- Vjedhja e dytë e “Swiss Air” 17.06.1994

12- Vjedhja e “Malev” 29.07.1994

13- Vjedhja e “Shkumbin Petrol” 16.08.1994

14- Vjedhja e IAP 12.10.1994

15- Vjedhja e IAP 07.12.1994

16- Vjedhja e “Gjallicës” Vlorë 13.12.1994

17- Vjedhja e argjendarisë “Agron” 14.01.1995

18- Vjedhja e Bankës së Vlorës 20.01.1995

19- Vjedhja e “INSIG”-ut 21.02.1995

20- Vjedhja e “Adria”-s 01.03.1995

21- Vjedhja e “Gas Butan” 03.03.1995

22- Vjedhja e arkës së sfungjerit 15.06.1995

23- Vjedhja e “VEFA”-s në Vlorë 21.01.1996

24- Vjedhja e Bankës së Vlorës 18.04.1996
 




____________
Direktoria , Galeria


Piracy is a crime! So, am I a criminal?