Vrasja ka ndodhur mëngjesin e djeshëm, ende pa vajtur ora 09.00, rreth 15 metra larg rrugës nacionale. Si ditë e hënë, rrugët e lagjes Kombinat ishin të mbipopulluara, e një pjesë e madhe e banorëve kanë parë me sy kufomën e 38-vjeçarit Kusi, të shtrirë pa jetë pranë kangjellave të një magazine. Sipas policisë, viktima ka qenë person me precedentë penalë, i skeduar për të paktën dy vrasje ndërsa ngjarja e djeshme e ka zanafillën 12-vjet më parë.

Dëshmitarë në vendngjarje pohuan dje për “Shekullin” se krismat nuk ishin në breshëri, por tepër të matura. Kjo sipas tyre shpjegohet me faktin se atentatori synonte që të gjithë plumbat të përfundonin në trupin e viktimës. Pasi ka parë të vdekur Durim Kusin, Avdyli është larguar pa nxitim nga vendi i ngjarjes. Pasi e kanë parë me armë në dorë, efektivët e policisë i janë hedhur përsipër, duke e çarmatosur dhe duke i vënë prangat. Sipas policisë, që në momentet e para të hetimeve, 38-vjeçari ka pranuar autorësinë e vrasjes dhe motivet pse e ka kryer atë. Ai u ka kërkuar oficerëve të policisë që të mbarojnë sa më parë procedurat hetimore, pasi gjithçka e ka kryer me paramendim.

Sipas njoftimit zyrtar të policisë së Tiranës, Avdyli ka kundërshtuar me armë forcat e policisë, po burime nga vendi i ngjarjes vunë në dukje se ky i fundit ia kishte dorëzuar armën policit të parë që i kishte dalë përpara. Në momentin e ndalimit atij i është sekuestruar në cilësinë e provës materiale arma e krimit, një automatik model 56, dy karikatorë me fishekë dhe një çantë dore, që sipas policisë ka shërbyer për fshehjen e armës së krimit gjatë rrugëtimit të tij nga Shijaku për në kryeqytet.

Sipas policisë së Tiranës, vrasja e djeshme është zbardhur brenda pak orësh. Viktima Durim Kusi është akuzuar për vrasjen e vëllait të autorit, Dritan Avdylit në vitin 1995, por ka qëndruar vetëm pak muaj në burg. Prokuroria nuk mundi të vërtetonte akuzat për të, e duke përfituar edhe nga një raport mjekësor, Durim Kusi ishte liruar nga burgu. E ndërsa kjo histori ishte lënë në harresë për shkak të kohës së gjatë, nuk ka ndodhur e njëjta gjë me autorin e krimit të djeshëm, Shkëlqim Avdylin.

Ai kishte pak kohë që kishte mbaruar së vuajturi një dënim në Itali. Para shtatë muajsh ai është kthyer në Shqipëri, ndërsa bëhet me dije se kishte dërguar disa herë mesazhe kërcënuese në adresë të Durim Kusit. Që nga koha që ishte në burg, Avdyli ishte shprehur se nuk kishte për të falur gjakun e të vëllait, hakmarrje të cilën e realizoi paraditen e djeshme në lagjen “Kombinat” të Tiranës, duke ekzekutuar Durim Kusin.

Dy familjet ishin në hasmëri prej 12 vitesh. Durim Kusi lëvizte gjithnjë me të afërm apo djem të lagjes

Konflikti Avdyli-Kusi, për një sipërfaqe toke në Shijak

Konflikti mes dy familjeve Avdyli e Kusi ka lindur në vitet e para të pluralizmit, kur të dyja palët kanë pretenduar një sipërfaqe të madhe toke që ndodhej disa kilometra larg qytetit të Vorës, në drejtim të rrugës së Shijkut.

Pas shumë konfliktesh, Durim Kusi atëherë 26-vjeçar, vret me armë zjarri Dritan Avdylin, vëllanë e vogël të Shkëlqimit. Asokohe, policia e mbërritur në vendngjarje ka mundur të arrestojë Durim Kusin, i cili ndodhej në vendngjarje por edhe pas disa muajsh paraburgim, prokuroria nuk ka mundur dot ta vërtetojë fajësinë e tij dhe në këtë mënyrë Kusi ka mundur t’i largohet qelisë në sajë të një raporti mjeko-ligjor të siguruar nga avokatët e tij. Pothuajse i gjithë Kombinati e njihte Durim Kusin, vendqëndrimin e tij dhe të personave që e shoqëronin. Më së shumti atë e gjeje në disa lokale pranë rrugës “Llambi Bonata” në Kombinat. Të njëjtët dëshmitarë shtuan për gazetën se Durim Kusi asnjëherë nuk lëvizte i pashoqëruar. Në krah të tij ndodheshin gjithnjë djem 20-22 vjeçarë, të cilët ndiqnin çdo lëvizje të tij, por dhe pjesëtarë të fisit tepër të madh.

Ngjarja e djeshme i ka shokuar të gjithë këta të fundit që hynin e dilnin vazhdimisht në shtëpinë e tij dhe që kishin mbushur gjithë oborrin e pallatit dykatësh ku banonte viktima. Policia pas hetimeve paraprake bëri të ditur se viktima Kusi ishte dhe person me precedentë penalë. Ai dyshohet se përveç vrasjes së Dritan Avdylit, në 1995 është dhe autori i një vrasjeje të ndodhur më 1997 ku ka ngelur i vdekur shtetasi Artur Sula. Edhe për këtë vrasje ai është arrestuar në flagrancë, por më pas është liruar për mungesë provash. Hetimet e drejtuara nga prokurorët e gatshëm dhe nga dëshmia e Shkëlqim Avdylit i kanë mëshuar faktit se vrasja ka ndodhur si pasojë e një hakmarrjeje të pastër, të shkaktuar nga motive pronësie.

VRASJA

Durim Kusi, 38-vjeç, është ekzekutuar paraditen e djeshme në të dalë të pallatit të tij. Viktima banonte në lagjen Kombinat të Tiranës, ndërsa është akuzuar për dy vrasje të ndodhura në vitin 1995 dhe 1997

AUTORI

Shkëlqim Avdyli, autori i vrasjes së Kusit, është arrestuar pak minuta pas krimit. Ai kishte udhëtuar në orët e para të mëngjesit nga Shijaku në drejtim të Tiranës, me një çantë me automatik, për të realizuar krimin

MOTIVI

Hakmarrja mendohet se është motivi i vrasjes së djeshme në Kombinat. Viktima është akuzuar për vrasjen e vëllait të Shkëlqim Avdylit në vitin 1995, ngjarje kjo e ndodhur pas një konflikti disavjeçar për pronësi
 




____________
Direktoria , Galeria


Piracy is a crime! So, am I a criminal?