Zemërimi i kreut të Partisë Demokristiane duket se ka arritur kulmin e tij. Në intervistën e botuar në gazetën “Tirana Observer”, Nard Ndoka është shprehur pa rezerva se muaji i mjaltit me Berishën ka mbaruar. Madje ai ka guxuar edhe më shumë kur ka akuzuar qeverinë aktuale, e cila drejtohet nga qarqe islamiste. Por alarmi Ndokës ka ndonjë bazë reale mbi të cilën mbështetet apo janë një ftesë-thirrje për t’u afruar me bllokun e opozitës? I ndjerë tërësisht i përjashtuar pas ndryshimeve të fundit në qeveri, Ndoka po kërkon një mbështetje për partinë e tij të vogël, pasi tashmë e ka kuptuar mjaft mirë se kreu i mazhorancës nuk do të jetë më aleat në zgjedhjet e vitit të ardhshëm.

Mbijetesa për këtë parti është e rëndësishme, ndaj edhe Ndoka ka filluar tratativat e tij në tregun e politikës për të gjetur grupin apo aleatët e tij, të cilët do t’i japin fund agonisë që ka përfshirë këtë parti, e copëzuar në fillim  nga konfliktet e brendshme dhe së fundi nga ato me Berishën, i cili nuk i rezervoi as edhe një karrige në kabinetin e tij qeveritar. Ky refuzim i kryeministrit tregoi qartë se nuk pranon që në krah të tij të ketë një aleat si Ndoka, i cili shkaktoi mjaft pakënaqësi në sistemin shëndetësor, duke u akuzuar shpesh edhe për militantizëm.

Por në një farë mënyre kjo përkoi njëkohësisht  edhe me kërkesat e vazhdueshme të republikanëve, të cilët këmbëngulën deri me kërcënime për  vendin e humbur në qeveri pas shkarkimit të Fatmir Mediut nga ministër i Mbrojtjes. Ndaj edhe Berisha duke u gjendur në këtë mëdyshje ka preferuar më tepër që të favorizojë aleatët e tij të vjetër, duke sakrifikuar në këtë mënyrë demokristianët e Ndokës, mbi aleancën e të cilit ka vendosur të mos besojë.

Kështu që edhe reagimet e fundit të Nard Ndokës dhe akuzat e tij për islamizim nuk mund të konsiderohen tërësisht të vërteta. Ato tingëllojnë më shumë si një ftesë lëshuar opozitës, e cila nga kampi i saj do të ishte e kënaqur që të shohë shkëputjen e një pjese të mazhorance, paçka se ajo nuk është më e rëndësishmja. Mbetet për t’u parë se kujt force politike do t’i aneksohen demokristianët e Nard Ndokës, i cili është shprehur qartë se do të preferonte Partinë Socialiste gjatë intervistës së tij.

Por a do të ishte gati PS që të pranojë një aleat si PDK, e cila mbetet ende e pa stabilizuar? Përvoja disa vjeçare në krye të Ministrisë së Shëndetësisë e paraqiti jo të aftë dhe kjo shënoi një minus në karrierën e tij. Duke marrë në konsideratë edhe konfliktet e fundit Ndoka-Gurakuqi, kjo parti nuk mund të jetë kaq stabël dhe e besueshme në sytë e atyre që nesër do të mundë të vendosin pranimin e tij si aleat. Kështu që teza e qarqeve të islamiste në qeveri mund të lexohet si një përpjekje e re për t’u rilançuar edhe një herë tjetër në politikën e re  të demokristianëve, të cilët tani u duhet të eksplorojnë horizonte të reja, përpara se të rikonfirmohet edhe njëherë si një parti që do të ketë peshën e saj në zgjedhjet e vitit të ardhshëm.
 




____________
Direktoria , Galeria


Piracy is a crime! So, am I a criminal?