Italia, e cila do të përballet me SHBA-në në ndeshjen e dytë të fazës me grupe, e ka vlerësuar shumë kundërshtarin. Italianët arritën të fitojnë në ndeshjen e parë me rezultatin 2-0, ndaj Ganës, ndërkohë që amerikanët u mundën 3-0 nga skuadra e Çekisë. "Ne nuk mund ta nënvlerësojmë rëndësinë e kësaj ndeshjeje. Për SHBA-në, kjo do të jetë një ndeshje për jetë a vdekje, duke qenë se u mundën në përballjen e parë dhe sërish një rezultat negativ do të thoshte eliminim për ta. Gjithsesi, ne duhet të jemi të përqendruar dhe do të futemi në fushën e lojës me synimin e vetëm fitoren. Ata janë një skuadër që e mbajnë shumë topin, ndërkohë ne jemi një ekip që dimë t'i vëmë ata në vështirësi," - tha sulmuesi Alberto Xhilardino. Ky i fundit ishte një nga zhgënjimet e Italisë në ndeshjen me Ganën, gjithsesi ai pritet të vazhdojë të ruajë vendin në formacion, edhe pse Vinçenco Iakuinta tregoi një formë të mirë, kur shënoi edhe golin e dytë në përballjen ndaj ekipit afrikan. Ndryshimi i vetëm në skuadrën e Marçelo Lipit pritet të jetë në krahun e djathtë të mbrojtjes, ku Xhanluka Zambrota do të luajë në vendin e Kristian Zakardos. SHBA-ja, e cila arriti çerekfinalet në botërorin e kaluar, synon të paktën një barazim, në mënyrë që të shpresojë për ndeshjen e tretë. "Ne nuk e kemi përfunduar akoma aventurën tonë. Nuk do të ndodhë më një humbje 3-0. E kemi lënë pas atë faqe dhe tani duam të fillojmë një të re. Ndeshja ndaj Italisë është shumë e rëndësishme dhe ne do të japim maksimumin tonë," - tha trajneri i SHBA-së, Arena. Për sa u përket ndryshimeve në formacion, ky i fundit pritet të fusë që nga minuta e parë sulmuesin Edi Xhonson dhe mesfushorin Xhon O'Brajen, të cilët luajtën si zëvendësues në përballjen me Çekinë. Edhe nga Markus Bislei pritet që ta fillojë ndeshjen që nga minuta e parë. Ndërkohë, skuadra e SHBA-së duket se ka edhe një arsye më shumë për të kërkuar fitoren. Ushtarëve amerikanë u është dhënë shansi për të parë botërorin, ndaj kombëtarja e tyre nuk do që të zhgënjejë. "Ne po përfaqësojmë vendim tonë. E dimë që ata djem po na ndjekin dhe duam që ne të fitojmë," - tha sulmuesi Xhonson. Por duket se jo vetëm SHBA-ja ka ushtarët e vet në Irak. Edhe italianët e kanë përmendur një fakt të tillë dhe ka qenë pikërisht sulmuesi Alberto Xhilardino ai që ka folur: "Ne e dimë që na shikojnë të gjithë bashkatdhetarët tanë, përfshirë ushtarët që janë në Irak. Mendoj se ata rrezikojnë jetën për vendin, ndaj dhe ne duhet t'i nderojmë ata sa më shumë. Detyra e një futbollisti për t'ia arritur këtij qëllimi, është që të fitojë dhe t'u dhurojë kënaqësi atyre," - tha Xhilardino.

Skuadrat:
Italia (4 3 1 2): 1 Xh.Bufon, 19 Xh.Zambrota, 13 A.Nesta, 5 F.Kanavaro, 3 F.Groso; D.De Rosi, 21 A.Pirlo, 20 S.Perrota, 10 F.Toti, 9 L.Toni, 11 A.Xhilardino
SHBA (4 4 2): 18 K.Keller, 7 E.Ljuis, 22 O.Onjevu, 23 E.Pope, 6 S.Sherundolo, 15 B.Konvej, 10 K.Rejna, 4 P.Mastroeni, 17 D.Bislej, 21 L.Donovan, 20 B.MekBrajd
Gjyqtar: Horge Larionda (Uruguaj)

Itali - SHBA ora 21:00
Stadiumi "Fritz-Valter", Kaizerslauten

Të pezulluar: Asnjë
Të dëmtuar: Mbrojtësi Xhanluka Zambrota, i cili mungoi në ndeshjen e parë kundër Ganës për shkak të dëmtimit, është i gatshëm për të filluar lojën nga minuta e parë. Ndërkohë, mesfushori Xhenaro Gatuzo nuk pritet të rikthehet.
Në dyshim: Mesfushori Xhon O'Brajen ka treguar vështirësi me arritjen e formës, ndaj dhe nuk dihet nëse do ta fillojë lojën nga minuta e parë.
Të përgjithshme: Fitorja 2-0 ndaj Ganës në ndeshjen e parë ka bërë që skuadra e Marçelo Lipit ta nisë kompeticionin botëror në mënyrën e duhur. Në ndeshjen e dytë, Xhanluka Zambrota do të jetë në vendin e Kristian Zakardos. Ndërkohë, për sa i përket mesfushës, duke qenë se mungon Gatuzo, Italia do të luajë sërish me treshën që e nisi ndeshjen që nga minuta e parë ndaj Ganës. Mauro Kamoranezi pritet të jetë sërish në stol, ndërsa Toti do të luajë përsëri pas dy sulmuesve Alberto Xhilardino dhe Luka Toni, me Vinçenco Iakuintën të gatshëm për t'u futur në çdo kohë. Pasi humbën me rezultatin 3-0 ndaj Çekisë, amerikanët do të kërkojnë të paktën një pikë ndaj italianëve, të cilët nuk i kanë mundur asnjëherë në pesë përballjet që kanë pasur. Gjithsesi, nuk duhet harruar se SHBA-ja e ka potencialin e duhur për të befasuar, kur kujtojmë që arriti të jetë çerekfinaliste në botërorin e kaluar.
Shifra dhe fakte: Italia nuk ka humbur asnjë nga 19 ndeshjet e fundit dhe nuk ka humbur asnjë nga pesë përballjet me SHBA-në. Italia ka arritur edhe një fitore të thellë 7-1 ndaj amerikanëve, në Kupën e Botës 1934.

Përballje të mëparshme në botëror:
1934: Raundi i parë Itali-SHBA 7-1
1990: Faza me grupe Itali-SHBA 1-0

Lipi: Na duhet shumë kujdes ndaj amerikanëve
Trajneri i Italisë ka deklaruar se SHBA-ja është një skuadër që nuk duhet nënvlerësuar aspak, edhe pse humbi me rezultatin 3-0 ndaj Çekisë. "Prisja një ndeshje me pak diferencë midis çekëve dhe amerikanëve, pasi këta të fundit kanë me të vërtetë një ekip të fortë. SHBA-ja ka bërë shumë përmirësime gjatë pesë viteve të fundit. Ata arritën çerekfinalet e Kupës së Botës katër vite më parë, ndaj ju siguroj se ndaj tyre duhet të kemi shumë kujdes. Nëse nuk do të kishim fituar edhe ndaj Ganës, ndaj SHBA-së do të ishte akoma më e vështirë," - tha Marçelo Lipi. Ky i fundit kishte thënë që para shortit që skuadrat, të cilat nuk donte në grup, ishin SHBA-ja dhe Gana. Gjithsesi, sfidën ndaj afrikanëve e kaloi me sukses dhe tani e ka radhën ajo ndaj amerikanëve.

Arena: Erdhi koha të shkëlqejmë
Trajneri i SHBA-së, Brus Arena, ka deklaruar se skuadra e tij do të rikthehet të gjejë veten në fushën e lojës, pas atij rezultati zhgënjyes në ndeshjen ndaj Çekisë. "Ne kemi humbur një ndeshje. Në çdo sport, sfida është se si i përgjigjes humbjes dhe mendoj se ne duhet të rikthehemi me paraqitje dhe rezultat sa më të mirë. Italia ka një ekip shumë të fortë, gjithsesi tani është momenti i duhur që ne të shkëlqejmë. Nuk na falen gabime dhe kam besim te futbollistët e mi. Të shpresojmë te maksimumi i pikëve," - tha ai. Arena e drejtoi kombëtaren e SHBA-së drejt çerekfinaleve të botërorit, katër vite më parë.
 

Fation Shehu
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------