JETA ME JEZUS KRISHTIN, E VETMJA SIGURI PËR FAMILJEN

Me dashurinë që Perëndia na dhuron, i urojmë të gjithë lexuesve të gazetës Krishtërimi, si dhe gjithë njerëzve kudo ndodhen çdo bekim nga Perëndia nëpërmjet Jezus Krishtit, Zotit tonë. Perëndia dëshiron, por edhe i ka të gjitha mundësitë që të ruajë dhe të bekojë çdo njeri që kërkon të gjejë strehë në Fjalën e Tij të Shenjtë. ’’Kush banon në strehën e shumë të Lartit, pushon në hijen e të Plotfuqishmit....Duke qënë se ke thënë:’’O Zot, ti je streha ime, dhe e ke bërë shumë të Lartin strehën tënde, nuk do të gjejë asnjë e keqe, asnjë plagë nuk do t’i afrohet çadrës sate’’.Psalmi 91:1, 9-10.
Këtë gjë vërteton edhe një studim i cili ka filluar në gusht të vitit 2001 dhe do të përfundojë në Gusht të vitit 2005 dhe që një pjesë të rezultateve i deklaruan para pak kohe. Ky studim bëhet nga një Universutet i Veriut të Karolinës në Shtetet e Bashkuara të Amerikës. Është studimi më i thellë dhe më i zgjeruar që është bërë deri tani për lidhjet që kanë prindërit me fëmijët e tyre.
Rezultatet e studimit treguan se fëmijët e moshës 12-14 vjeçare, prindërit e të cilëve kishin besimi tek Perëndia, kishin lidhje më të mira sesa familjet tek të cilat mungonte kjo gjë.
Kristian Smith, drejtuesi kryesor i studimit nënvizon se të rinjtë të cilët janë nga familje që shkojnë shpesh në kishë, lexojnë Shkrimin e Shenjtë dhe luten bashkë, mrekullohen, i respektojnë dhe janë të kënaqur me prindërit e tyre. Gjithashtu, ata thanë se prindërit e tyre, i nderojnë e i mburrin dhe se ata ndiejnë gëzim dhe siguri në familje. Ata hanë së bashku me prindërit e tyre dhe shoqëria që ata kanë njihet nga familja. Këta fëmijë është shumë vështirë që të largohen nga familja dhe të humbasin në botë.
Përkundrazi, të rinjtë familjet e të cilëve nuk shkojnë në kishë, nuk lexojnë Shkrimin e Shenjtë, nuk luten bashkë, kanë lidhje jo të mira me prindërit e tyre dhe nuk marrin pjesë në jetën shoqërore familjare, këta largohen shpesh nga familja e tyre në drejtim të panjohur dhe janë të pambrojtur.
Familja që ka për themel Jezus Krishtin është porti i qetë dhe i sigurtë, në të cilën pjestarët e familjes do të gjejnë dashuri dhe do të marrin forca të reja, për të vazhduar garën e vështirë të jetës. Është detyrë por njëkohësisht edhe privilegj që prindërit ti mësojnë fëmijët e tyre dhe ti këshillojnë ashtu siç duhet në një familje të krishterë. Prindërit në radhë të parë duhet të jenë një shembull i jetës së krishterë, duke i rritur dhe edukuar dhe të interesohen për shpëtimin e tyre dhe jo të merren me karrierën e tyre dhe se çfarë pune do të bëjnë kur të rriten. ’’Ja, bijtë janë një trashëgimi që vjen nga Zoti; shpërblimi i tij është fryti i barkut të tij’’. Psalmi 127:3.
Akoma që nga Dhjata e Vjetër, Fjala e Perëndisë i këshillonte prindërit që ti drejtojnë fëmijët e tyre në një jetë të pastër dhe të kënaqshme përpara Perëndisë. ’’Dëgjo, Izrael, Zoti, Perëndia ynë, është një i vetëm. Ti do ta duash, pra, Zotin, Perëndinë tënd, ma gjithë zemrën tënde, me gjithë shpirtin tënd dhe me gjithë forcën tënde. Dhe këto fjalë që sot po të urdhëroj, do të mbeten në zemrën tënde; do t’ua ngulitësh bijve të tu, do të flasësh për to kur rri ulur në shtëpinë tënde, kur ecën rrugës, kur ke rënë në shtrat dhe kur çohesh’’. Ligji i Përtërirë 6:4-7.
Fatëkeqësisht shumë herë në historinë e popullit të Izraelit shohim se prindërit i harronin udhëzimet e Perëndisë, si përfundim brezi tjetër të mos i njoh dhe të ndodhet larg nga mbrojtja dhe nga bekimi i Perëndisë. ’’Kur tërë ai brez u bashkua me etërit e vet, mbas atij doli një brez i ri që nuk e njihte Zotin, as veprat që Ai kishte bërë për Izraelin’’. Gjyqtarët 2:10.
Para se Jezus Krishti do të vinte në tokë, përsëri populli kishte ngritur krye dhe ishte larguar nga urdhërimet e Perëndisë, përsa i përket edukimit familjar, prandaj dhe një nga qëllimet e shërbimit të Gjon Pagëzorit ishte:’’...Për t’i kthyer zemrat e prindërve te fëmijët, ...për t’i bërë gati Zotit një popull të përgatitur mirë’’. Luka 1:17
Në këto kohë të fundit që jetojmë, pak para ardhjes së dytë të Zotit tonë Jezus Krisht, Fjala profetike e Perëndisë se do të vinë kohë të këqija ’’sepse njerëzit do të jenë egoistë, lakmues parash, mburravecë, krenarë, blasfemues, të pabindur ndaj prindërve, mosmirnjohës, të paudhë, të padhembshur, të papajtueshëm, mizorë, që se duan të mirën, tradhëtarë, kokëshkretë, fodullë,dëfrimdashës më fort se perëndidashës’’. 2 Timoteu 3:1-4.
Le të pendohemi pra, dhe të kthehemi në dëgjimin e Fjalës së Perëndisë, që të shlyen mëkatet tona ’’dhe që të vijnë kohët e flladit nga prania e Zotit’’. Veprat e Apostujve 3:19.



Nga Aleko Peraqi