Dje kombëtarja jonë ka nisur rrugën e saj drejt Europianit Austri-Zvicër 2008. Dje kuqezinjtë bënë përfaqësimin e parë në Minsk ndaj Bjellorusisë vendëse dhe dolën kryelartë, teksa morën një barazim në një transfertë shumë delikate. Shifrat 2-2 flasin më qartë për atë që ndodhi në fushën e lojës, ku kishte gjithçka, sidomos gabime fatale në mbrojtje, ku më të rëndat ishin ato në mbrojtjen tonë, ku pësuam dhe dy golat. Por gjithsesi, edhe pse të gjendur dy herë në disavantazh, djemtë e kombëtares gjetën forcat e reaguan, duke barazuar dy herë shifrat dhe duke marrë me vete një barazim me vlera, që premton shumë për më tej.
Bariçi e rreshton kombëtaren me klasiken 4-4-2, duk u dhënë hapësirë të gjithë lojtarëve që u aktivizuan në takimin e fundit miqësor. Në portë i jepet hapësirë Likës përpara Hidit e Beqajt, ndërsa në mbrojtje Bariçi i beson eksperiencës së Hasit në qendër dhe përkrah tij vendos Elvin Beqirin. Në krahun e majtë veproi Ardian Aliaj, ndërsa në të djathtë Armend Dallku. I detyruar të bëjë pa Duron e Muratin të dëmtuar, Bariçi sposton Lalën në krahun e djathtë të mesfushës, duke lënë si shkatërrues të vetëm Canën. Në krahun e majtë aktivizohet Altin Haxhi dhe para dyshes sulmuese Tare-Bogdani, ishte Ervin Skela. Ky ishte formacioni që nisi sfidën e djeshme dhe që bindi pjesërisht, sepse si zakonisht mbrojtja ka qenë në pikë të hallit, ku Aliaj nuk arriti të mbulojë asnjëherë siç duhet kundërshtarët dhe Dallku harronte pozicionin e tij, duke u lënë fushë të lirë veprimi bjellorusëve, të cilët shënuan që në minutën e parë të takimit me anë të Kalashevit, që shfrytëzoi pikërisht rreshtimin e gabuar të mbrojtjes sonë si dhe bashkëpunimin e portierit Lika, që u zu gjithashtu në befasi. Por kuqezinjtë reagojnë menjëherë dhe bëhen zotër të fushës. Ushtrojnë presion të vazhdueshëm në zonën kundërshtare dhe falë këtij presioni fitojnë një 11-metërsh. Aksion i bukur. Skela harkon në zonë, Tare shikon shkëputjen e Lalës në zonë dhe ul topin për të. Mbrojtësi kundërshtar Koritko, duke dashur të evitojë golin, pengon Lalën. Ekzekuton Skela dhe gjithçka kthehet në baraspeshë. E ndërsa të gjithë prisnin një këmbëngulje të tanëve, bjellorusët shfrytëzojnë më së miri minierën e arit, krahun e Adrian Aliajt, që është tërësisht jashtë loje. Edhe një herë tjetër dyshja Aliaj-Dallku, protagonistë të gabimit dhe Hasi e Beqiri të pafuqishëm për të ndrequr diçka. Romashenko në të njëjtin pozicion, i pamarkuar dhe krejtësisht i lirë si shoku i tij, shënon. 2-1 për bjellorusët dhe gjithë pjesa e parë mbyllet me vuajtjet e kombëtares sonë në mbrojtje. Në fraksionin e dytë Oto Bariç vepron. Del jashtë Aliaj për Debatik Currin dhe kosovari nuk zhgënjen. Curri bëhet zot i krahut të majtë si dhe shtyn shumë para, duke i dhënë gjithnjë e më shumë terren skuadrës sonë. Bjellorusët kërkojnë të shfrytëzojnë ndonjë gabim tjetër të Dallkut, por Beqiri, Hasi apo Cana i kudondodhur, janë të gatshëm të dublojnë. Ndeshja kthen pamjen. Shqipëria bëhet e frikshme. Hidhet tërësisht në sulm, duke lënë ndonjë hapësirë të tepërt pas, por Ilion Lika shlyen gabimin e pjesën së parë në të paktën dy raste të frikshme. Kapiteni Tare kërkon me ngulm të mbajë skuadrën para, por nuk ka bashkëpunimin e duhur të Bogdanit, që është në një ditë të errët. Megjithatë, kombëtarja merr frymë, fiton terren dhe asfikson kundërshtarin, që detyrohet të gabojë. Minutat kalojnë e gjithçka 2-1 për vendësit. Bariçi vendos të rrezikojë, del jashtë Skela e në fushë hidhet Edmond Kapllani, që menjëherë tregohet aktiv. Por ende nuk vjen goli i barazimit. I pafat Igli Tare në goditjen e tij me kokë, ku i vodhi kohën portierit kundërshtar. Topi kalon pak larg shtyllës së djathtë pingule në portën e boshatisur. E megjithatë, kuqezinjtë janë vitale. Curri vazhdon e ushtron presion në të gjithë krahun e djathtë, ndërsa Haxhi shikon më shumë përpara. Bariçi bën lëvizjen e fundit. Del Altin Lala e futet Devi Mukaj. Pak çaste më vonë, në një zbritje të rrezikshme, kuqezinjtë fitojnë një goditje dënimi. Ekzekuton fuqishëm nga mbi 20 metra Hasi e topi prehet në rrjetë. 2-2 dhe ky rezultat nuk ndryshon deri në fund, edhe pse vuajtëm disi sëmundjen e zakonshme të çasteve të fundit.
Kuqezinjtë reaguan dy herë dhe arritën një barazim në një transfertë delikate. Por të gjithë jemi të bindur se duhej të kishim marrë më shumë. Kombëtarja gaboi në episode të veçanta dhe gabimet ishin shumë foshnjarake, por gjithsesi ajo që ngroh është fakti se ditëm të reagojmë dhe se në çdo rast, ofensiva kuqezi ishte shumë e rrezikshme dhe e vuri në alarm kundërshtarin.
Po kështu, në alarm e vuri edhe mbrojtja Oto Bariçin e gjithë tifozët kuqezinj. Kroati duhet ta ketë kuptuar se ky repart kërkon i pari revolucion. Gabimet elementare për mosrreshtim korrekt, apo mosdisiplinim taktik nuk duhet të gjejnë vend në një skuadër përfaqësuese. Gjithçka për t'u ndrequr kur duhen edhe katër ditë nga sfida e "Qemal Stafës", ku Shqipëria do të presë Rumaninë, që dje barazoi në fushën e saj me Bullgarinë po me shifrat 2-2. E rëndësishme është një morëm një barazim jashtë fushe, që e nisëm mirë këtë edicion eliminatoresh dhe se me Rumaninë do të ndeshemi në të njëjtat pozita, të paktën për sa i përket renditjes së përgjithshme. Megjithatë, askush të mos ekzaltohet më tepër nga ç'duhet se barazimi me Bjellorusinë vërtet që na gëzoi, por la shije të hidhur te tifozët për mënyrën sesi u arrit, ku me pak kujdes do të mund të kishim fituar një takim të rëndësishëm. Gjithsesi, një barazim është më mirë se një humbje, sidomos kur ke qenë gjatë gjithë ndeshjes në disavantazh. Tashmë nuk ka kohë për pishmanllëqe, Rumania po troket në derë dhe gjithë vëmendja duhet fokusuar aty për të riparuar sa më shpejt gabimet e Minskut.
Jeton SELIMI

"Skaneri" i kuqezinjve
Ilion Lika
E përgjithshmja ishte pozitive për portierin e Dinamos, edhe pse ai mban pjesën më të madhe të fajit në golin e parë të pësuar. Ishte një goditje e fortë psikologjike, pasi ishin sekondat e para të lojës, por Lika e mori veten më pas, duke qenë në disa raste edhe shpëtimtari i portës tonë.

Besnik Hasi
Autori i golit të dytë, që i dha pikën Shqipërisë, vazhdon t'i shërbejë skuadrës sonë kombëtare me eksperiencën e tij, edhe pse fizikisht nuk është në lartësinë e duhur. U mundua ta orientonte mbrojtjen kuqezi, që gjatë pjesës së parë ishte shumë e çorientuar. Pjesa e dytë ishte më e mirë për të.

Adrian Aliaj
Thuajse gjatë gjithë pjesës së parë bjellorusët kanë sulmuar nga krahu i djathtë i tyre dhe Aliaj nuk ka mundur t'u bëjë ballë. Nuk është në formën e tij optimale, sepse jo më kot trajneri Bariç e zëvendësoi në pjesën e dytë. Mbase mosaktivizimi me ndonjë skuadër deri para pak ditësh, ka ndikuar në formën e tij sportive.

Elvin Beqiri
Mbrojtësi shkodran mbetet një nga lojtarët më konstantë në lojën e tij. Nuk është ndier shumë në këtë ndeshje, pasi kundërshtari ka provuar ta gjejë golin me depërtimet nga krahët. Jo shumë i vëmendshëm në pjesën e parë, por në pjesën e dytë, si të gjithë lojtarët e tjerë, edhe Beqiri është përmirësuar.

Armend Dallku
Trajneri Bariç e kishte vendosur në krahun e djathtë të mbrojtjes, por shpesh Dallku e braktiste këtë pozicion, duke u spostuar në qendër dhe duke e lënë të lirë kundërshtarin. Në të dy golat e pësuar, bjellorusët e gjendën të pamarkuar në të majtë të zonës dhe nuk e patën të vështirë të shënonin.

Lorik Cana
Ishte lojtari që kreu një volum mjaft të madh loje, duke ndihmuar shumë në fazën mbrojtëse dhe atë sulmuese. Në të shumtën e rasteve Cana arriti ta bllokonte Hlebin, lojtarin më të rrezikshëm të Bjellorusisë. Mbetet një nga shtyllat kryesore të skuadrës sonë.

Altin Lala
Kapiteni i Hanoverit ka zhvilluar një pjesë të parë mjaft të mirë, pasi ka qenë ngacmues edhe në portën kundërshtare. Ka fituar një 11-metërsh, që i solli barazimin kombëtares sonë. Me grintën e tij mbetet një titullar i padiskutueshëm, edhe pse në skuadrën e tij në Gjermani nuk është aktivizuar si i tillë.

Altin Haxhi
Në ndeshje si ajo e djeshmja me Bjellorusinë, eksperienca mund të jetë vendimtare. Kjo u duk qartë në lojën e Altin Haxhit, i cili ishte i kudondodhur. Përveçse është munduar të mbrojë, ai ka bërë maksimumin edhe fazën sulmuese, falë teknikës, që e ndihmoi të fitonte edhe disa faulla.

Ervin Skela
Roli i tij në kombëtaren kuqezi është një nga më të rëndësishmit, pasi Skela është furnizuesi kryesor i sulmit. Ka meritë në ekzekutimin e saktë të 11-metërshit, por ka gabuar shpesh në krosimet e tij. Lodhja fizike bëri që trajneri Bariç ta zëvendësonte në pjesën e dytë.

Erion Bogdani
Natyrisht që prej tij prisnim me shumë nga të gjithë, por Bogdani nuk ka qenë në ditën e tij më të mirë. Gjatë gjithë kohës ka qenë nën mbulimin e rreptë të mbrojtësve bjellorusë, kështu që nuk e ka kërcënuar asnjëherë rrezikshëm portën kundërshtare. Shpesh pati probleme edhe në koordinim.

Igli Tare
Më i miri për skuadrën tonë, ndoshta dhe lojtari më i mirë i ndeshjes. Kapiteni kuqezi ka qenë tepër i saktë në lojën e tij, duke e tërhequr skuadrën tonë në sulm, ndërkohë që i ka munguar vetëm goli. Ka meritë në pasimin e saktë për Lalën në rastin e
11-mershit.

Debatik Curri
I aktivizuar në pjesën e dytë në të majtë të mbrojtjes, që nuk është pozicioni i tij, u duk sikur i dha një tjetër pamje lojës së skuadrës tonë. Ndoshta në ndeshjet e ardhshme e meriton të jetë titullar, pasi gëzon një gjendje të mirë fizike.

Edmond Kapllani
Sulmuesi i Karlsruhes u aktivizua për disa minuta në pjesën e dytë, megjithatë, nuk u shfaq dot kërcënues për portën bjelloruse.

Devi Muka
Për aq minuta sa luajti nuk mund të jepet një vlerësim i saktë, por ai mund të jetë një alternativë në ndeshjet e ardhshme.
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------