Fatos Kongoli vazhdon të korrë sukses me librin e tij "I humburi" (1992). Vetëm para dy ditësh ai është shpallur fitues i çmimeve të "English PEN". Çmimet janë dhënë për katër shkrimtarë të huaj të përkthyer në gjuhën angleze dhe ceremonia përkon me hapjen e Panairit të Librit të Londrës. Kështu bën të ditur gazeta britanike "The Guardian". Sipas kësaj gazete romani i Kongolit i përkthyer në anglisht nga David Bellos e paraqet atë si një prej përfaqësuesve më të denjë të letërsisë bashkëkohore shqiptare.

Çmimet
Këto çmime të dhëna nga organizata letrare britanike "PEN" janë krijuar për të nderuar letërsinë, e cila kombinon standardet më të larta letrare me përkushtimin ndaj rritjes së dialogut ndërmjet kulturave. Drejtori i "PEN", Jonathan Heawood thekson rëndësinë e letërsisë së përkthyer në botën moderne. "Ne besojmë se letërsia nuk duhet të ketë kufij. Po përpiqemi të rrisim profilin e letërsisë së përkthyer dhe t'i drejtojmë lexuesit tanë ndaj librave që janë sfidues dhe të vlefshëm. Në botën e stome komplekse është jetësore që të kuptojmë kulturat e tjera: dhe si mund të bëhet kjo më mirë se sa nëpërmjet një libri?", shprehet Heawood.

Fituesit
Fituesit e këtij viti vijnë nga Shqipëria, Algjeria, Çeçenia dhe Turqia. Koleksioni i poezive të Sulejman Adel Guemar, "Gjendje e jashtëzakonshme" bazohet në eksperiencën algjeriane, por gjithashtu trajton shqetësimet urgjente globale. Autori ka marrë nga qeveria britanike të drejtën e qëndrimit të përhershëm në këtë vend në vitin 2004 pasi ai ishte nën presionin e dhunës si pasojë e punës së tij si gazetar dhe botues në Algjeri. Libri i parë i Arkady Babchenko është një seri kujtimesh të luftës çeçene të vitit 1995-1996. "Lufta e një ushtari" rrëfen sesi Babchenko dhe rekrutët e tjerë mësuan kuptimin e egërsisë dhe frikës përpara se t'i afroheshin vijës së frontit. Romani "I humburi" i Fatos Kongolit paraqet klimën e terrorit dhe dëshpërimit që karakterizonte jetën e përditshme në Shqipërinë komuniste. Fituesja e fundit, Emine Sevgi Ozdamar është një aktore, dramaturge dhe romanciere. Romani i saj "Ura e bririt të artë" skicon eksperiencën e një heroine, e cila ashtu si vetë autorja, lë Turqinë për të mbërritur në Gjermani në vitin 1970. Është rrëfimi i mprehtë e aventuresk i një gruaje të re që jeton një jetë plot tension ndërmjet Berlinit, Stambollit dhe Ankarasë: një roman i vërtetë modern evropian. Çmimet e shkrimtarëve të përkthyer në anglisht jepen dy herë në vit nga "PEN", shoqata e shkrimtarëve e themeluar për të ruajtur lirinë e shprehjes në mbarë botën. Librat gjykohen nga një komitet i drejtuar nga përkthyes dhe specialistë ndërkombëtarë të letërsisë. Ky komitet drejtohet nga Amanda Hopkinson, drejtoreshë e Qendrës Britanike për Letërsinë e Përkthyer. Çmimi i parë është i është dhënë në vitin 2004 shkrimtares ruse Anna Politkovskaya, dhe që prej atëherë 14 shkrimtarë janë nderuar me çmim.
 




____________

Lot Dielli