Pedagogu i Infermierisë kërkoi më shumë se paratë. U kap në hotel me studenten jetime

Thellohet skandali i arrestimit të pedagogut të lëndës së fiziologjisë në Fakultetin e Infermierisë të Universitetit të Korçës. Rënia e tij në pranga nuk ka të bëjë thjesht me shfrytëzimin e detyrës për të përfituar ryshfet në sezon provimesh, por me abuzimin si pedagog për të "mëkatuar" me një studente të vitit të dytë.

Robert Rado, 40 vjeç, pedagog i lëndës së fiziologjisë në Fakultetin e Infermierisë në Korçë, sipas të dhënave të policisë do të përballet më akuza më të rënda se ajo për shpërdorim detyre në kërkim të ryshfetit nga një studente. Ndaj tij, sipas pohimeve të dala zyrtarisht nga Drejtoria e Policisë së Qarkut Korçë, rëndon edhe akuza e kryerjes së marrëdhënieve seksuale me shpërdorim të detyrës. Një ditë pas arrestimit të pedagogut, policia ka bërë të ditur edhe të dhëna të tjera mbi shkakun e arrestimit të tij.

Nuk ka qenë thjesht tendenca e pedagogut për të siguruar një ryshfet prej afro 100 eurosh nga studentja e vitit të dytë që identifikohet pjesërisht me inicialet J.S., por edhe presioni që ai të kryente marrëdhënie seksuale me të. Burime që i referohen grupit hetimor të ngritur për ngjarjen thanë se studentja e vitit të dytë në Fakultetin e Infermierisë të Universitetit të Korçës, ka pasur vazhdimisht presione për t‘i dhënë pedagogut diçka më shumë se paratë, për të marrë një notë kaluese. Studentja që nuk ka pasur mbështetje nga të afërm të saj, pasi është jetime, i ka ofruar pedagogut Robert Rado një shpërblim në të holla për të kaluar në provimin e fiziologjisë. Por të tjera kanë qenë pretendimet e mësimdhënësit. Duke i premtuar rezultate pozitive në të gjitha provimet deri në mbarim të fakultetit, pedagogu Rado, sipas policisë i ka kërkuar studentes së tij që të kryenin marrëdhënie seksuale.

E ndodhur në këto rrethana, studentja i është drejtuar policisë së Korçës duke e vënë në dijeni për gjithçka i kërkonte pedagogu 40-vjeçar. Sipas policisë, me miratim të gjykatës është vendosur që me mjete përgjimi të sigurohet prova se pedagogu synonte kryerjen e marrëdhënieve seksuale me studenten e tij dhe jo thjesht të merrte ryshfet për provimin e fiziologjisë.

Me aprovimin e kërkesës për përgjim nga gjykata, studentja ka pranuar të shkojë në takim me pedagogun e saj në një hotel të qytetit të Korçës. Rreth orës 15:00 të ditës së mërkurë, policia ka ndërhyrë në ambientet e hotelit ku pedagogu ka tentuar të kryejë marrëdhënie seksuale me studenten e tij, duke e arrestuar në flagrancë.

Robert Rado është arrestuar jo vetëm për shpërdorim detyre duke qenë në një funksion publik, por edhe për kryerje të marrëdhënieve seksuale me studenten J.S, e cila e kishte denoncuar më parë në polici duke i ngritur edhe grackën e përgjimit gjatë takimit të tyre në hotel.

Ky është rasti i dytë kur një pedagog përfundon në pranga për abuzim seksual me studentet. Një vit më parë, kamerat e emisionit "Fiks Fare" në "Top Channel" faktuan abuzimin e një pedagogu të Turqishtes në Tiranë.



Rasti


Ryshfeti, pranga pedagogut të "Ismail Qemalit"


Policia e Vlorës njoftoi të mërkurën se kishte arrestuar një pedagog të universitetit "Ismail Qemali". Enertin Dheskali, pedagog i jashtëm në Fakultetin e Gjuhë-Letërsisë u arrestua në qytetin e Fierit, ndërsa ishte duke marrë një sasi parash nga një studente e tij, në këmbim të një note kaluese në provim. Ndaj Dhaskalit kishte nisur hetimi pas një denoncimi të bërë studentja. Prokuroria e Vlorës kishte nxjerrë një urdhër-arresti pas grumbullimit të provave dhe policia me bashkëpunimin e studentes bëri arrestimin në flagrancë, në një lokal në qytetin e Fierit. Enertil Dhaskali, 32 vjeç, lindur në Fier dhe banues në Tiranë ndodhet tashmë në dhomat e paraburgimit të Komisariatit të Vlorës, në pritje të gjykimit për veprat penale të shpërdorimit të detyrës dhe korrupsionit pasiv.
 




____________
\"Mos shikoni kishat as xhamijat se feja e shqiptarit eshte shqiptaria.\"