Kristi Vangjeli e ka shprehur irritimin e krijuar nga mediat rreth falsifikimit dhe deformimit të realitetit, duke pranuar kërkesën e trajnerit Otto Bariç për të luajtur me skuadrën kombëtare. “Unë nuk e di se cila është propaganda e krijuar nga mediat, por ka shumë abuzime për të cilat, unë nuk marr aspak përsipër pranimin e tyre. Fjalët deformohen dhe afishohen si iu do qejfi njerëzve dhe pseudogazetarëve. Për të treguar edhe një herë të vërtetën dua të them se:

a) Unë nuk kam thënë se kam të regjistruar biseda me trajnerin Hasan Lika. Kam thënë që kam biseduar me trajnerin, por në asnjë mënyrë unë nuk do dal nëpër media dhe t’u them njerëzve dhe gazetarëve se çfarë bisedash kam kryer me trajnerin. Ato janë personale dhe qëndrojnë vetëm midis nesh.

b) Unë asnjëherë nuk kam thënë, as për mediat greke dhe as për ato shqiptare se do të luaj për Greqinë. Kam thënë se kam pasaportë greke, por kjo nuk do të thotë që unë do luaj për Greqinë.

c) Kam thënë se nuk do të luaj për Shqipërinë, sepse kam qenë i indinjuar nga mënyra se si isha trajtuar.

d) Unë kam shprehur pakënaqësitë e mia për ish-përgjegjësin e ekipeve kombëtare, Besnik Çela që më ka trajtuar shumë ulët në disa situata dhe ai ka qenë përfaqësuesi i FSHF-së, duke më kërkuar që të vija në Shqipëri i dëmtuar, vetëm sepse më kishte prerë biletë që shumë mirë ai mund ta rikthente, duke ngulur këmbë që unë të vija.

e) Kam thënë që kam qenë tepër i indinjuar që nuk isha thirrur për ndeshjet e fundit me kombëtaren, pasi isha në formë shumë të mirë dhe e meritoja një vend, thjesht si zëvendësues. Nuk pretendoja si titullar dhe duke qenë në formë mendoja se mund të nevojitesha për ekipin, aq më tepër kur unë luaja rregullisht me Arisin, që aktualisht është skuadër shumë e fortë.

f) Gjithashtu, kam thënë se gjithnjë kam qenë dhe jam shqiptar edhe kam luajtur për kombëtaren shqiptare dhe ka qenë dhe është e do të jetë nder për mua fanella kuqezi, sepse të gjithë e dine që unë kam luajtur me atë fanellë në shpinë, por kur ka padrejtësi atëherë nuk jam i kënaqur.

g) Asnjëherë nuk kam mohuar vendin tim se nga jam e se ku jam rritur.

Të gjithë mund ta lexojnë intervistën kur u shpreha për mosobligimet e ardhshme të miat për kombëtaren që ishin krejtësisht fjalët e mia dhe qëndroj pranë tyre. Personalisht, unë në ndeshjen me Greqinë, kur kam luajtur me skuadrën e moshave kam qarë dhe më është ngritur mishi kokrra-kokrra kur këndohej himni kombëtar, por ata që deformojnë fjalët, si duket nuk e kanë idenë se çfarë ndjenje përshkon. Unë kam marrë një ftesë nga trajneri Otto Bariç për të qenë i pranishëm për ndeshjet e kombëtares sonë me Anglinë dhe Luksemburgun. Për hir të respektit që kam për fanellën kuq e zi, për hir të konsideratës që kam për trajnerin Otto Bariç si dhe për t’iu treguar të gjithë atyre që mendojnë se unë nuk luaj për Shqipërinë dhe se dua të luaj me Greqinë dhe t’i hedh poshtë gjithë ato deklarata të rreme të tyre kam vendosur që t’i përgjigjem pozitivisht ftesës së trajnerit Otto Baric për ndeshjet me Anglinë dhe Luksemburgun dhe do të jem i pranishëm pranë skuadrës. Gjithkush mund të mendojë se si është e mundur që unë e bëj këtë që është një kundërshtim i vendimit tim të mëparshëm, por dua t’iu tregoj të gjithëve nëpër media se duhet të mësojnë si ta zbardhin të vërtetën ashtu siç është, jo ashtu siç u pëlqen atyre”, - ka përfunduar deklarimin e tij Kristi Vangjeli.