Kampionatin evropian të futbollit 2008 e fiton Gjermania. Sipas kuotave të basteve të vendosura nga kompanitë e basteve për secilën skuadër pjesëmarrëse në evropianin austro-zviceran, ekipi i drejtuar nga Joakim Lov shihet si pretendenti NR 1 dhe i vetëm për fitoren e trofeut më prestigjioz për kontinentin evropian. Koeficientet jepen nga kompanitë më të mëdha të basteve në botë (Bwin, Bet 365, Euro lotto, Bett soccer, etj), të cilat kanë filluar prej disa kohësh të pranojnë baste nga më të ndryshmet lidhur me Kampionatin Evropian të futbollit, 7-29 qershor 2008.
Sipas këtyre kompanive, të vësh bast për Gjermaninë Kampione Evrope, do të thotë që atë shumë parash ta shumëzosh me 4.75, kuotë kjo goxha e ulët përkundrejt kundërshtarëve të tjerë në EURO 2008. Në fakt arsyetimi i bastexhinjëve, të cilët shohin më të mundshëm një Gjermani Kampione pikë së pari qëndron në ecurinë gjithnjë e në ngritje që ka pasur ky ekip si gjatë botërorit shtëpiak "Gjermani 2006" por edhe gjatë ndeshjeve kualifikuese në grup për EURO 2008. Së dyti, pikë e fortë e skuadrës gjermane shihet edhe tek mosha dhe eksperienca e shumicës së futbollistëve që përbëjnë këtë përfaqësuese. Ata militojnë jo vetëm në skuadrat më të forta të Evropës, por kanë treguar edhe një formë të shkëlqyer fizike gjatë muajve të fundit (Balak, Gomez, Klose, Podolski, Lahm, Borovski, etj). Dhe së treti, si pikë të fortë, analistët dhe bastexhinjtë shikojnë mënyrën e drejtimit të kësaj kombëtareje e cila vazhdon të udhëhiqet sikundër dy vjet më parë në botëror ku bëri një figurë shumë të mirë, kur në pankinë ulej Jurgen Klinsman i ndihmuar pikërisht nga tekniku aktual, Joakim Lov.
Ndërkohë pas Gjermanisë në bazë të koefiçientëve vijnë Spanja dhe Italia të cilat kuotohen njëlloj. Të vësh bast për këto dy ekipe si Kampione Evrope do të thotë që atë shumë ta shumëzosh me 7. sipas specialistëve të futbollit Spanja dhe Kampionia e Botës, Italia do të vuajnë nga zgjedhje të gabuara të trajnerëve, ambient jo shumë të favorshëm dhe mbytës në organikën e skuadrave si dhe nga rënie e nivelit të futbollistëve që përbëjnë këto ekipe përfaqësuese gajtë këtij viti. Spanjollët do të jenë pa Raul, të cilin Luis Aragones ka preferuar të mos e grumbullojë. Mos-thirrja e një futbollisti lider si sulmuesi madrilen sipas analistëve do të ndikojë jo vetëm në lojën e ekipit por edhe në marrëdhëniet e trajnerit me kastën e vjetër në kombëtare, mbështetës të ish-kapitenit, Raul. Ndërsa Italia do të vuajë famën e marrë në botërorin e fundit si dhe mungesën e dy futbollistëve shumë të rëndësishëm, Alesandro Nesta dhe Françesko Toti, të cilët hoqën dorë nga kombëtarja italiane e futbollit që pas "Gjermania 2006".
Pas kësaj tresheje vijnë me radhë Portugalia (8.50), Franca (10.00) Holanda dhe Kroacia (14.00) si dhe Republika Çeke (15.00). bie në sy se Greqia, Kampione e Evropës në fuqi kuotohet shumë lart (26.00), çka do të thotë se një fitore e dytë e këtij trofeu duket si një gjë gati e pamundur. Pas grekëve vijnë me radhë, Suedia (29.00), Rusia (29.00), Rumania (34.00), Polonia (41.00), Turqia (41.00) si dhe Austria vendase (81.00) e cila jepet si skuadra që ka përqindjen më të vogël (për të mos thënë të pamundur) për të fituar këtë evropian. Gjithsesi duhet theksuar se edhe në evropianin "Portugali 2004" Greqia jepej si një skuadër që nuk do të mund të kalonte as në ndeshjet në grup por ja që skuadra e drejtuar nga Oto Rehagel theu çdo parashikim duke çuar në Athinë trofeun evropian. Kështu që në teori të paktën të 16 skuadrat pjesëmarrëse kanë shanse për të bërë të tyren trofeun e EURO 2008.  

Koefiçientët për EURO 2008

Gjermania:    4.75
Spanja:    7.00
Italia:        7.00
Portugali:    8.50
Franca:    10.00
Holanda:    14.00
Kroacia:    14.00
Rep. Çeke:    15.00
Zvicra:        23.00
Greqia:    26.00
Suedia:    29.00
Rusia:        29.00
Rumania:    34.00
Polonia:    41.00
Turqia:        41.00
Austria:    81.00

Gjermania, Portugalia, Italia dhe Spanja, 4 çerekfinalistët e parë
Edhe përsa i përket ndeshjeve në grupe dhe renditjeve që do të ndikojnë në kalimin në çerekfinale lider sipas bastexhinjëve do të jenë katër ekipet e para, Gjermani, Portugalia, Italia dhe Spanja. Këto të fundit parashikohet të jenë ekipet që do të përfundojnë të parat në ndeshjet në grupe dhe në përballjet në çerekfinale do të kenë një kundërshtare e cila do të renditet e dyta në një nga katër grupet e EURO 2008. Koeficienti i Portugalisë si lider e grupi A është vetëm 2.35 teksa si vend i dytë shihet Republika Çeke e cila kuotohet me 3.25. Në grupin B e para me kuotat më të ulëta jepet Gjermania dhe pas saj Kroacia. Në grupin C, Italia sipas bastexhinjëve do të vërë veton e saj dhe në vendin e dytë mund të renditet Franca. Në grupin D, Spanja do të mposhtë konkurrencën e Rusisë, Suedisë dhe Greqisë. Këta të fundit jepen vetëm si vendi i dytë në grup. Në pak fjalë sipas koeficienteve të dhënë nga sallat e basteve skuadrat që do të kalojnë në çerekfinalet e EURO 2008 do të jenë Portugalia, Republika Çeke, Gjermania, Kroacia, Italia, Franca, Spanja dhe Greqia. Ndërsa skuadrat që do të eliminohen që në ndeshjet në grupe do të jenë, Zvicra, Turqia, Polonia, Austria, Holanda, Rumania, Suedia dhe Rusia.

Koeficientet për renditjen në grupe

Grupi A
1) Portugalia:    2.35
2) Rep. Çeke:    3.25
3) Zvicra:    4.25
4) Turqia:    7.00

Grupi B
1) Gjermania:    1.60
2) Kroacia:    3.25
3) Polonia:    8.25
4) Austria:    17.00

Grupi C
1) Italia:        2.50
2) Franca:    3.00
3) Holanda:    3.55
4) Rumania:    10.50

Grupi D
1) Spanja:    1.95
2) Greqia:    4.85
3) Suedia:    4.85
4) Rusia:    5.35
 




____________
\"Mos shikoni kishat as xhamijat se feja e shqiptarit eshte shqiptaria.\"