Ai gjithmonë ka thënë dhe vazhdon të thotë se ende nuk ka vendosur se çfarë do të bëjë zyrtarisht në periudhën "post Formula 1". Ajo që është e sigurt, është fakti se jeta e Majkëll Shumakerit do të jetë e ndryshme nga ajo që kishte bërë deri në fund të sezonit 2006. Thuhet se do të jetë asistenti i Zhan Todtit, por edhe njeriu imazh i Ferrarit dhe i grupit Fiat. Gjithsesi, asnjë detaj rreth këtij "profesioni" të ri.
Përfitimet: Shumi është një "shoqëri", e cila prej disa vitesh ka fitime marramendëse. Menaxheri kryesor i saj është Vili Veber. Tani që është larguar nga garat, Majkëlli duket se ka dëshirë të ketë një lidhje më të drejtpërdrejtë në shoqërinë "Shumaker". Sipas disa llogarive, thuhet se fitimet do të vazhdojnë të shkojnë deri në 10 milionë euro në vit. Ka ende disa sponsorë, të cilët kërkojnë të përfaqësojnë produktet e tyre me ish pilotin gjerman. Të paktën janë dy sponsorë kryesorë që kanë kërkuar t'i shtyjnë kontratat e tyre, edhe pse Majkëlli është larguar nga profesioni i pilotit të Formulës 1. Firma e parë që shtyu kontratën, ka qenë "Deutche Vermogensberatung", një firmë që merret me menaxhimin e pasurive të gjermanëve. Numërohen rreth 4 milionë klientë në këtë firmë që e çojnë buxhetin e saj deri në 123 miliardë euro. Stema e kësaj kompanie vazhdon të jetë në kapelën që mban Majkëll Shumaker. Sigurisht, nuk do të ndryshojë as ngjyra e kuqe e kësaj kapeleje. Një tjetër sponsor gjigant është "Omega", një ndër firmat më prestigjioze të orëve.
Karburanti: Edhe firma "Shell" e karburanteve duket se nuk bën dot pa 7 herë kampionin e botës të Formulës 1. Menjëherë pas përfundimit të sezonit 2006, ajo realizoi një spot publicitar me protagonist Majkëll Shumakerin si shërbyes i një pike karburanti. Si përfundim mund të themi se Shumi ka arritur të firmosë kontrata edhe me dy sponsorë të tjerë. Bëhet fjalë për firmën e prodhimit të ujit mineral "Rosbacher" dhe për firmën "Auto Teile Unger", e cila merret me pjesë këmbimi për automobilë.
Bamirësia: Nuk është e nevojshme që të përmendim shpeshherë emrin e Majkëll Shumakerit për veprimtaritë që ka në këtë fushë. Çdo vit ai dhuron miliona dollarë ose euro për bamirësi. Ai ka disa vite që është edhe ambasadori i UNICEF it. Ish piloti i Ferrarit bashkëpunon me firmën gjermane "Kinder" për të ndihmuar fëmijët në nevojë në të gjithë botën.
Pasuria: Le të rikthehemi te biznesi. Shumakeri prej kohësh ka një kartë, në të cilën shkruhet titulli "President". Kjo është një kartë e shoqërisë "MSTracy". Në pamje të parë, qendra e kësaj firme është një shtëpi e thjeshtë, por e vëzhguar mirë nga kamerat dhe ka një derë kryesore të blinduar. Në të vërtetë, nga firma "MSTracy" nuk dihen shumë gjëra. Gjithsesi duket se është pikërisht kjo qendër ku ndodhet dhe kasaforta kryesore e pasurisë së familjes së Majkëllit. Një pasuri që i ka dhënë mundësinë për të ndërtuar një rezidencë të re, e cila ka një projekt prej 25 milionë eurosh. Tani që është jashtë garave, Majkëlli do të ketë mundësi të ndjekë punimet më nga afër dhe të presë shiritin e inagurimit shumë shpejt, duke ditur se është parashikuar që gjithçka të përfundojë brenda pak muajve. Shtëpia e ëndrrave të Majkëllit dhe Korinës gjendet në mes të La Rezerv dhe në një teritor prej 13 hektarësh. Ka një pamje panoramike në liqenin e Lemanos. Sigurisht, tani që Majkëlli është në "pension" do të ketë më shumë kohë të lirë për pasionet e tij. Pa dyshim që një nga pasionet e tij parësore është futbolli. Skuadra zvicerane Ekikens që ndodhet pranë shtëpisë së tij, ka kërkuar që Majkëlli të shkojë më shpesh dhe ndoshta brenda disa vitesh mund të futet në formacionin e veteranëve. Gjatë muajit të dimrit do të ketë gjithashtu mundësi për t'u marrë me ski. Ai preferon Trysilin në Norvegji, ku ka një tjetër shtëpi prej druri. Ai ka premtuar se nuk do të lërë mënjanë dhe disa sporte të tjera ekstreme që ka përzemër, si parashutizmi.
Babai: Nuk duhet të harrojmë se ai ka tashmë edhe rolin e një bashkëshorti dhe babai të mirë. Pa dyshim që për Majkëllin këto janë detyrat e tij kryesore tani që është larguar nga garat. Ai do të ketë më shumë kohë për të dy fëmijët, Xhina Marian dhe Mikun. Nga ana tjetër, bashkëshortja e tij, Korina, vazhdon të ketë një pasion të madh për kuajt.


Berni Ekleston (pronari i Formulës 1)
"Me Majkëll Shumakerin kam pasur një rol tepër aktiv. I kam organizuar gjërat që ai të kalonte në 1992-shin te Benetoni: negociova me të gjitha aspektet. Nuk jam unë ai që e bëra të fitonte, por kam qenë ndërmjetësi në disa marrëdhënie të tij".

Aleks Zanardi (ish-pilot i F1-shit)
"Në Kart, italianët dominonin. Më 1986-n, në Goteborg ishte me 24 sekonda diferencë nga vendi i parë, por fitoi europianin pasi më kaloi në xhiron e fundit. Në mbrëmmje u tregua i sjellshëm dhe më tha: "Ma dhuruat fitoren". Dhe unë u përgjigja: "Epo, jam i kënaqur që të dhuruam ty që je kaq simpatik".

Flavio Briatore (menaxher i përgjithshëm i Renault-së)
"Më 1991-shin me Jordan, por e dija që atë vit Shumi nuk kishte kontratë me atë skuadër. Kështu që e ftova në shtëpinë në Londër dhe i ofrova një kontratë trivjeçare. Ai tha menjëherë po dhe garoi në garën e radhës në Monza".

Loris Kapirosi (pilot i Moto GP)
"Majkëlli jashtë piste është një person i mrekullueshëm,
komplet ndryshe nga ai që njihet në televizione dhe gazeta. Një natë, kur ishim në mal, bëmë një sfidë se kush pinte më shumë:
Unë i hidhja grapa, por në gotën time hidhja ujë. Ai e kuptoi, pasi kishim kthyer disa gota".

Jarno Truli (pilot i F1-shit)
"E kam parë për herë të parë në vitin 1994 në Lonato, në Breshiano.
Ishin finalet e kampionatit kart, unë po e fitoja dhe ai vinte aty për t'u dëfryer. Fliste pak dhe ishte i përqendruar te sfida. Fitova unë. Iku i mërzitur, por tha fjalë të mira për mua kur mbërriti në F1".

Luciano Beneton (shefi i Benetonit)
"Ne sapo ishim futur në F1. Para garës së Monzës, Flavio Briatore në rolin e menaxherit të skuadrës, më tha se kishte gjetur një pilot të ri me emrin Shumaker. Kur e njoha, më habiti për mënyrën e drejtpërdrejtë që i thonte gjërat dhe për mënyrën logjike që ndërtonte fjalët".


Valentino Rosi (pilot i Moto GP)
"Kur kryeja testet me Ferrarin, unë i kërkoja ndihmë, por ai më fliste për motorët. Moto GP është më spektakolar, Formula 1 është më e vështirë për ta kuptuar. U kënaqa shumë kur e takova në Muxhelo. Ai erdhi dhe më takoi në bokse. Për kë bërë tifozllëk? Për mua, sigurisht".

Rendi Mamola (ish piloti i Ducatit)
"Për Majkëllin ka qenë gjithmonë e thjeshtë të garojë me shpejtësi të madhe. Fizikisht ai ka qenë më i përshtatshmi dhe e njeh pistën e Muxhelos në mënyrë perfekte. Është një pilot i madh dhe është adhurues i shpejtësisë së madhe".

Andrea Doviciozo (pilot i Moto GP)
"Kam luajtur me të disa ndeshje dhe më ka lënë përshtypje profesionalizmi i tij. Edhe për Kalçiton përgatitej në mënyrë të ekzagjeruar. Pastaj, edhe pse ishte në fillim të Çmimit të Madh, ai impenjohej në maksimum. Nuk mendonte për garën, por vetëm për t'u nisur dhe për ta fituar".

Edi Xhordan (ish-pronari i Jordan)
"Mbaj mend që kur erdhi në Spa, nuk kishte as edhe një krevat për të fjetur. I thashë: E njeh pistën? Ai më tha po. Ishte një gënjeshtër. Ai s'kishte garuar asnjëherë më parë. Bëri një xhiro me biçikletë një ditë përpara se të hipte në Jordan. Ditën tjetër ishte shumë i shpejtë. Kështu lindi Shumi".


Xhankarlo Fizikela (pilot i F1-shit)
"Kur luanim futboll me përfaqësuesen e pilotëve, me Majkëllin komunikoja shumë dhe në fushë merreshim vesh shumë mirë. Mbaj mend se kur ishim me Jordanin ose Sauberin, bënim aksione shumë të bukura dhe shumë gola. Njëherë u përqafuam dhe më tha:
Çfarë dyshe sulmuese jemi!"

Xheki Stjuart (ish-pilot i F1-shit)
"Ai është përmirësuar vit pas viti. Në 2006-n, mbi të gjitha ka treguar gjithë eksperiencën që grumbulloi ndër vite. Në fillim ishte më i ashpër, ndërsa në 2006-n tregoi qetësi të madhe. Ndërsa për faktin që ka qenë më i miri, mendoj se duhet të jemi të rezervuar, sepse ai ka fituar gjithmonë me makinën më të mirë".

Xhoni Hetbert (ish shoku skuadrës te Beneton)
"Kemi qenë shokë skuadre te Benetoni në dy vitet e fundit. Mes gjithë episodeve që kemi përjetuar bashkë, mbaj mend atë përmbysje në 1995-n në Spa. Për këtë dhe për raste të tjera që më kujtohen, mund të them që Majkëll ka qenë një pilot i madh. Edhe pse nuk më linte të lexoja të dhënat e telemetrisë. Ishte pak xheloz".

Endi Tufa
 




____________
\"Mos shikoni kishat as xhamijat se feja e shqiptarit eshte shqiptaria.\"