Kur të gjithë preferencat shkojnë për mëndafshin dhe këpucët elegante. Dhe kur të minifundet apo ngjyrat janë absolutisht të ndaluara. Atëherë kemi garderobën e duhur

Nëse për të përcaktuar karakterin, defektet, mënyrën e sjelljes apo gjithçka tjetër, me një përcaktor të vetëm, kur vjen puna tek veshja kjo mund të bëhet fare mirë për Rudina Xhungën: thjesht klas. Ndoshta për shkak të profesionit, ndoshta për hir të kamerave, ndoshta sepse është rritur aq sa të kuptojë se cila është veshja me të cilën të marrin seriozisht e cila është ajo me të cilën bëhesh e papranueshme, apo ndoshta edhe për të gjitha këto arsye bashkë, Rudina tani është ajo që është: një femër për të cilën mund të thuash se e ka tashmë stilin e vet. Megjithëse ajo vetë nuk është njëqind për qind e sigurt për këtë. Nuk pranon të ketë një stil të përcaktuar veshjeje. Nëpër vite ka kuptuar se mbase nuk di të vishet shumë mirë, por ama e di shumë mirë se çfarë nuk duhet të veshë. Dhe prandaj kur niset të blejë apo të qepë rroba, niset pikërisht nga ky kriter: të mënjanojë menjëherë ato që nuk duhen, ato me të cilat nuk do të ndihej kurrsesi vetvetja. Dhe kur seleksionimi përfundon, gjithçka është më e lehtë.


Të ndodhesh pranë kanateve të hapura të gardërobës së Rudinës, menjëherë kupton se jo të gjitha llojet e rrobave përdoren prej saj. Kur vjen puna tek lista e gjërave absolutisht të papërdorshme, ajo e nis me minifundet. Urren veshjet vulgare dhe nuk preferon dekoltetë dhe veshjet transparente. "Thonë që më shkojnë, por unë nuk ndihem mirë". Dhe ajo që bie në sy sakaq është mungesa e larmisë së ngjyrave. Nuk pëlqen ngjyrat shumë të theksuara. "Para disa ditësh bëra për të qeshur mikeshat e mia dhe shitëset në një dyqan, që përpiqeshin të më bindnin se një fustan ciklamin i ndezur, dekolte dhe i shkurtër, më shkonte shumë, kur thashë se ai fustan më tmerronte."

E nëse do të përpiqeshit të dinit se nga ç’derë del klasi i Rudina Xhungës, nuk u mundoni kot. Ajo nuk ble rroba në ndonjë dyqan të përcaktuar. “Kryesisht i kam qepur, sidomos veshjet e verës, prej më shumë se 6 vitesh tek e njëjta mikeshë,

që quhet Tefta. Kur dal jashtë, blej ato që më duhen, por mundësisht jo kur jam vetëm, por e shoqëruar nga Arlinda, mikja dhe botuesja ime, që nuk ka shoqe në zgjedhje”.

Pikërisht sepse ka klas në veshje, Rudina Xhunga preferon mëndafshin. I krijon ndjesi shumë të mirë ky material. E nëse do të ishte ky një moment përkëdhelie për veten, pse të hiqte dorë! Ama vetëm kaq, sepse Rudina megjithëse nuk mund t’i shmanget  dot tundimit të çdo femre për të folur për veshjen, nuk mund të merret shumë gjatë me këtë lloj argumenti. Sapo nis të të thotë se ajo bluzë që ka në trup është e  firmës… Ej, ajo nuk është nga ato që mund të flasin për orë e orë të tëra për firmat e njohura apo për shoppingun. Firma është e rëndësishme deri në momentin që atë e bën të ndihet mirë brenda veshjeve të zgjedhura.

“Edhe tërhiqem, por jam e kujdesshme dhe e kushtëzuar nga portofoli. Më

pëlqen “Burberry”, për çanta, rripa dhe çadra, ndërsa për veshje “Max Mara”.

E nëse dikur blinte rroba pa fund, tani e ka rralluar disi, sepse shpenzon aq sa ka.

“Nuk mundem të blej gjithë çfarë dua, por i dua ato që kam. Nuk çmendem befas dhe të lë gjithë kartën e kreditit në një dyqan dhe nuk hyj tek njerëzit, që kur janë të mërzitur, shpenzojnë paratë për veshje. Blej kryesisht çfarë kam planifikuar më parë.

Dhe ky plan blerjeje patjetër që do të detajohet më thjesht, sidomos kur modeli që ndiqet është selektuar me kohë. Një femër që shquhet për klas në veshje nuk mund të kishte model tjetër përpos atyre që ka edhe Rudina: Xheki Kenedi dhe Ledi Diana. Këto janë personazhet që ka pëlqyer ngaherë në modelet e veshjeve dhe që kur qep diçka, do ta përafrojë me stilin e tyre. Prandaj edhe ka aq me shumicë veshje klasike. Edhe për shkak të emisionit, klasikja është përcaktuese në gardërobën e saj, në tipin e saj, deri dhe në mënyrën e saj të të qenit, ajo është klasike.

Por nëse gjatë gjithë vitit ku më së shumti i duhet të jetë pranishme në ekran, veshja e saj përmblidhet kryesisht tek klasikja, gjatë verës dhe ndërprerjes së emisionit, ka më shumë sportivitet në veshje, por edhe ai është sportivitet klasik. Dhe meqë jemi në një prej këtyre ditëve, Rudina ka dalë nga korniza strikte e studios së televizionit dhe ka veshur xhinse blu të zbardhura me bel lart “Diesel”, bluzë të bardhë “Dnk”, rrip

“Burberry” dhe rreth flokësh po të tillë.

Veshja e xhinseve nuk është rastësi, apo një mënyrë për të plotësuar detajet e një veshjeje sportive. Asaj i pëlqejnë shumë xhinset, por thotë se nuk di t'i zgjedhë të duhurat. Gjithmonë përfundon duke veshur jo xhinset që blen vetë, e që shumë shpejt ngelen brenda sirtarit sepse nuk i pëlqejnë, por xhinset që Gerta, një shoqe e saj, blen për vete dhe përfundon duke ia dhuruar Rudinës.

Kurse sa u përket përzgjedhjes së ngjyrave, ajo e ka shumë mirë të përcaktuar se çfarë ngjyre duhet të ketë një veshje për të plotësuar kushtet e Rudinës për t’u bërë pjesë e gardërobës së saj. Kryesisht vë gishtin tek ato rroba që kanë ngjyrat bardh e zi dhe të gjelbër, pa lënë mënjanë edhe shumë të tjera që i vesh me shumë dëshirë. më e rreptë duket për sa u përket modeleve të rrobave. Më të preferuarat janë fustanet pas trupit, me bel dhe të gjera poshtë. Kryesisht preferon të njëjtat modele veshjeje, edhe për kostumet që i pëlqejnë më shumë xhaketë dhe fund mbi gju e më pak xhaketë e pantallona.

Nuk mund të thuash kurrsesi se veshja është qëllimi i jetës së Rudina Xhungës. Ama, për të, veshja është shumë e rëndësishme. Dikur kishte lidhje me humorin dhe gjendjen e saj shpirtërore. Për shembull, në ditë me hënë të keqe, veshja e reflektonte këtë dhe më shumë. Tani, me kalimin e kohës, ka kuptuar se sidomos në ditë të tilla duhet të vishet edhe më mirë, pasi asnjëherë nuk duhet pranuar, as para vetes se "sot, ti nuk ndihesh mire". Ky është sekreti i saj. Ndaj mos prisni që të lexoni tek Rudina Xhunga shenjat e humorit jo të mirë. Sepse sidomos në një ditë të tillë, veshja dhe klasi i saj, do të dinë ta maskojnë shumë mirë.
 




____________

Lot Dielli