Greta Koçi,

lindur më 26 shtator 1991 në qytetin e Kuçovës e banuese në Tiranë.
Vazhdon studimet në vitin e dytë të shkollës 'Eurolingua' (private) në gjuhët anglisht-frëngjisht.

Talenti i saj është shfaqur në moshën 5-6 vjeçare, ku fillimisht ka drejtuar emisionet e fëmijëve në stacionin televiziv të babait të saj Shkodra TV1 në Shkodër.

Fillimisht është shfaqur në TV me një videoklip në moshën 7 vjeçare, më pas i është përkushtuar tërësisht këngës.

Në moshën 12 vjeçare ka fituar çmimin e parë në konkursin e interpretuesit më të mirë live që u zhvillua në Radio Tirana.

Në moshën 13 vjeçare u realizua bashkëpunimi me këngëtarin Erjon Korini me këngën 'Kush ka faj' e cila pati sukses të madh.

Në vitin 2005 mori pjesë në festivalin e Këngës Magjike 2005 me këngën 'Kam mall' të kompozuar nga Florjan Mumajezi dhe tekst të Turian Hyskës.
Të dyja këngët e mesipërme kanë qënë hitet e momentit.

Në muajin prill 2006, realizoi 3 këngë të reja me tre kompozitorët më të mirë maqedonas: Maki, Darko Dimitrov, Ocko, përkatësisht: Bëj be që s’të dua, Dashuri pa shije, Një here po një herë jo
Po këtë muaj ka realizuar dy këngë me kompozitorin Adrian Hila: Zemra për ty ndal dhe Ik nga unë tani. Më 7 tetor 2006 fitoi çmimin e pare në festivalin: Mikrofoni i artë, me këngën: Foli djalit të kompozuar nga Genti Lako.

Më datë 2 dhjetor 2006 hedh në treg albumin e saj të parë të titulluar : Mos shiko tjetër me ekskluzivitetin e shtëpisë diskografike Eurostar. Më datë 15 dhjetor 2006 promovon albumin në Prishtinë nën ekskluzivitetin e kompanisë Antika. Kompozitori Genti Lako ka realizuar dy këngët e fundit të albumit: Mos shiko tjetër me këngëtarin kosovar Labinot Tahiri dhe kengën Kërcim dashurie. Më 21-23 dhjetor 2006 mori pjesë në Festivalin e 45-të Kombëtar të Këngës në Radiotelevizion me këngën Eja zemër të kompozuar nga Genti Lako dhe tekst të Arben Dukës.


Modifikuar për herë të fundit nga _CharmingLady_ në 13 Prill 2007 07:29, Modifikuar 1 herë gjithsej

Greta Koçi ka vendosur të largohet përfundimisht nga prindërit. Por vetëm në aspektin artistik, sepse në jetë ajo vazhdon të jetë ende vajza që nuk shkëputet dot nga familja. Pas daljes së albumit të saj të parë “Mos shiko tjetër”, këngëtarja 15-vjeçare ka vendosur të heqë dorë nga vetëmanaxhimi. Duke synuar ndoshta edhe skenat botërore, Greta Koçi ka kaluar nën menaxhimin e “Eurocord”. Kjo do të thotë që tashmë për jetën e saj artistike, e madje edhe për intervistat nuk do të prgjigjen më mami me babin, por manaxherët e saj. “Jam rritur në famë dhe tashmë kam shumë kërkesa, të cilat nuk mund t’i përballoj dot vetë”, tregon Greta. Shumë e lumtur është shprehur këngëtarja që kolegët e kanë respektuar duke mos munguar në promovimin e albumit të saj. “Mos shiko tjetër”, prej disa ditësh është në tregun shqiptar, por edhe jashtë tij, nën kujdesin e “Eursostar”. Emra të njohur të krijimtarisë sonë muzikore, si Adi Hila, Genti Lako, Flori Mumajesi, Gjergj Jorgaqi etj, kanë krijuar këngët e këtij albumi, ndërkohë që fotot përfaqësuese janë realizuar nga studio “Horus”.
 

“Në jetën e Greta Koçit nuk ka asnjë djalë. I vetmi mashkull, që qëndron pranë saj është truproja”. Janë këto fjalët e prindërve të këngëtares 16-vjeçare, për të cilën vetëm një javë më parë, u tha se ishte e lidhur me një baterist, që luan në lokalin “Il cavalliero”. Por, sipas prindërve të Gretës, të cilët gjithmonë i kanë qëndruar pranë së bijës duke u shoqëruar madje edhe në koncertet e lokalet e natës ku ajo këndon, brenda këtij lajmi nuk ka asnjë gërmë të vërtetë, e madje tashmë ata kanë nisur një proces kallëzimi, për dëmtim të imazhit të saj publik. “Atë natë, kur thuhet se Greta është parë në lokalin në fjalë, dihet botërisht, që ajo nuk ndodhej aspak aty. Këtë e them unë dhe mund ta vërtetojnë edhe shumë njerëz, që ndoqën Gretën në një performancë në Fier”, shprehet e ëma, e cila thekson në mënyrë të veçantë se nuk i intereson aspak karriera, përpara karakterit të vajzës. “Greta ende nuk ka mbushur 18 vjeçe dhe nuk mund të jetë aspak normale të flitet për një lidhje në jetën e saj. Për më tepër, ajo gjithmonë ka qenë e shoqëruar nga ne dhe kjo dihet tashmë”, vazhdojnë të shprehen prindërit e Greta Koçit, të cilët shtojnë se vajza e tyre tashmë është duke jetuar një sukses të vërtetë muzikor.
 

Pa dyshim, që në festën e organizuar për promovimin e albumit të Greta Koçit, dominonin këngëtarët, por nuk kanë munguar as aktorët dhe natyrisht mediat, tek të cilat Greta është shprehur se po jep intervistën e fundit, të pakten për këtë vit. Por edhe më pas daljet e saj do të jenë shumë të menduara. Interesant është fakti, që në festën e promovimit, ka pasur një përzierje këngëtarësh, të muzikës së lehtë dhe asaj popullore. Nuk kanë munguar aty Rozana Radi, Pirro Çako, Rezarta Shkurta me të fejuarin Ermal Hoxha, Ingrid Gjoni me të dashurin Enean, Anjeza Branka me Leonardon, Besmir Metani me të dashurën, Poni, Sabiani me të dashurën, Klajdi Musabelli, Erion Korini, Valbona Mema, Valbona Halili, Gena etj. Interesante ishte pjesëmarrja e aktorëve Xhevdet Ferri, Naun Shundi, por edhe e djemve të grupit “SHBLSH”, të cilëve iu ka munguar vetëm Ermali.
 

Menjëherë pas ndarjes së çmimeve, këngëtarja Bleona Qerreti është parë të hyjë në dhomën e këngëtarëve, e shoqëruar nga bashkëshorti i saj Gani Bardha. E larguar prej pak muajsh nga Shqipëria, Bleona është rikthyer sërish në Tiranë. Menduam se ndodhej aty për t’u përshëndetur me disa nga kolegët e saj, por në fakt Bleonën e pamë të bisedonte vetëm me Greta Koçin, që ndërkohë vazhdonte të qante. Këngëtarja 16-vjeçare, konkurrente në festival, mesa duket është ndjerë keq që nuk u vlerësua me çmim dhe Bleona ndodhej aty për ta ngushëlluar, duke i thënë se kjo ishte performanca e saj më e mirë, pavarësisht se nuk u vlerësua me çmim.
 

Jo shumë ditë më parë botuam në “Bluetooth” një thashethem të fundit që po qarkullonte nëpër lokalet e Tiranë, se Greta Koçi ishte parë tek “Cavaliero” duke u përqafuar me bateristin e bandës së Altin Shehut, që luan live në atë pub. Por sipas disa informacioneve të tjera që na mbërritën pas botimit të këtij thashethemi, mësuam një tjetër variant: vajza që shoqëronte bateristin atë fundjavë nuk paska qenë Greta Koçi, por një tjetër këngëtare. Sipas këtij varianti të ri, na rezulton se paska qenë Besa ajo që u është dukur si Greta të rinjve që kanë përcjellë lajmin jashtë mureve të “Cavalieros”. E vështirë për t’i ngatërruar këto dy këngëtare, që nuk kanë pothuajse asgjë të ngjashme me njëra-tjetrën. Por ja që kështu duket se ka ndodhur. Dhe në fakt, duke iu referuar zërave të shumtë që na kanë dëshmuar se bateristi i bandës së Altin Shehut është prej kohësh i dashuri i Besës, duhet të besojmë më shumë këtë variantin e fundit të historisë të puthjeve në pub-in “Cavaliero”. Çka do të thotë se Greta del automatikisht jashtë këtij thashethemi, brenda të cilit qenka përfshirë thjesht prej një ngatërrimi imazhi. Pra, përfundimi i gjithë kësaj historie, thënë më shkurt është: ato puthje e përqafime nuk i përkasin aspak Gretës, por Besës.
 

Një ndër aspiratat e Gretës është që t’i filloi studimet në Londër. Këngëtarja 16 vjeçare ëndërron të bëhet prezantuese e stacionit televiziv MTV


“It’s Greta time!” është shprehja e parë që më shkon ndërmend kur nis të shkruaj këtë artikull për vajzën që ende nuk i ka mbushur 16 vjeç por që po shijon një sukses të paimagjinueshëm. Dashuria për muzikën ka lindur vite më parë kur ishte ende një fëmijë dhe tashmë gjithçka është realitet. Prej tri vitesh Greta investon në këngë e videoklipe. Gjithçka nisi me pjesëmarrjen në dy konkurse për zbulimin e talenteve të reja në këngë ku shkëputet dhe vendos të promovojë talentin e saj në studiot e kompozitorëve. Prezantimi i parë në bashkëpunim me Erion Korinin, i hapi asaj rrugën në një karrierë solo dhe jeta e Gretës morri një tjetër drejtim. E përkushtuar tërësisht pas këngës, as shkolla nuk i mbeti pas. Nxënësja e shkollës së mesme private “Euro-Lingua” studion në degët anglisht dhe frëngjisht dhe është e prirur për të mësuar gjuhë të tjera. Një ndër aspiratat e Gretës është që t’i filloi studimet në Londër. Ambiciet e saj shkojnë edhe më tej: ajo ëndërron të bëhet prezantuese e stacionit televiziv MTV, në Amerikë apo në Angli, plane këto të cilat ajo është e bindur se janë të realizueshme. Të jesh në vëmendjen e vazhdueshme të medias nuk përbën problem për Gretën. Përkundrazi është pjesë e strategjisë së saj për të rrëmbyer sa më shumë fansa. Për momentin, ajo po përflitet nga mediat jo për talentin e saj, por për një proces gjyqësor kundër një gazete të përditshme në Tiranë. E shoqëruar çdo moment nga dy prindërit, me maturinë e saj, ajo u përgjigjet pyetjeve duke shprehur edhe padurimin për koncertin e radhës, që do të mbahet më 11 mars, në Londër. Fundvitin e kaluar, Greta Koçi hodhi në treg albumin e saj të parë, titulluar “Mos shiko tjetër” dhe tashmë punon për albumin e dytë. Sukses, famë dhe para. Çfarë tjetër mund të ëndërronte një bashkëmoshatar i saj? Për Gretën kjo ëndërr tashmë u realizua.

Axhenda juaj është tepër e ngarkuar. Kjo do të thotë që shkoni në shkollë vetëm një herë në javë?
(Qesh...) Jo... përkundrazi, shkoj në shkollë rregullisht pasi gjuhët e huaja janë pasioni im. Tani më ndodh të bëj mungesa për shkak të punës së mbingarkuar por i falënderoj mësuesit e mi që më kanë bërë edhe tolerime. Megjithatë, unë studioj edhe në shtëpi.

Ndonjë koment për këngën magjike?
Mora pjesë me një këngë të bukur, që u vlerësua shumë nga publiku. Nuk mora atë çfarë vërtet meritoja në atë festival dhe kam mbetur e habitur nga ajo eksperiencë, por unë vazhdoj ta them që vlerësimi më i madh është publiku. Për ta mbyllur me pak fjalë, më ka ardhur keq për atë skualifikim.

Po për festivalin e këngës në radiotelevizion?
Dihet tashmë që festivali i fundvitit është një skenë e madhe ku realisht këndojnë artistët e mirëfilltë shqiptar, dhe mes tyre isha edhe unë. Fatmirësisht këtë vit edhe publiku më priti mjaft mirë dhe si çdokush tjetër që merr pjesë në atë festival edhe unë prisja çmimin e parë pasi kam punuar një këngë enkas për në eurovizion.

Mendon se performanca juaj në natën finale mund të ishte në nivele më të lartë?
Mendoj se ajo ka qenë një performancë e pëlqyeshme dhe për këtë jam e bindur duke pasur parasysh edhe mendimin e kritikëve të muzikës të cilët më kanë komplimentuar.

A është e vërtetë që ende nuk e keni marrë vlerën monetare që ju akordua në festivalin Mikrofoni i Artë si fituese e këtij edicioni?
Unë të jem e sinqertë nuk merrem fare me anën monetare. Kjo i takon familjes time dhe manaxherit. E rëndësishme për mua është muzika por di që lekët ende nuk janë tërhequr. Nuk e di çfarë ka ndodhur në të vërtetë.

Kush i financon këngët dhe klipet e tua ?
Kam sponsor dhe një pjesë të mirë të shpenzimeve i mbulojnë ata, por edhe nga të ardhurat e mia kam arritur të mbuloj shumë shpenzime.

Kujt ia dedikon gjithë suksesin që ti ke arritur deri tani?
Nuk diskutohet që mbi të gjitha me fat, i pari zëri që e kam dhuratë nga zoti, dhe së dyti shumë e rëndësishme edhe kjo, prania e prindërve të mi. Është fati më i madh që kam sepse ti mund të kesh shumë dëshira por pa mbështetjen e tyre nuk do të mund të arrija aty ku jam.

A ke përfituar nga bashkëpunimet me kolegët tuaj?
I pari ka qenë bashkëpunimi me Erion Korinin kur unë po përgatitesha të hidhja në treg një këngë solo. Ai më rekomandoi të realizonim këngën së bashku dhe pasi e dëgjova më pëlqeu dhe mu duk e përshtatshme. Më pas me Indritin,vendosa për bashkëpunimin pasi më pëlqen shumë muzika popullore dhe kjo ishte e vemja këngë me ritme të mirëfillta popullore. Më bëhet qejfi që u prit mirë në publik. Ndërsa me Labinotin ishte një sukses i dyfishë, për mua në Kosovë dhe për Labin në Shqipëri. Kjo këngë vazhdon ende të mbetet një ndër këngët më të transmetuara.

Ti ngjisësh shkallët me shpejtësi, do të thotë ti zbresësh në të njëjtën mënyrë. Të tremb ky fakt?
Jo nuk mendoj kështu. Nëse je një këngëtare profesioniste dhe ke një zë të pëlqyeshëm në publik, dhe realizon këngë të bukura, di të sjellësh gjithmonë diçka të re, ndaj Greta ka shumë për të dhënë.

Së fundmi po përfliteni për një akuzë për shpifje ndaj gazetës “Shqiptare”. Çfarë ndodhi?
Po mendoj se ishte një shpifje,e kësaj gazetë për ulje të imazhit tim. Sapo e lexuam lajmin kontaktuam me gazetën dhe i kërkuam që të bënin përgënjeshtrimin si dhe të më kërkonin falje publike.

Çfarë dëmshpërblimi keni kërkuar ?
Kërkoj falje publike nga kjo gazetë sepse jam prekur nga kjo shpifje. Pastaj, janë avokatët e mi ata të cilët do të vendosin për dëmshpërblimet në vlerë monetare, por unë shpresoj që gazeta të kërkojë falje publike sa më parë, më e pakta që mund të pritet.

Me cilën këngëtare nuk do të doje të krahasohesh?
Nuk më pëlqen të përmend emra. I të gjithë i kam miq, dhe nuk dua të përmend persona pa vlerë.

Sa larg shkon ambicia e juaj profesionale?
Unë dua të realizoj një këngë në gjuhën angleze dhe synoj ta prezantoj në MTV-në evropiane dhe atë amerikane. Tashmë këngët e mia transmetohen në MTV-në ballkanike dhe jam pozicionuar e katërta me këngën “Dashuri pa shije”. Po ashtu dëshiroj të marr një bursë studimi në Londër.

Ke menduar të jetosh jashtë shtetit. Cila do të ishte arsyeja që do t’i thonit “Lamtumirë” Shqipërisë?
Lamtumirë kurrë nuk do ti thoja Shqipërisë. Ndoshta, një arsye për tu larguar për ca kohë do të ishte studimi jashtë vendit, dhe t’a filloi karrierën time, fillimisht të bëj një lidhje me shtëpi diskografike dhe kompozitorë të huaj.

Këtë të shtunë së bashku me dy prindërit e tu do të udhëtoni drejt Londrës për të marrë pjesë në koncert. Si ndihesh pak ditë para udhëtimit?
Po, është e konfirmuar tashmë, që do të jem në një koncert në Londër më 11 Mars dhe e pres me padurim këtë koncert si dhe faktin që do të njihem me një ndër kryeqytetet e mia të preferuara. Shpresoj që të kaloi mirë në këtë koncert dhe të pranishmit të argëtohen. Nuk më mbetet gjë tjetër veçse t’ju them, shihemi në Londër të dielën.
 

Boo sa e zhvilluar qe eshte goca!!!
Zerin e ka te bukur, dhe kenget gjithashtu.  
 




____________

Lot Dielli

lalalalalala cause I am the one, cause you are the one

Me pelqejne shume kenget e Gertes Yll fare eshte.
 

E keni degjuar kengen "Mos shiko tjeter" bashkpunim me Labin
 

“10 mijë eurot do t'i shpenzoj për muzikë”

Nëse prindërit e Greta Koçit kanë investuar për të deri këtu, një pyetje normale mund t'i bëhet fitueses së "Top Fest": Ç'do të bëjë ajo me 10 mijë eurot e marra. Dhe 15-vjeçarja që gjithmonë është treguar e rritur dhe në përgjigjen e kësaj pyetjeje tregohet po kështu. "Do t'i shpenzoj për të bërë këngë". Sidoqoftë ajo e lë shpejt mënjanë këtë temë, për të është një lumturi e madhe ajo që i jep ky çmim, jashtë parave. Dhe kjo për faktin se ky çmim vjen direkt nga votat e publikut. Një hap përpara në karrierën e vjetër të vajzës së vogël në moshë që nuk ndahet për asnjë çast nga prindërit e saj. Të cilët, me sa shihet nga frytet, kanë ditur ta udhëheqin më së miri vajzën e tyre drejt pjekurisë profesionale e asaj personale njëkohësisht. Sepse sipas së ëmës së Gretës, e cila është gjithashtu dhe këshilltare muzikore e saj, duke qenë se është diplomuar për Flaut, rruga drejt famës kërkon sakrifica, kujdes e punë pa ndërprerje, pa lënë mënjanë asnjë detaj. Çdo këngë e Gretës para se të marrë rrugën drejt studios së regjistrimit shoshitet hollësisht në familje, ku merret vendimi unanim nëse ajo do vijë në jetë apo jo. Por çfarë thotë vetë, Greta Koçi, një ditë pasi fitoi çmimin e parë në "Top Fest".
Emri juaj ishte në krye të listës me më shumë vota nga publiku që në fillim të mbrëmjes së finales së "Top Fest"? Sa e sigurt ishit se në fund do ishit fituese?
Unë kisha dy net që isha më e votuara nga publiku, por prapëseprapë nuk e besoja kurrë që do arrija të fitoja. Megjithëse merrja shumë mesazhe dhe duartrokitesha nga publiku, përgjatë gjatë mbrëmjes mendoja se rezultati do përmbysej. E kisha shumë vështirë të besoja se do fitoja, sepse thjesht me disa mesazhe mund të rrëzohej rezultati. Më ka lumturuar shumë një mesazh që mora nga një grup të rinjsh në disko në Sarandë. Ata ishin mbledhur për një aktivitetin e tyre dhe më thanë që e kishin ndërprerë atë dhe kishin vënë një monitor të madh ku po shihnin "Top Fest"-in dhe po më votonin në çdo moment që unë të fitoja. Unë kisha emocione gjatë gjithë kohës, por ky mesazh më bëri të përlotesha. I falënderoj me gjithë zemër, të gjithë ata që më kanë votuar dhe gjithë ata që më dhanë mundësinë të arrija këtë gjë. Kam qëndruar mbrëmë gjithë natën duke parë trofeun, e prapë s'e besoja s'e kisha fituar. Kishte shumë këngë të bukura dhe ishte shumë e vështirë që të veçoja ndonjë këngë, dhe këtë mendoja se publiku do ta ketë shumë të vështirë që të dallojë se cila këngë duhej të fitonte.
Nëse s'do kishit fituar ju, kush mendoni se e meritonte çmimin e parë?
Siç thashë, kishte shumë këngë të bukura, por unë personalisht do të veçoja këngën e Tunës, "Bileta". Ishte një këngë jashtëzakonisht e bukur. Më pëlqyen gjithashtu edhe kënga e Besës, Vedat Ademit, Vesa Lumës etj.
Çfarë do bëni me paratë e fituara nga ky çmim?
Kjo është e fundit gjë që do mendoj. Akoma s'e kam marrë veten nga gëzimi i fitores dhe të them të drejtën s'më ka vajtur ndërmend fare. Por normalisht që do t'i shpenzoj për muzikën.
A ndryshon diçka në karrierën tuaj ky çmim?
Padyshim që po, është një hap përpara. Ky është çmimi i dytë që fitoj pas "Mikrofonit të Artë". Për mua është i rëndësishëm ky çmim, pasi votat vinin drejtpërsëdrejti nga publiku. Dhe për një këngëtare të votohesh nga njerëzit është një kënaqësi shumë e madhe.
Si do ndiheshit nëse s'do fitonit pasi qëndruat në vend të parë për pjesën më të madhe të mbrëmjes?
Sigurisht që do të mërzitesha dhe do të zhgënjehesha shumë. Domethënë në asnjë moment s'e mendoja se mund të fitoja edhe pse kur në mes këngëve shfaqej tabela me emrin tim në vend të parë mbushesha me shpresë. Por, prapë kisha frikë. Por sigurisht që do ndihesha keq nëse s'do fitoja, edhe pse e rëndësishme për mua ishte që mora pjesë.
Ju keni jeni shfaqur prej kohësh në skenë, keni bërë shumë këngë, dhe siç thatë vetë, vetëm dy vitet e fundit ky është çmimi i dytë që fitoni. Nuk keni frikë se mos imazhi juaj konsumohet apo siç mund të thonë specialistët për ato që shfaqen herët në skenë që mund të "dilni në pension" para kohe?
Jo nuk kam frikë, sepse për sa kohë bën muzikë cilësore nuk ekziston mundësia e konsumimit të imazhit profesional. Nëse nxjerr një këngë dhe është e mirë, njerëzit e pëlqejnë nuk ka mundësi konsumimi. Pastaj unë dua gjithnjë të arrij më të mirën, unë prandaj punoj me më të mirët që janë aktualisht në treg, me kompozitorin Genti Lako, koreografin Albi Nako dhe stiliste kam Rezarta Skifterin. Gjithashtu për sa i përket imazhit, unë gjithnjë përpiqem të mos e konsumoj atë. Shkoj në koncerte, jap intervista, por asnjëherë nuk shihem në çdo vend dhe pikërisht për të mos u konsumuar.
Çfarë planesh afatshkurtra dhe afatgjata keni?
Aktualisht po bëj një turne në gjithë Shqipërinë. Deri tani kam qenë në Rrëshen, Laç, Burrel. Këto turne kanë qenë një sukses i vërtetë dhe njerëzit më kanë pritur shumë shumë mirë. Këto janë pak a shumë planet aktuale. Gjithashtu dhe koncerte në Kosovë, Maqedoni, Mal të Zi.
Keni arritur në moshë të hershme shumë sukses, çfarë synoni më tej?
Synoj që të ndiqem nga një publik i huaj. Një avokat që është i njohuri i familjes dhe që jeton në Londër u ka dërguar katër shtëpive diskografike më të mëdha në botë CD-të me audio dhe klipe. Producentët në këto shtëpi diskografike janë edhe ato të Beyonce, Mariah Carey. Deri tani është bërë përzgjedhja e parë dhe njëra prej këtyre shtëpive diskografike është shprehur e interesuar.
 

Është vetëm 16 vjeç dhe ka siguruar një sukses vërtet të madh. Ka bërë të vetin trofeun e një ndër evenimenteve më të mëdha muzikore “Top Fest” duke fituar çmimin e publikut. Është një vajzë e thjeshtë, që dëshiron të mbetet kështu, e shoqëruar kudo nga prindërit, pa krijuar një shoqëri të vetën duke lënë mënjanë çdo gjë tjetër për t’iu përkushtuar këngës. Kjo është këngëtarja Greta Koçi e cila si ëndërr njëkohësisht dhe qëllim të vetin ka: të shkojë në Eurovizion.

Jeni fituesja e edicionit të katërt të “Top Fest”. Si ndiheni?
Ndihem e lumtur. Doja një këngë që ti përshtatej këtij evenimenti duke qënë se lançon muzikën moderne shqiptare. Genti Lako është ai që u kujdes më shumë, arriti të nxjerrë një këngë që të pëlqehet nga masa. Konkurova mes 194 këngëtarëve dhe arrita të futesha në finale ku garuan 36 këngë. Kënga ime “Sa më lodhe” triumfoi duke marrë çmimin e madh të publikut. Në fakt u kujdesa shumë për gjithçka duke parë me kujdes edhe veshjen dhe paraqitjen skenike, të përshtatshme për moshën që kam. Kënga shoqërohej edhe me një koreografi të realizuar nga Albi Nako i cili më ka ndihmuar shumë edhe pse ushtrimin e kapa shumë shpejt. E prisje fitoren?
Kur u shpallën rezultatet paraprake kam qenë në vend të parë me një diferencë prej 100 votash. Më pas diferenca u shtua duke kaluar ne 300. Në vend të dytë vinte Poni. Kam qenë përgjatë gjithë kohës në ankth pasi rezultati mund të përmbysej. Babai më thonte se gjatë zhvillimit të spektaklit vinin mesazhe pafund, komplimenta drejtuar këngës time. Ajo që më kënaqi më shumë ishte telefonata që erdhi nga një disko në Sarandë ku ishin mbledhur bashkë shumë shkolla nga qytete të ndryshme të Shqipërisë. Aty ishte ndërprerë aktiviteti i mbrëmjes për të votuar për mua. Ishin tmerrsisht shumë, rreth 2000 vetë dhe në telefon dëgjoja ovacionet e fansave. U emocionova shumë dhe më vinte për të qarë.
Po përgatitesh për ndonjë tjetër këngë?
Jam duke realizuar një këngë, sërish me Gentin. Është në përfundim dhe do të lançohet në verë. Është këngë ritmike, diskotekash e cila do të shoqërohet edhe me videoklip. Në Shtator-tetor do të dalë një tjetër këngë, një baladë. Aktualisht jam duke zhvilluar koncerte recitale në vende të ndryshme të Shqipërisë. Të dielën jam në Pogradec, në pallatin e sportit. Me të mbaruar, do të filloj turneun nëpër botë, kudo që ka shqiptarë. Do të udhëtoj në Kosovë, Maqedoni, Greqi, Itali, Londër etj.
Si e organizon Greta një ditë normale?
Në mëngjes jam në shkollë. Studioj në vit të tretë për Anglisht dhe Frëngjisht në shkollën privatë “Eurolingua”. Frekuentoj çdo ditë palestrën. Stërvitem për çdo projekt pasardhës që kam. Çdo të hënë nga ora 5-6 komunikoj live me fansat e mi në internet. Thuajse të gjithë ditën e kam të ngarkuar.
Shoqëroheni gjithmonë nga prindërit. Çfarë vendi zë shoqëria tek ju?
Po është e vërtetë, kudo shoqërohem nga prindërit, në ç’do takim që kam. Edhe në shkollë më çon babi. Jashtë shkollës nuk kam miq. Nuk frekuentoj absolutisht kafenetë apo shëtitjet pasi nuk kam kohë. Imagjinoni, as celular nuk mbaj. Nuk dua të komunikoj me askënd për vetë faktin se nuk dua të shqetësohem. Dua të jem aq afër me njerëzit por njëkohësisht edhe larg me ta.
Cili është personi më i afërt për ju?
Familja është e shenjtë për mua. Prindërit dhe motra ime Eni janë njerëzit më të shtrenjtë për mua.
Cila është gjëja më e bukur që iu ka ndodhur dhe çfarë ëndërroni?
Deri tani më i rëndësishmi për mua ka qenë trofeu në “Top Fest4”. Ndjej se gjithmonë jam në rritje profesionalisht dhe kjo më bën të jem mirë. Qëllimi im kryesor është të konkuroj në festivalin e fundvitit dhe të fitoj. Dua të përfaqësoj Shqipërinë vitin që vjen në Eurovizion.
Po më e çuditshmja?
Ishim në Romë. Isha shumë e lodhur nga koncerti dhe për një moment po qëndroja me mamin duke vëzhguar disa monumente që po më pëlqenin. Befas shfaqen dy kinezë dhe me zë të lartë thonë: Greta Koçi. Kjo është Greta Koçi. Nuk kemi mbajtut dot të qeshurën nga habia.
Kush nga këngëtaret e huaja të pëlqen më shumë?
Më pëlqen Kristina Agilera. Ka një teknikë shumë të mirë interpretimi. Po kështu më pëlqen edhe Pink. Unë vëzhgoj dhe marr gjithmonë atë që bëjnë më mirë, por padyshim pa dalë nga natyra ime e të kënduarit, nga vetja ime.
 




____________

Lot Dielli

Milionat e fundit ishin ato të Çmimit të Madh të Top Fest, çmim që duket se më shumë se këngës publiku ia dha Gretës. Por babai i saj pohon se vetëm nga një tur i Gretës në Ulqin familja Koçi do të përfitojë më shumë se 60 mijë euro, ndërsa të gjitha fundjavat e 16 vjeçares “sexy” janë prenotuar deri në dhjetor 2007. Sado e çuditshme të duket, vajza shkodrane është shndërruar në një biznes të vërtetë për prindërit e saj, të cilët e menaxhojnë duke fituar miliona. “Greta është një minierë ari”, - pohon i ati që në fakt është edhe ca i shqetësuar për sigurinë dhe qetësinë e Gretës kur tregon se nuk ndodh rrallë që kur nisen për ture jashtë Tirane t’i ndjekin nga pas me makina fansa deri në Burrel, Laç apo Rrëshen dhe shpesh nuk janë vajza të vogla nga ato që i shkojnë Gretës poshtë pallatit për t’i kërkuar autografe, por prototipët e të fortëve me varse e zinxhira të trashë floriri në qafë dhe makina luksoze.
Fatmir Koçi ndihet i detyruar ta mbrojë nga të gjitha këto të bijën, që është edhe biznesi kryesor i familjes. Për këtë arsye, edhe mamaja Afërdita, edhe babai Fatmiri janë të punësuarit e Gretës dhe i kanë braktisur profesionet e tyre. Nuk e lënë asnjë moment vetëm këngëtaren që u bë e njohur në moshën 13 vjeç e gjysëm kur këndoi me Erion Korinin një baladë të suksesshme. Por kishte një hile të vockël që në fillim të karrierës së Gretës. Mosha e minorenes u ruajt sekret dhe vetëm kohët e fundit është zbuluar se në fakt Greta nuk kishte faj (“Kush ka faj” titullohej kënga e kënduar me Korinin) që ishte vetëm në klasë të tetë, ndonëse dukej tek të njëzetat në videoklipin ku prindërit e saj në rolin e tyre të menaxherit ishin kujdesur që ta “shisnin” për më të madhe.
Ende duket shumë më e madhe nga ç’është në të vërtetë kur del në ekran, ndërsa në intervistën tek Rogner menjëherë pas fitimit të çmimit të parë në Top Fest, vjen më pak e grimuar dhe nën shtresën pak më të hollë të pudrës mund të shquash lëkurën e një 16 vjeçareje. Në rrethana të tjera një vajzë të moshës së saj në Tiranë, edhe pse vetëm në vitin e dytë të shkollës së mesme, nuk mund ta përfytyrosh pa grupin e saj të shokëve, daljet në kafet dhe baret e Tiranës, shëtitjet e stërzgjatura nga ish-Blloku, vizitat e shpeshta në shtëpinë e shoqes së ngushtë, sidomos fundjavave kur nis jeta e natës… Të gjitha këto t’i harrojë Greta. Prindërit ia kanë ndaluar, por edhe ajo vetë pohon se ka zgjedhur të mos ketë asnjë miqësi të veçantë dhe madje as shoqe. “Nuk kam shoqëri fare”, - pohon Greta duke shtuar se nuk ka nevojë dhe nuk ka as kohë të ruajë shoqërinë kur i duhet të rendë çdo javë, të paktën dy ose tre ditë nëpër koncerte dhe shoë, party ose disko. Jo për të kërcyer vetë, por për të kërcyer dhe fituar para… Ka një ndryshim esencial, sepse nëse versionin e parë prindërit nuk ia lejojnë, të dytin e shohin të lidhur me karrierën e saj dhe sit ë tillë të pashmangshëm. Pastaj a nuk është njëlloj qef si të shkosh vetëm për të kërcyer dhe si të kërcesh duke kënduar. Madje sipas Gretës kjo është e dyta është më zbavitëse, pasi je ekskluzivisht në qendër të vëmendjes dhe madje bën edhe të tjerët për të kërcyer. Megjithatë diskot sipas Gretës po shndërrohen pak nga pak në një bezdi dhe ajo pohon se do të donte t’i shmangte dhe të fokusohej vetëm tek koncertet. “Por kjo është e pamundur ende në Shqipëri, sepse diskot dhe pub-et janë ende ambjentet kryesore ku këndohet live”. Pohon se as në dasma nuk preferon të këndojë, me një përjashtim të vetëm, atë të pjesëmarrjes në dasmën e një ish-ministri jetëshkurtër në qeverinë Nano, Igli Toskës.
Kanë një problem tjetër me diskot prindërit e Gretës, faktin që nuk e ruajnë dot ashtu si në koncerte vajzën, sepse atmosfera është shumë më intime dhe shpesh u ka qëlluar që të vihen në pozitë të vështirë përpara djemve që i afrohen Gretës dhe sipas traditës shqiptare të dasmave e dorovisin me nga 100 apo 200 euro. Por Greta e ka të ndaluar të marrë para në dorë dhe në variantin më të keq, kur dorovitësi nuk tërhiqet, paratë i administrojnë badiguardët e Gretës sipas rregullit të përgjithshëm. Prindërit e Gretës duken të bindur që të mos i ndahen vajzës së tyre nga pas për asnjë çast jo deri sa të mbushë 18 vjetët, por derisa të martohet. Po sikur të mos martohet? Këtë mamaja e këngëtares nuk mund ta përfytyrojë dhe bën “larg qoftë nën zë” kur e pyet. Por kur vjen puna tek paraqitja dhe look-u i Gretës duket se prindërit heqin dorë nga fanatizmi duke mos ia ndaluar pozat “sexy” dhe veshjet që ndonjëherë duket se kanë për qëllim pikërisht të fshehin moshën e saj të vërtetë, ashtu si edhe grimi dhe stilimi i flokëve. Greta që ke përballë në barin e Rogner është shumë larg versionit të skenës, por më tepër një vogëlushe që shoqet e mamit vijnë e kapin për faqkash me përkëdheli shoqëruar ende me fraza të tilla si “zogu i vogël”…
Por nuk është aq naïve sa ç’duket e vogla dhe na zbulon disa strategji të saj të parrezikshme për t’i bërë për vete fansat në koncertet apo shou-t e festat në disko e pabe. Madje duket se ka mësuar mirë si të bëjë për vete edhe femrat. Tregon se nuk heziton t’u rezervojë përshëndetje speciale të parave atyre, kur janë të shoqëruara me partnerët meshkuj, për t’i shpëtuar xhelozisë së tyre dhe historisë së famshme të rivalitetit mes femrave. Dhe fakti është që Greta ka shumë fansa femra, që nga ato vajzat e vogla që çdo ditë i trokasin në derën e apartamentit për autografe e deri tek gratë dhe moshat e treta pranë të cilëve ka namin e gocës së mirë. Ndonjëherë të ngjan me një “murgeshë” sensuale, por thashethemeve rozë nuk u ka shpëtuar as ajo, ndërsa në internet blogët janë të mbushur me më të fundit prej tyre: një lidhje mes saj dhe Ermal Fejzullahut. Greta e përgënjeshtron nga ana e saj, por nuk di të thotë se si qëndron puna nga ana tjetër, ajo e Ermalit.
Në sy të prindërve Greta nuk na thotë gjë tjetër përpos kësaj, ndërsa përsërit vazhdimisht se nuk ka kohë për historiçka dashurie dhe se nuk i pëlqen të shpenzojë kohën kot me shokë e shoqe, kur rrëfen se vetëm dashuria e prindërve i duket e sinqertë. Gjithësesi tregon se nuk i mungojnë shokët e shoqet në shkollë, ndërsa ndjek vitin e dytë e profilizuar për gjuhë të huaja anglisht dhe frëngjisht në shkollën e gjuhëve “Eurolingua”. Nuk ka asnjë aspiratë ende për studime të larta, ndërsa pohon se një nga dëshirat e tjera të mëdha në jetën e saj është aktrimi. Edhe në këtë pikë prindërit e saj reshtin së qeni fanatikë dhe pohojnë se kur bëhet fjalë për një karrierë dhe një profesion që është edhe art, nuk i vënë limite Gretës. Ata tregojnë se janë krenarë që në moshën 16 vjeçare vajza e tyre ka realizuar shtatë videoklipe dhe në fakt është komentuar edhe pas festivalit Top Fest si një eveniment i rrallë që një këngëtare në moshën e Gretës fiton vendin e parë në një festival, edhe pse në studiot e Top Show nuk munguan kritikat dhe rezervat për këngët që u klasifikuar të parat nga publiku, por që sipas specialistëve ishin larg profesionalizmit të mirëfilltë. Kështu një nga vendet e para në këtë festival e mori edhe Poni, që është e njohur më tepër për muzikën popullore.
Pas Top Festit që e ka bërë të ndihet në qiellin e shtatë, Greta Koçi tregon se do të pushojë pak, pasi në jetën e përditshme është një tip shumë i relaksuar dhe i qetë dhe se mënjehërë pas një pazue të shkurtër do të nisë turin e koncerteve verore nëpër Shqipëri. Do të ketë ca ditë kohë të kalojë me qenin e saj të bardhë, Xhesin dhe me të motrën, Enin e cila ashtu si ajo kërkon të bëhet këngëtare dhe prindërit kanë nisur ta shoqërojnë edhe atë në festivalet për fëmijë. Pas turit nëpër Shqipëri prindërit-manaxherë të Gretës rrëfejnë itinerarin veror që i pret dhe gjatë të cilit sëbashku me katër balerinët, dy fonistat, Dj-in, dy bodiguardët, dy shoferët dhe 3-4 ndihmësat për organizimin do të nisen në një turne tjetër në Kosovë dhe në Maqedoni,. Një nga ndalesat e gjata do të jetë edhe në Mal të Zi ku i ati thotë se ka nënshkruar një kontratë që i kalon të 60 mijë eurot. Megjithatë edhe shpenzimet janë të shumta sipas tij, sepse një këngë kushton 1500 euro dhe një videoklip 6 mijë, ndërsa edhe garderoba e Gretës që mbushet vetëm jashtë gjatë udhëtimeve dhe tureve, është një shpenzim dhe investim më vete.
Ndërsa prindërit merren me buxhetet dhe shpenzimet, Greta ka më tepër dëshirë të flasë për klubin e saj të fansave dhe për orarin e saj të takimit me fansat në një formë edhe kjo e koordinuar nga prindërit, nëpërmjet “chat-it” në adresën e saj të faqes së internetit www.gretakoci.com nga ora 5-6 PM. Madje tregon se shfaqet edhe me video për ta, kur ia kërkojnë dhe për rreth një orë u përgjigjet pyetjeve dhe interesit të tyre. Kjo është mënyra më “safe” që kanë gjetur prindërit për Gretën, ndërsa në lokale dhe koncerte nuk mund t’i afrohet dot njeri për shkak të badiguardëve. Një nga strategjitë e marketingut të prindërve është që ta mbajnë larg këngëtaren e tyre të famshme edhe nga sytë e publikut sa më tepër që të jetë e mundur, aq sa njerëzit të pyesin “a është e gjallë kjo Greta, apo është vetëm një imazh?”...