Zv.ministrja kurohet në SHBA me 100 milionë lekë të qeverisë, njerëzit vdesin nëpër spitale

Nga Artur Hoxha

Para një viti, sorollatesha në spitalin onkologjik në Tiranë, ndërsa shoqëroja një të afërmin tim të sëmurë. Mungonin citostatikët, ilaçe me të cilat mjekohen të sëmurët me kancer, pasi nuk ishin bërë blerjet e nevojshme nga ana e Ministrisë së Shëndetësisë. Pas interesimit, mora vesh që zëvendësministrja e Shëndetësisë, Zamira Sinoimeri, prej kohësh mungonte në zyrën e saj për shkak se ishte e sëmurë. Për ironi të fatit diagnoza m’u tha se ishte kancer i gjirit dhe nuk mund të mos ndihesh keq kur dëgjon një lajm të tillë. Por, ndihesh shumë më keq kur merr vesh që zonja Sinoimeri nuk po trajtohej si gjithë qytetarët e tjerë shqiptarë pranë spitalit onkologjik në Tiranë, por në një klinikë të specializuar në Amerikë. Kjo u mundësua nga një fond prej 100 milionë lekësh, i vënë në dispozicion të saj nga qeveria shqiptare për kurimin në vendin ku mbijetesa e qytetarëve nga kjo sëmundje është më e lartë se kudo tjetër. Pikërisht kjo zëvendësministre ishte drejtuese e politikave në lidhje me spitalin onkologjik, si dhe e ngarkuar nga Ministria e Shëndetësisë për blerjen e citostatikëve, të cilët nuk arriti t’i blinte në kohë, pasi iu desh të fluturonte në Amerikë për kurim në kushte speciale, duke lënë pacientët në Shqipëri të vdisnin pa trajtimin e domosdoshëm me citostatikë.

Ndërsa i afërmi im e humbi betejën me kancerin, për shkak të vonesës në diagnostikim si dhe mjekimit të vonuar, krejt ndryshe ndodhi me zj. Sinoimeri. Më në fund, ajo u rikthye në zyrën e saj, pas një viti që mungonte në detyrë, e shëndoshur, por mbi të

gjitha e shëruar nga e keqja që i kishte ndodhur. Nuk mund të mos gëzohet gjithkush, por dhe të trishtohet njëkohësisht për fatin e pabarabartë të njerëzve dhe moralin e saj të shtirë.

Ajo, për ironi të fatit, drejtonte politikat kundër tumoreve në ministri, si dhe ishte drejtuese e grupit për blerjen e citostatikëve. Befasia ishte që kjo zonjë, në vend që të mjekohej si të gjithë pacientët në spitalet për të cilat kujdeset vetë e me ilaçet që duhet të ishin blerë nën kujdesin e saj iku larg, shumë larg. Natyrisht, pasi ilaçe s’kishte, pasi ajo nuk i kishte përfunduar blerjet dhe kujdesi këtu ishte i dobët. Ajo mori paratë tona, edhe të atyre kancerozëve të gjorë që nuk patën fatin e saj të mjekohen si ajo. Qeveria dhe ministri i Shëndetësisë i garantuan qëndrim të qetë në Amerikë së bashku me të motrën, jo vetëm duke i ofruar para për kurim në spitalin amerikan, por dhe duke i ruajtur vendin e punës.

Pas një viti, shumë njerëz vdiqën për shkak të mostrajtimit në kohën e duhur me citostatikë, pasi ikja e zj. Sinoimeri zgjati së tepërmi procedurat dhe vonoi blerjen e ilaçeve.

Kjo papërgjegjshmëri e drejtuesve të Ministrisë së Shëndetësisë dhe ky imoralitet duhet të marrë fund. Është indinjuese dhe e pamoralshme që zj. Sinoimeri, pikërisht zëvendësministre e Shëndetësisë, u mjekua jo në spitalet për të cilat ajo vetë harton politika, por në Amerikë dhe për më tepër, jo me paratë e saj, por me paratë tona dhe të atyre të mjerëve që sorollaten nëpër spitale e paguajnë mjekët nën dorë apo blejnë ilaçet me paratë e tyre për ta bërë mjekimin në spital ku shërbimi duhet të jetë falas. Do të kishin shpëtuar shumë jetë njerëzish me paratë e shpenzuara nga zj. Sinoimeri, pasi do ishin blerë më shumë ilaçe. Me çfarë morali moj zonjë do vazhdosh të flasësh për kujdesin ndaj të sëmurëve ne spitalin onkologjik, kur është evidente që shfrytëzon postin në shërbim të vetvetes dhe as që e çan kokën për fatin e njerëzve të thjeshtë?


Citostatikët, drejtoria e QSUT-së s’di të zhvillojë tender


Të gjitha detajet e shkruara në letrën e dërguar dje në redaksinë e gazetës “TemA” dëshmojnë për pasigurinë dhe shërbimin katastrofik që ofrohet nga sistemi shëndetësor shtetëror. Një shërbim, prej të cilit edhe drejtuesit e këtij të fundit frikësohen. Ky fakt tregon qartë që drejtuesit e institucioneve s’kanë besim në trajtimin e sëmundjeve tek organet që ata vetë i drejtojnë. Rasti konkret është ai i zv.ministres së Shëndetësisë, Zamira Sinoimeri, e cila, me një vendim të posaçëm të qeverisë shqiptare, një vit më parë përfitoi kurim falas në një klinikë amerikane dhe të gjitha shpenzimet u mbuluan nga buxheti i shtetit, çka do të thotë që shpenzimet u mbuluan prej taksave të qytetarëve. Ndërkohë, siç shkruhet edhe në letrën përbri, zv.ministri është qytetar i thjeshtë si të gjithë të tjerët, ky është edhe shkaku pse nuk duhet të bëhen diferencime, sepse në të njëjtën kohë në spitalin onkologjik në Qendrën Spitalore Universitare “Nënë Tereza” vdesin çdo ditë njerëz nga kanceri, mungojnë citostatikët, mjekët s’lëvizin nga vendi pa ryshfete, etj.

Problemi kryesor është mungesa e citostatikëve, për të cilët ka rreth një vit që po shtyhet tenderi. Burime nga Ministria e Shëndetësisë shprehen se ky tender po shtyhet vetëm nga paaftësia e drejtuesve të QSUT-së, të cilët nuk janë në gjendje as të zgjidhin problemet më të vogla teknike, duke shkaktuar kështu vdekjen e shumë personave që kanë nevojë për këto lloj ilaçesh shumë të shtrenjta. Problemi nuk qëndron se zv.ministrja u trajtua në SHBA apo dikush tjetër në Angli, por për shkak të moszhvillimit të tenderit të citostatikëve, shumë persona kanë vdekur.


VENDIM PËR NJË SHTESË FONDI NË BUXHETIN E VITIT 2007, MIRATUAR PËR MINISTRINË E SHËNDETËSISË, PËR MBULIMIN E PJESSHËM TË SHPENZIMEVE PËR KURIMIN NË SHBA TË ZJ. ZAMIRA SINOIMERI

Në mbështetje të nenit 100 të Kushtetutës, të neneve 21 e 27, të ligjit nr. 8379, datë 29.7.1998, “Për hartimin dhe zbatimin e buxhetit të shtetit të Republikës së Shqipërisë” dhe tё neneve 8 e 12, tё ligjit nr. 9645, datё 27.11.2006, “Pёr buxhetin e shtetit, tё vitit 2007”, me propozimin e ministrit të Shёndetёsisё, Këshilli i Ministrave

V E N D O S I:

1. Ministrisё sё Shёndetёsisё, nё buxhetin e miratuar pёr vitin 2007, nё programin “Administrim, planifikim, menaxhim”, zёri “Shpenzime operative”, t’i shtohet fondi prej 10 000 000 (dhjetë milionё) lekësh, pёr mbulimin e pjesshёm tё shpenzimeve pёr kurimin nё SHBA tё zj. Zamira Sinoimeri.

2. Ky fond të përballohet nga fondi rezervë i Këshillit të Ministrave.

3. Pagesa tё kryhet pas paraqitjes sё faturave origjinale nga instituti që ofron shërbimin.

4. Ngarkohen Ministria e Shёndetёsisё dhe Ministria e Financave për zbatimin e këtij vendimi.

Ky vendim hyn në fuqi menjëherë.
 




____________
\"Mos shikoni kishat as xhamijat se feja e shqiptarit eshte shqiptaria.\"

Nuk do ket e shkreta dhe e ka ndihmu qeveria