Shikim prej diveje? Ka vetëm një fjalë, rimel. Një shkencë e vërtetë që ka rregullat e veta. Po t'i ndjekësh me kujdes, do të kesh rezultatin e duhur

Që prej 90 vjetësh vazhdon të jetë produkti më i suksesshëm në botën e bukurisë. Të gjitha femrat e përdorin. Edhe ato që bëjnë pak makiazh.

Hidhet në treg me forma gjithmonë e më të studiuara dhe teknologjike; rimel që zgjat qerpikun, që i jep volum, që e kthen, që e hidraton... për të pasur qerpikë prej ylli ho- llivudian dhe shikim të thellë dhe joshës. Ka frymëzuar këngë, magjepsur vajza të të gjitha epokave, duke filluar që nga egjiptianet e lashta, madje dhe meshkujt mendohet që të kenë filluar ta përdorin, në versionin pa ngjyrë...Me pak fjalë pa rimel nuk mund të rrijë dot askush, as gratë që zakonisht trukohen shumë pak. Një sukses që vazhdon që prej nëntëdhjetë vjetësh dhe ende nuk ka mbaruar.

Emri i rimelit (mascara) e ka origjinën nga qyteti i lashtë i Algjerisë, i njohur për qerpikët jashtëzakonisht të gjatë të banorëve të saj. Janë shumë vende që kërkojnë të marrin autorësinë. Mendohet se shpikësi i rimelit ishte kimisti T.L.Williams, i cili në vitin 1913, për të ndihmuar të motrën të rifitonte të fejuarin e saj, përzieu bashkë pak vazelinë dhe pak pluhur karboni. Përftoi kështu të parin rimel, i cili dha menjëherë efekt pozitiv të dyfishtë: tek motra dhe tek ai. Ndërsa sipas arkivave të firmës tjetër të njohur Rimmel, thuhet se rimeli i parë e ka origjinën nga mesi i viteve tetëqind dhe e ka rrënjën nga kompania e tyre falë gjeniut Eugjen Rimmel. Në atë kohë femrat ishin të detyruara të përdornin produkte me përqindje toksike të lartë, duke i zgjatur dhe ngjyrosur qerpikët me një përzierje të përbërë nga mbetjet vajore të llambave dhe një pluhuri të imët karboni.

Sot rimeli është bërë një nga produktet më të përhapur në Botë. Në tregun oriental ka një shtrirje masive, po të mendosh që gratë aziatike nga natyra kanë pak qerpikë. Për më tepër, në Japoni rimeli është shkalla e parë që të çon drejt produkteve kozmetike dhe si rrjedhojë drejt moshës së rritur.


Rregullat që duhen ditur për aplikimin e rimelit

Kujtoni që pas 3-4 muajsh skadon, kështu që duhet zëvendësuar, pasi mund të bëhet anti- higjenik.

Mos e huazoni asnjëherë, duhet konsideruar një produkt personal.

Përdorni versionin kundra ujit vetëm kur është e nevoj- shme, sepse përveç se i zgjat, i këput qerpikët.

Aplikojeni gjithmonë të fundit dhe mbështeteni bërrylin diku për të evituar të bërit pis dhe mpiksjen e tij.

Ruajeni furçën, mund të jetë e nevojshme për të krehur qerpikët dhe vetullat.

Nëse përdorni kthyesen e qerpikëve, bëjeni gjithmonë përpara vendosjes së rimelit. Evitojeni vendosjen e rimelit tek qerpikët e poshtëm. Nëse keni rrathë poshtë syve, do t’i theksonte më tepër.

Kur thahet është momenti për ta hedhur poshtë; është e kotë ta holloni me ujë të distiluar ose me vaj ulliri.
 




____________