Amarda Toska ose ashtu siç e njohim të gjithë «Ami e Portokallisë» ka lindur në Tiranë në 5 Mars të 1982-shit. Ka kryer shkollën 8-vjeçare dhe atë të mesme në shkollën e baletit. Më pas filloi studimet në fakultetin e shkencave sociale për psikologji ku dhe diplomohet këtë vit. Që në vitin 2000 ka punuar si balerinë në trupën e baletit të televizionit Klan. Gjatë kësaj kohe ka pasur dhe eksperienca në prezantimin e programeve te ndryshme por gjithmonë i ka konsideruar si dytësore, madje shprehet se nuk ka qenë shumë e tërhequr pas prezantimit.

Televizioni për Amin ishte një ëndërr e fshehur në sirtar apo thjesht një rastësi?

Jo, nuk ka qënë ëndërr dhe qëllim në vetvete të bërit televizion, por duke qëne se ushtroja profesionon tim si balerinë në televizion, ai më tërhoqi pas vetes duke më falur mjaft kënaqësi, në radhë të parë shpirtërore.

Si u gjend Ami, një balerinë, përkrah Agron Llakës në një nga spektaklet më të ndjekura nga shqiptarët “Portokalli”?

Me gjithë skepticizmin tim për këtë përgjegjësi të re, shumë shpejt u ambjentova duke hedhur hapa të sigurt për një rritje profesionale të vazhdueshme. Sigurisht nuk ishte dhe aq e lehtë në fillim sepse bëhej fjalë për një format varjeteje ku duhet lirshmëria, energjia dhe aktrimi deri diku. Përkrah Gonit jam ndjerë shumë mirë sepse ai është një partner mjaft komfort.

Keni treguar tashmë se i rezistoni kohës. Për disa vjet me radhë, së bashku me Agron Llakën e humoristët e talentuar, edhe Ami është bërë padiskutim një emër i pandarë nga «Portokalli». Bile mund të them, çdo sezon dhe më zonja, më këmbëngulëse, më e pëlqyeshme. Cili është sekreti?

Puno çdo javë si të ishte java e parë! Lirshmëri dhe buzëqeshje.

Sigurisht që me kalimin e kohës dhe me fitimin e eksperiencës, përgjegjësitë rriten. A e tremb Amin kjo gjë?

Absolutisht jo. Përkundrazi, ndihem mirë dhe në paqe me veten kur kuptoj se me rritjen e profesionalizmit rriten dhe përgjegjesitë. Kjo tregon maturi apo jo.

Bërrylat në botën e spektaklit. A i keni hasur? Si u jeni përgjigjur? Ju tremb konkurrenca e ashpër e ekranit?

Edhe pse thuhet që ekzistojnë shumë të tilla, unë personalisht nuk kam patur ndonjë eksperiencë për tu përmendur. Mbase ngaqë unë vetë i qëndroj larg dhe jam tip i ekuilibrueshëm në të gjitha marrëdhëniet që ndërtoj me të tjerët.

Tashmë jeni një personazh i përjavshëm i një prej televizioneve kryesore. Të gjithë ju njohin. Është kjo diçka që të bën të ndihesh mirë apo të bezdis?

Në shumicën e rasteve për të mos qëne hipokrite, më pëlqen kjo gjë. Por pa diskutim ka kaluar me kohë faza impresionuese.Thjesht më pëlqen dhe në të njëjten kohë më duket mjaft normale tashmë.

Jeni shkëputur tërësisht nga baleti për tju përkushtuar vetëm televizionit, apo kjo që po ndodh tani është diçka e përkohshme? Deri ku synon Ami?

Sot jam këtu, nesër do jem diku tjetër. Jeta rezervon surpriza çdo ditë.Unë synoj të jap më të mirën në atë që bëj. Nga baleti jam shkëputur dhe nuk ndiej keqardhje sepse ishte zgjedhja ime dhe nuk erdhi sepse zgjodha televizionin, por sepse prioritetet në jetë ndryshojnë sipas moshës, vendit ku jeton dhe synimeve që ke për të ardhmen tënde.

Çfarë jeni gati të sakrifikoni për të arritur atë që doni?

Gjithçka mundem.
Mendoni se një grua në Shqipëri mund t’i ndërthurë më së miri karrierën dhe familjen?

Po, dhe kemi shembuj konkret të këtyre grave, megjithese akoma të pakta në numër. Megjithatë vështiresia nuk qëndron këtu por në anën e kundërt të problemit : A ia krijon familja, shoqëria në tëresi dhe strukturat shtetërore mundësitë gruas t’i ndërthurë të dyja këto nëse ajo vetë mundet? Sa shumë barriera, paragjykime ndesh ajo gjatë rrugës?

Dua të njihem tani me Amin jo më si figurë televizive por thjesht si Ami. Si e kalon një ditë të zakonshme dhjetori?

Me impenjimet e përditshme. Shkolla, puna, palestër, bëjmë shpesh organizime shoqërore me nje grup të kufizuar miqsh për të dalë, luajtur etj…Me pak fjalë jetë normale.

Ku ndihesh më mirë dhe çfarë të pëlqen të bësh më tepër?

Çdo gjë varet nga humori i ditës. Nuk mund ta përcaktoj.

Çfarë nuk do i ndryshoje asnjëherë vetes apo jetës tënde?

Vetes, disa karakteristika që i klasifikoj si vlera njerezore. Jetës, komoditetin dhe qetësinë shpirtërore që më ka dhënë deri tani.

Çfarë do i ndryshoje?

Disa gjëra që unë i di, por që dua t’i ndaj me veten.

A e ka gjetur Ami princin e saj, apo është në kërkim...?

Jo nuk kam gjetur princin, kam gjetur Faraonin që mbretëron shkretëtirën….hahaha

Ngjyrat e preferuara në garderobën e Amit?

E zeza, e kuqja

Ushqimet e preferuara?

Në përgjithësi nuk bëj naze në ushqim. Më tepër preferoj prodhimet e detit dhe ëmbëlsirat

Ke bërë ndonjë plan ku do i kalosh Krishtlindjet dhe Vitin e Ri, apo Ami nuk bën asnjëherë plane?

E drejtë, nuk bëj shpesh plane. Më pëlqejnë më tepër ngjarjet spontane, por në disa raste si Viti i Ri duhet. Besoj deri në 12 me familjen, pastaj në një lokal të prenotuar me miqtë tanë.

Le të kthehemi edhe njëherë tek “Portokalli”. Ky spektakël u prit mjaft mirë edhe në Greqi, nga emigrantët shqiptarë. A do të kemi rastin tju presim sërish në qytetet greke ku jeton e punon një numër i konsiderueshëm shqiptarësh?

Do të kisha vërtet dëshirë të vinim edhe një herë sepse jemi kënaqur shumë gjatë turneut, duke qenë se Greqia është një vend turistik, nga më të bukurit do thoja dhe shqiptarët që jetojnë atje na kanë pritur me shumë mall dhe dashuri.

Së fundi, çfarë do ju thotë Ami lexuesve të Revistës “Prestige”?

Jam vërtet e kënaqur që do të lexohem edhe për bashkëatdhetarët e mi në Greqi. Uroj të ndajmë bashkë të njëjtën kënaqesi! Faleminderit dhe juve për intervistën e këndshme!
 




____________

Lot Dielli

Nga balerinë, në një prej ikonave më të preferuara televizive. Për të arritur deri këtu, Amarda Toska i ka ngjitur shkallët një e nga një. Për t’u përballuar pak nga pak me kureshtjen, vëmendjen, sfidat. Së fundmi edhe me thashethemet për lidhjen e saj, që ka plotësuar tërësisht detajet e një jetë prej protagonisteje në qendër të vëmendjes

Drita që spikaste brenda një grupi është sidoqoftë e largët para ndriçimit të fortë të një ylli që shkëlqen vetëm. Amarda Toska  mund të shërbejë si shembulli më i mirë për ta treguar këtë në hapësirën e televizionit, po aq të mbushur me yje e po aq të ndjekur nga sytë e njerëzve. E aty, ajo tashmë ndihet si zonjë shtëpie. Jo më në grupin e baletit, por me kornizat e një imazhi. E re, e bukur dhe e talentuar, ka arritur t’i bindë të gjithë, përfshirë dhe veten, se të nisësh një aventurë televizive mund të jetë rastësore, por ta vazhdosh atë dhe të bëhesh protagoniste nuk është gjë e rastit. Dhe provën Ami e ka dhënë në një nga spektaklet më të ndjekur, në “Portokalli”, ku rilindi me përmasat e një ikone televizive e dhe u pagëzua me emrin “Ami e Portokallisë”. Dhe që atëherë, ajo me protagonizmin duket se janë polarizuar me një plus minus magjik. “Loja 18” ishte takimi televiziv i çdo mbrëmjeje, ku askush nuk e kuptoi se prezantuesja sapo kishte mbyllur një sezon të gjatë në spektaklin e humorit dhe studentja e psikologjisë ishte në sezon provimesh. Në të vërtetë, një eveniment si Kampionati Botëror i Futbollit tërheq vëmendjen jo vetëm të tifozëve të çmendur, por dhe të atyre që më parë nuk kanë parë një ndeshje me interes, ashtu si ishte Ami. E meqë ajo pranon se ndihet mirë me çdo gjë që bën në skenë, nga baleti te prezantimi, edhe një eksperiencë e re në një talk shoë si “Loja 18”, nuk kishte si të mos i hynte në zemër. “Ishte një përvojë e lodhshme, por e bukur në të njëjtën kohë. Mora  informacion, por dhe u takova me shumë njerëz të njohur që ishin të ftuar”. Kampionati ka shumë surpriza dhe kthehet në qendër të vëmendjes. Dhe Ami ishte aty… Të mendosh pak për angazhimet e saj në periudhën e lënë pas, shkolla, provat, vetë spektakli, e pastaj ajo që mund të bëhet në pjesën e mbetur të ditës, mund ta kuptosh lehtë dëshirën e ethshme për pushime. Të paktën familja, si gjithmonë, e ka mbështetur dhe ka bërë maksimumin, që mbi të, të mos bjerë asnjë ngarkesë tjetër veç atyre profesionale, por gjithsesi lodhja ka pasur plot shtigje për të mbërritur te ajo. Pushimet tashmë i ka nisur dhe ka në projekt dhe të tjera ditë në vende të ndryshme. Dëshira për të pushuar në të vërtetë nuk i mungon askujt, por Amarda vërtet i meriton. Aq më tepër që jeta në Tiranë  bëhet ndonjëherë ca si e vështirë dhe e mërzitshme për të. Vetëm ajo me famën e saj do të ishte mjaftueshëm për të tërhequr vëmendjen e të gjithëve e jo më kur  kjo vëmendje dyfishohet për shkak të një njeriu tjetër të njohur dhe e gjithë kjo shumëfishohet sërish me kërshërinë që ngjall një histori dashurie, siç është ajo që po jeton Ami me Ermal Mamaqin. Ata janë një nga çiftet që është përpjekur më shumë për ta mbrojtur lidhjen  e tyre nga kureshtja e medias dhe njerëzve të tjerë, si diçka e çmuar dhe personale, që do ta mbash brenda një globi. Po kur personazhet janë të njohur, ky glob është me të vërtetë prej qelqi. Sa do të përpiqesh, nuk i shpëton dot as syve të kokave që kthehen dhe as bliceve të aparateve fotografikë. Herët a vonë do të merrej vesh. Këtë e dinin mirë dhe ata. “Komentin e ndezur rreth nesh donim ta neutralizonim sado pak, duke mos folur të paktën ne rreth kësaj historie, për të cilën nuk na pëlqen të bëjmë komente”, merr përsipër për të vetmen herë të flasë dhe në emër të partnerit, meqë duket se ky i tyre është një vendim “skuadre”. Një skuadër e vogël, por dhe e fortë, që i ka shpallur sfidë të hapur dhe të ndërgjegjshme medias në një lojë mjaft intriguese edhe për çiftin. Duke folur ata vetë, ndoshta të tjerët do kishin më pak mundësi për thashetheme, por Ami nuk e sheh këtë si një detyrim ndaj askujt. Ajo nuk i bindet ca teorive të rreme shpëtimtare, që në fund të fundit do kënaqin gjithë kërshërinë e të tjerëve, për diçka që është plotësisht e tyre. “Ne kemi zgjedhur mos të flasim. Duke qenë të dy të njohur, nuk i shpëtojmë dot interesit të tjerëve dhe këtë e dimë. Por nuk më vjen mirë kur lexoj të tilla shkrime aspak profesionale dhe ca telenovela të sajuara që shoqërojnë fotot tona, të cilat nuk kanë asgjë të vërtetë. Më vjen inat, por dhe për të qeshur në të njëjtën kohë”. Asaj i duhet të mësojë në gazeta fjalë të sajat, që nuk i ka thënë e të tjera si këto, që përveç saj i sheh dhe familja. Ata i lexojnë gazetat dhe revistat, që ajo i gjen pastaj mbi tavolinë. Ndonjëherë i duhet ta kapërcejë heshturazi jokomoditetin e njohur të prezantimit të nxituar të lidhjes në familje, për të cilin ka menduar media. Por lidhja me një artist, jashtë ndjenjave sigurisht që nuk sjell vetëm kokëçarje. Kështu, tani ajo ka një sy më të vëmendshëm kritik që e sheh dhe një njeri që e kupton më mirë. Ndërsa mënyra e jetës plot angazhime, por dhe lëvizje e shumë kontakte me njerëzit, në plan të parë mjaft stimuluese për xhelozitë e çdokujt, te Ami nuk sjell një shqetësim të veçantë. “Nuk kam aspak një xhelozi specifike që kushtëzohet nga profesioni. Ajo është në karakter dhe ka të bëjë me stërvitjen që çdo njeri i bën mendjes. Profesioni mund të jetë shtysë, por kjo ndjenjë, për mos të kaluar në ekstrem, mund të frenohet nga karakteri”, e përshkruan me lehtësinë dhe qartësinë e një psikologeje të ardhshme këtë kompleks ndjenjash që trazon shpesh qetësinë e një lidhjeje, por mesa duket jo të tyren. Ajo e shijon atë me natyralitetin me të cilin ka ardhur. “Kur dy njerëz pëlqejnë të rrinë bashkë, nuk duhet shumë për ta arritur këtë. Çdo gjë ndodhi në çastin dhe në vendin e duhur”. Ka ndërmend ta lërë të rrjedhë po natyrshëm, pa dashur të flasë para kohës për planet, që veç kjo e fundit i shndërron në realitet. Tani për tani mendja e lodhur i rreh vetëm te pushimet, të cilat këtë vit do t’i kalojë me shoqërinë dhe jashtë Shqipërisë. Vetëm ca udhëtime fundjavave brenda kufijve, sepse pushimet e vërteta i ka planifikuar në Mal të Zi, ku do shkojë disa herë dhe diku jashtë kontinentit. I shijoi pa masë disa ditë të kaluara në Budva dhe mezi pret të kthehet aty. Jo vetëm për çlodhjen që i dhuron natyra, por dhe lirinë që rrjedh nga fakti që s’e njeh askush. “Budva më pëlqen. Aty askush nuk kthen kokën dhe as tregon me gisht”. Pushimet ideale për të nuk do të thonë shpenzime të shumta. “Mjafton të ketë det dhe diell, muzikë e alegri, lëvizje e mbi të gjitha një shoqëri të mirë”. Edhe pushimet, që vjet i kaloi me familjen, janë përfshirë në ndryshimet që përjeton Ami, ashtu si dhe jeta në pjesën tjetër të vitit. “Megjithatë, njerëzit e ngushtë që më rrethojnë nuk kanë ndryshuar, kanë mbetur po ata. Ajo që ka ndryshuar është se kam mësuar të tregohem më pak e mirë për t’u mbrojtur nga padrejtësitë dhe nga ata që duan të më fusin në grackë. Kur sheh se jep shumë dhe asgjë nuk të kthehet, është më mirë të tregohesh më e ashpër, që mos të lëndohesh më vonë”. Tashmë ajo duket se di çdo gjë për të përballuar një jetë prej protagonisteje. Është sigurisht e ndërgjegjshme për imazhin e krijuar dhe nuk do që të abuzojë me të, qoftë dhe me një hap të vogël fals, që mund të rezultonte fatal. Ka dalë nga mburoja e një grupi baleti dhe tani ka në duar fatin e një figure ekrani që mban emrin e saj. E ndërtuar prej fatit, mundit, por dhe brishtësisë. Prej fatit, sepse te Amarda çdo gjë ka mbërritur vetë. “Krijimin e një figure individuale sigurisht e kam dashur, por jo aq fuqishëm sa të kthehej në objektiv. Të gjitha gjërat më kanë gjetur dhe nuk i kam kërkuar. Unë nuk jam një karrieriste në thelb, në kuptimin e atij egoizmi që i kalon kufijtë e normales”. Po sigurisht që kjo ka kërkuar talentin, punën dhe përkushtimin e Amardës, sepse askush, aq më pak në televizion, nuk të dhuron një vend që ty do të përkasë përherë. Dhe Ami e di mirë këtë. Ajo është përkushtuar për të mos lëkundur besimin e të tjerëve dhe për ta kryer mirë atë që, ndërsa për spektatorët është një element spektakli, për të është një detyrë. E gjatë këtij rrugëtimi, në çdo hap ka ndjerë mirënjohje për ata që i kanë qëndruar pranë, qoftë edhe për një fjalë të thënë. Edhe paraqitja duhet të jetë gjithmonë në lartësi, aq më tepër me rëndësinë e veçantë që ka në televizion, ku për të mbijetuar, si mendon ajo, nuk mund t’i besosh vetëm asaj që natyra të ka falur, por dhe asaj që ti di të japësh me aftësitë e tua. Dhe e gjitha kjo është e konsoliduar dhe e brishtë në të njëjtën kohë. “Jam munduar të krijoj një imazh të ekuilibruar dhe me sa duket të pëlqyeshëm. Nuk dua të provoj gjëra ndryshe, që do ma kërcënonin këtë figurë, siç kanë bërë disa të tjerë dhe kanë dështuar. Nuk dua të bëhem përsëritëse e këtyre gabimeve”. Bëhet fjalë që nga modeli i flokëve dhe deri te sjellja para kamerës. Ajo nuk dëshiron të eksperimentojë ndryshime të bujshme, që do ta tronditnin imazhin e krijuar. Është më shumë se e saktë në këtë vendim të sajin, sepse kështu çdo gjë ka shkuar shumë mirë. Atë e njohin dhe e pëlqejnë të gjithë. Prandaj nuk ka ndërmend të provojë në fusha të tjera, si kënga apo videoklipet, edhe nëse ato do të ishin të të dashurit të saj. Edhe pse ndonjëherë thonë me shaka atë që ndoshta dhe të tjerët pyesin veten “pse nuk bëjmë një këngë bashkë?”, kjo është vetëm një batutë mes tyre. Amarda e sheh veten jashtë videoklipeve, por edhe këngës. Angazhimet e saj i ka të përcaktuara mirë, janë ato që e kanë bërë të njohur. Baleti, për kënaqësinë e saj, sepse ajo asnjëherë nuk humbet rastin të kërcejë. Prezantimi, tashmë aftësi e afirmuar, mbetet për t’u rritur. Por mes këtyre aspiratave më e sigurta se çdo tjetër është viti i katërt i fakultetit, që pret në pragun e tetorit. Ai do t’i dhurojë diplomën e një dege që e pëlqen dhe në të ardhmen ajo dëshiron që të jetë profesioni i saj. Ky prag sjell dhe sezonin e ri televiziv dhe se si do të vijë Ami atëherë, është ende surprizë. Dhe po t’i shtosh kësaj edhe të qenit në faqet rozë të revistave dhe gazetave, që kanë trazuar jo pak privatësinë e saj, duket se për Amarda Toskën, sfida e re sapo ka filluar.
 




____________

Lot Dielli

Shume bukuroshe eshte ami.
Ej si e ka emrin i dashuri i kesaj? Me duket se eshte ai i theshbesh apo jo?
 




____________
I Love 2 B Loved By U

Ami eshte e fejuar me Ermal Mamiqi, ish-in e grupit famoz The Dreams dhe pjestarin e grupit humoristik The Sh.B.L.Sh.

Më në fund u fejuan. Kështu është mbyllur historia më shumë se njëvjeçare e dashurisë mes Ermal Mamaqit dhe Amarda Toskës. Ceremonia është bërë në mbrëmjen e 20 dhjetorit, tek “Xibraku”, ku familjarët e të dyja palëve kanë festuar deri në orën 2 të mëngjesit të nesërm. Të gjitha detajet e festës kemi arritur t’i zbulojmë pas shumë përpjekjesh. Sepse si gjithmonë, çifti ka dashur të mos zbulojë asgjë që i përket jetës së tyre private. Derisa pranuan të na tregojnë pak, fare pak gjëra nga e gjithë kjo histori. Gjithësesi shumë detaje na është dashur t’i zbulojmë vetë. Ndaj këtu do të lexoni për herë të parë variantin e vërtetë. Që nuk ngjason shumë me ato çfarë të tjerët kanë thënë për ta në gjithë këto kohë.

Gjatë gjithë ditës së mërkurë, ndërsa në Top Channel të gjithë zienin për festën e madhe të 5-vjetorit të televizionit, Ermal Mamaqi dhe Amarda Toska e kishin tjetër kund mendjen. Tek një festë që do të bëhej po atë mbrëmjen e 20 dhjetorit e që ishte shumë më e veçantë dhe më e rëndësishme për ta.
Atë natë, Ermali dhe Ami do të shpallnin zyrtarisht fejesën e tyre në një ceremoni familjare, të organizuar tek “Xibraku”.
Kjo ka qenë arsyeja që i ka detyruar të mos rrinë dot gjatë në festën e televizionit, ku janë të dy të punësuar që prej më shumë se dy vjetësh. Kjo ka qenë arsyeja që atë natë ata ishin bërë më të bukur se kurrë: Ai i veshur si kurrë ndonjëherë me një kostum sa klasik, aq edhe modern (ku kollarja mungonte gjithsesi), ndërsa ajo me një fustan bojëqielli të qëndisur me gurë e temina, e me një krehje flokësh shumë klasike. E ndërsa lëviznin gjithkund të kapur dorë për dore, ishin padiskutim, çifti që po tërhiqte më shumë vëmendjen në atë festë. Duke u bërë edhe një herë më shumë objekt vëzhgimesh dhe komentesh, brenda të cilave këtë herë zor se mund të jetë përfshirë dhe ceremonia e fejesës. Sepse të paktë kanë qenë ata që e kanë ditur se menjëherë pas festës së Top-it, çifti do të largohej drejt “Xibrakut”, ku do të mblidhnin familjet për të shpallur kështu fejesën.

***
Ky nuk ka qenë takimi i parë mes prindërve të Amit dhe Ermalit, por gjithsesi një moment i tillë ka qenë shumë më domethënës, se të gjitha ato momentet kur Ermali është njohur për herë të parë me prindërit e Amit, apo dhe kur kjo e fundit është prezantuar tek prindërit e Ermalit, apo dhe kur prindërit e të dyve janë prezantuar me njëri-tjetrin. Këtë herë veç njohjes, festa ka pasur si qëllim fejesën zyrtare. Një fejesë që është bërë pa ndërrim nishanesh (siç është zakoni alla shqiptar), sepse Ami dhe Ermali nuk e kanë vendosur ende nëse do të shkëmbejnë unaza apo orë për fejesën e tyre. Por ka kohë për to. Mbrëmja e së mërkurës mbrëma ka shkuar mjaft mirë edhe pa këto rregullat shqiptare. Nuk kishte si të ndodhte ndryshe, përderisa Ermali (që tashmë është njohur edhe si një drejtues mjaft i mirë artistik në lokalet e ndryshme të Tiranës), është marrë vetë me të gjitha detajet… duke nisur nga menyja e deri tek muzika që do t’i shoqëronte gjatë gjithë mbrëmjes. Sigurisht që në një rast të tillë Ermali më shumë se muzikë house, do të rendiste këngë popullore në programin që do t’i linte në duar Dj që kishte zgjedhur për këtë festë. Por nuk kanë munguar dhe rrymat moderne, nën të cilat familjarët e çiftit dhe çifti vetë kanë kërcyer deri në orën 2 të mëngjesit të nesërm.

***
Kështu është finalizuar historia e dashurisë mes Ermalit dhe Amit, që do të niste ashtu si krejt rastësisht, një vit e gjysmë më parë. E që në ato ditët e para kur Ermali do të niste përpjekjen për të bërë për vete Amin, historia do të përflitej menjëherë edhe jashtë dyerve të “Portokallisë”. Atëherë pak kush e besonte se mes dy moshatarëve, që vetëm një javë e marsit i ndan nga njëri-tjetri (Ami është më e madhe se Ermali), lidhja do të funksiononte kaq gjatë. Ndaj komentet do të ishin nga më të ndryshmet, aq sa do t’i vinin jo pak herë në siklet dy të rinjtë. Kjo do t’i detyronte ndoshta të mbylleshin nën guaskën e tyre për të mos treguar asgjë. Por me gjithë përpjekjen e tyre për të mbetur në hije, nuk do të mund të shpëtonin dot. Nuk kishin shans, ndërsa marrëdhënia mes tyre do të niste pikërisht atëherë kur ata ishin më në formë se kurrë, më të suksesshëm se kurrë në profesionet e tyre. Kështu që edhe pse nuk pranuan asnjëherë të jepnin deklarata publike, do të mësohej shumë shpejt se këtë herë bëhej fjalë për një histori të vërtetë dashurie, të cilës Ermal Mamaqi do t’i kushtonte një këngë. Kjo këngë që u shkrua enkas për Amin, në ato ditët kur ajo nuk i kishte thënë ende “po” Ermalit që po bënte të gjitha përpjekjet me atë natyrën e tij (që ia njohin të gjithë tashmë), ta bënte për vetë prezantuesen e bukur të “Portokallisë”, do të publikohet së shpejti. Ermali duhet ta ketë menduar tashmë momentin se kur do ta prezantojë atë këngë. Ndoshta në një ceremoni të dytë që do të bëjnë sërish për fejesën e tyre. Sepse festimet nuk kanë mbaruar. Pas ceremonisë familjare në mbrëmjen e 20 dhjetorit tek “Xibraku”, Ermali dhe Ami do të organizojnë dhe një tjetër festë, edhe më të madhe. Ku do të ftojnë të gjithë miqtë e tyre (VIP ose jo). Se si do të jetë kjo festë, do të na duhet të presim janarin.
 




____________

Lot Dielli

Festa e 25 vjetorit për Amarda Toskën ka qenë e gjitha një surprizë e përgatitur nga i fejuari i saj Ermali. Në një lokal në rrugën e “Elbasanit”, të hënën në mbrëmje, Ami nuk e kishte menduar aspak, që ndërsa do të hynin për të takuar aty njërin prej shokëve të Ermalit do të gjente në fakt të gjithë miqtë dhe të afërmit e saj, që arrinin në rreth 100 vetë dhe që e pritën me një thirrje “Gëzuar”. E gjithë kjo, e ka lënë krejtësisht të surprizuar dhe të habitur drejtuesen bukuroshe të “Portokalli”, që fillimisht nuk e ka kuptuar se çfarë po ndodhte. Në një atmosferë shumë të ngrohtë dhe të ndezur nga muzika, alkooli dhe harmonia, Amarda Toska ka marrë urimet e ditëlindjes nga shokët dhe miqtë më të afërt. Edhe pse një festë e madhe ditëlindjeje, ideuesi dhe organizuesi i saj Ermal Mamaqi është përpjekur ta mbajë larg vëmendjes së mediave dhe fotografëve duke dashur, që gjithçka të mbetej tërësisht private. Dhe jo vetëm kaq. Duke synuar, që edhe për Amin gjithçka të ishte surprizë, Ermali është përpjekur, që të gjitha përgatitjet t’i realizojë në mënyrë sa më diskrete, që edhe plani i tij të shkonte sipas parashikimeve. Dhe me sa duket ia ka arritur shumë mirë qëllimit. I ndihmuar edhe nga disa miq të Amit, mësojmë se Ermali kishte gati një muaj, që përgatitej për këtë festë speciale. Dhe duhet pranuar, se vërtet e ka habitur të fejuarën e tij. Që 5 marsi nuk ishte një ditë e zakonshme në kalendarin e çiftit, kjo dihej, megjithatë Ami ishte përgatitur për të pasur thjesht një darkë intime, në një lokal në periferi të Tiranës. Por, Ermali ka ndaluar makinën, në rrugën e “Elbasanit” duke i kërkuar të qëndrojnë aty vetëm 5 minuta, sepse atij i duhej të takonte një shok. Tërësisht e papërgatitur për një skenë të tillë, Ami e ka shoqëruar dhe ka mbetur e befasuar nga ambienti festiv, që ka gjetur aty. E ndërsa të gjithë të ftuarit kishin sjellë dhurata nga më të veçantat, për mikeshën e tyre, natyrisht dhurata më e bukur për të, mbeti festa, që ka vazhduar deri në orët e para të mëngjesit dhe ku natyrisht mes të tjerëve nuk kanë munguar as kolegët aktorë të spektaklit “Portokalli”. Të lidhur pikërisht në ambientet e punës së tyre të përbashkët, Ami dhe Ermali kanë kurorëzuar në fejesë lidhjen vetëm disa muaj më parë, në një ceremoni krejtësisht private. E vërteta është, që ata gjithmonë janë treguar të kujdesshëm në drejtim të jetës së tyre private, duke dashur gjithmonë ta mbajnë sa më larg vëmendjen e mediave.
 




____________

Lot Dielli

Aww sa bukur ka dal cifti.

Ami eshte shume here me e bukur se Ermali.
 

Cfare pune bejne keta  
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------