Shtetet Perëndimore dhe Rusia sërish kanë konfirmuar dallimet rreth Kosovës të mërkurën në Potsdam të Gjermanisë, ndërkohë që Ministrat e Jashtëm të vendeve më të fuqishme ekonomike të botës, janë përpjekur që të fokusohen më shumë në harmonizimin e axhendës për Samitin e G8's, që do të mbahet nga 6 -8 qershor në Heiligendamm të Gjermanisë.
Por, edhe pse dy përfaqësuesit më të mëdhenj të politikës së superfuqive janë ritakuar, duket se pikat e takimit për Kosovën mbetën sërish tepër larg. Sekretarja Amerikane e Shtetit, Condolezza Rice dhe Ministri i Jashtëm Rus, Sergey Lavrov kanë mbetur aty ku kanë qenë. A do të munden eprorët e tyre të bëjnë diçka më shumë më 6 qershor?-thotë Express në Kosovë. Kjo kuptohet që i mbetet kohës.
"Rusia dëshiron të gjendet një zgjidhje afatgjatë për Kosovën" ka thënë Lavrov.
Sekretarja Amerikane e Shtetit Condolezza Rice, ndërkaq, ka deklaruar se Kosova kurrë më nuk do të jetë pjesë e Serbisë, duke thënë se shpreson që e ardhmja e tyre të jetë në Bashkimin Europian (BE). Qëndrimet e kundërta rreth Kosovës janë bërë të ditura edhe në një deklaratë që është lëshuar pas përfundimit të takimit ku është theksuar se Ministrat kanë biseduar edhe rreth propozimit të Martti Ahtisaarit. "Duke pasur parasysh faktin se ekzistojnë pikëpamje të ndryshme rreth çështjeve thelbësore, mundësitë për ndërmarrjen e hapave të mëtejmë do të vazhdojnë"
Takimi i Ministrave të G8's ku është diskutuar për një mori çështjesh globale, është mbajtur në qytetin e Potsdamit në shtëpinë mbretërore Cecilienhof, ku më 1945 ishin mbledhur fituesit e Luftës së Dytë Botërore Presidenti i SHBA -ve Harry Truman, Kryeministri Britanik, Winston Churchill dhe Sekretari i Përgjithshëm i Partisë Komuniste Sovjetike Joseph Stalin, vendimet e të cilëve kishin krijuar mundësinë për etablimin e një rendi të ri botërorë, i cili më vonë ishte manifestuar me Luftën e Ftohtë, për më shumë se katër dekada. Marrëdhëniet aktuale amerikano - ruse kanë shënuar tensionimin më të madh që prej rënies së Bashkimit Sovjetik, ndërsa një "Perde e Hekurt" mes këtyre dy vendeve është vendosur për Kosovën. Përkundër mospajtimeve amerikane dhe ruse për Kosovën, Rice dhe Lavrov të mërkurën në Potsdam kanë njoftuar se Presidenti i Rusisë Vladimir Putin do të qëndrojë për një vizitë prej 1 - 2, korrik, në Shtetet e Bashkuara të Amerikës. Madje Putin gjatë kësaj vizite pritet të jetë mysafirë në rezidencën familjare të Presidentit Bush. Bush dhe Putin do të takohen paraprakisht në Samitin e G8, ndërsa gjithnjë e më shumë supozohet se një zgjidhje për Kosovën do të gjendet pikërisht në këtë nivel.
Pavarësisht se Ministri i Jashtëm Rus Lavrov, e mbron qëndrimin rus me thënien standarde tash se dëshiron "drejtësi" për Kosovën, duke thënë se kjo është një çështje që duhet të zgjidhet mes Prishtinës dhe Beogradit.