Flet nëna e foshnjës, Silvana Beqiraj: “U gëzuam shumë kur morëm lajmin për një fëmijë

Vogëlushja e lindur duket të jetë jo vetëm njeriu më i rëndësishëm për prindërit e saj, por edhe motivi kryesor që ata kanë vendosur të lidhen në martesë. Silvana dhe Artur Beqiraj shprehen se kishin më shumë se tre vjet që ishin fejuar, por ka qenë lajmi se do t’i jepnin jetë një fëmijë ai që ka bërë që të përshpejtojnë planet për martesë. “Ishim shumë të gëzuar kur morëm lajmin për vogëlushen tonë, ndoshta ky gëzim ka qenë dhe arsyeja që gjithçka ka ecur aq mbarë”, shprehet nëna e foshnjës.

Shtatzënia
Silvana ka qenë në muajin e tretë të shtatzënisë kur ka bërë edhe vizitën e parë gjinekologjike. Veçse konfirmimit se foshnja gëzonte shëndet të plotë, ajo ka mësuar edhe gjininë e fëmijës. Prindërit tregojnë se nuk kanë shprehur asnjë dëshirë për faktin nëse dëshironin të kishin një vajzë apo një djalë, kështu që kur kanë mësuar se foshnja ishte vajzë janë “dehur” nga lumturia. “Vajzat janë shumë të ëmbla dhe na pëlqen shumë fakti që do të kemi një vogëlushe bukuroshe si fëmijë të parë”, shprehet nëna. Ekot gjinekologjike nuk kanë qenë të pakta, madje nëna ka edhe të preferuarën e saj. “E para është ajo që kam më shumë për zemër, aty munda të shoh për herë të parë fëmijën tim dhe nuk ishte një gëzim i pakët”, thotë nëna. Emocionet duket të kenë shoqëruar ditët e bukura të shtatzënisë së Silvanës, nisur nga fakti që për të ishte hera e parë. Ajo tregon për gazetën se tashmë është mësuar me idenë e të qenit nënë, përgjatë muajve të pritjes së ardhjes në jetë të foshnjës. Kjo e bën të mendojë edhe për ditët në vijim, për detyrat e saj të reja, përkushtimin për gjithçka çfarë i duhet t’i falë kësaj fëmije. “E kam pak me frikë, sepse është një eksperiencë që nuk e njoh, por janë instinktet ato që më bëjnë të besoj”, shprehet Silvana, tek mban vogëlushen në krah.

Lindja
Vogëlushja ka ardhur në jetë pak para mesditës. Pesha e tij trupore dhe gjatësia janë mëse normale, çka tregojnë për një lindje të shëndetshme. Ashtu si vajza, edhe nëna është në gjendje të mirë shëndetësore, madje duke buzëqeshur tregon se “e pati menduar edhe më të vështirë këtë moment”, por falë punës së madhe të mjekëve gjinekologë, asistentëve në sallën e lindjes dhe mamive, çdo gjë ka përfunduar pa probleme. Mes lotësh ajo përpiqet të sjellë edhe një herë në mend emocionet e para që ka ndjerë kur ka marrë vogëlushen e saj në krahë. “Ishte gëzimi më i madh që kisha përjetuar ndonjëherë, aq më tepër kur erdhi edhe bashkëshorti im dhe u bëmë të tre, një familje e vërtetë dhe shumë e lumtur”, shprehet nëna.

Emri
Ende nuk e kanë menduar, ose më saktë nuk dinë se cili është më i bukuri për fëmijën njëditësh, që identifikohet me numrin e kartelës përkatëse. Por është e sigurt që do të ketë një emër bashkëkohor, të dëgjuar edhe në vendet jashtë vendit tonë. “Dëshirojmë t’i vendosim vajzës një emër internacional, që të jetë i pranueshëm për kohën”, tregon nëna e foshnjës. Veshjet e foshnjës kanë filluar të përgatiten vetëm para një muaji. Nuk mungojë kostumet, paliçetat dhe të gjitha detajet e tjera që i nevojiten një të porsalindure. Ndërsa dhoma e gjumit nuk është përgatitur ende. Prindërit tregojnë se kanë menduar që edhe për disa kohë fëmija të qëndrojë në dhomën e tyre për ta pasur më mirë nën kujdes dhe më pas ajo të ketë dhomën e saj.

Mjekët
Silvana falënderon të gjithë mjekët dhe mamitë e spitali universitar obstetrik gjinekologjik “Mbretëresha Geraldinë”, për ndihmën dhe mbështetjen e tyre gjatë qëndresës së saj në këtë maternitet. Një falënderim i veçantë shkon për mjekun Shkëlqim Balili.

Nena
Vetëm një ditë pasi i është dashur t’i nënshtrohet një operacion gjendja shëndetësore e nënës paraqitet shumë e mirë. Gjithsesi mjekët i kanë rekomanduar pushim absolut si dhe mjekim me perfuzion dhe vitamina. Aktualisht 22-vjeçarja nga Kuçova është e papunë dhe mendon që edhe për një kohë të gjatë t’i përkushtohet fëmijëve.
 

hahahah kohet e fundit...shoh femije....dhe "dehem"nga lumturia kuptohet...imagjino te pres nje dite femijen time