Nga RAMADAN BIGZA

Gazeta "SportDay" e ka rreshtuar sot Alban Bushin në 11 shin më të mirë të javës, ndërkohë që po sot, një nga prokurorët ka kërkuar që t'i bëhet një kontroll i imët dokumentacionit, që posedon Bushi për qëndrimin e tij në Greqi. Brenda këtyre kulmeve në mund t'i quajmë kështu janë zhvilluar ngjarjet, ku të gjitha gazetat kanë pasur protagonist futbollistin shqiptar, Alban Bushi.


Disa kanë shkruar me tone të përmbajtura e disa të tjera nuk i kanë kursyer fjalët, madje shumë prej e tyre e kanë kaluar edhe sensin e masës, atë sens etik e profesional që kërkon në fakt shtypi. Ndërkohë që dy trajnerët, spanjolli Viktor Munioz dhe trajneri grek Maqis Kacavaqis, kanë folur në mënyra të ndryshme, por asnjëri prej tyre nuk ka shprehur ndonjë indinjatë ndaj futbollistit shqiptar. Madje rastet, fjala vjen, si ai i Bushit në ndeshjen ndaj Panathinaikosit, drejtori i gazetës "Derby", i cili foli në darkë në kanalin prestigjioz "Alter", i cilësoi të zakonshme, si gjëra që ndodhin në çdo ndeshje futbolli, madje, siç tha ai, ndodhin edhe në Champions League.
Një shtyp i tërë ndaj një futbollisti duket se është shumë. Eshtë shumë kur pikërisht ky futbollist ka shkëlqyer në lojën e tij, ka shënuar edhe një gol ndaj një skuadre të madhe, siç është Panathinaikos, dhe ka festuar, siç thotë ai vetë, në mënyrën e tij. E mbi të gjitha, ky futbollist i lançuar aq shumë, nuk ka marrë gjatë lojës asnjë karton të verdhë apo të kuq. Atëherë me të drejtë mund të pyesim: Nga lind e gjithë kjo pakënaqësi ndaj tij? E kam fjalën për atë pakënaqësi, që shprehet në shtyp jo me profesionalizëm, por me inat, çka nuk është fakt në natyrën e shtypit. E gjitha kjo të çudit pa masë kur mëson se këtë gjë e bëjnë ata gazetarë, që me thënë të drejtën kanë qenë tepër realistë në pasqyrimin e vlerave të futbollistëve shqiptarë që janë aktivizuar ndër vite në Greqi.
"Ethnosport": Largojeni nga futbolli grek!
Eshtë e papranueshme për një revistë prestigjioze sportive, siç është "Ethnosport", të shkruajë: "Largojeni tani nga futbolli grek. Në ndonjë shtet tjetër Bushi do të ishte dënuar si kriminel për fyerje. Gjesti i Bushit i kalon caqet e rrugaçërisë përpara kamerave. Kjo duhet të quhet dhunë. Futbolli grek, që ka pësuar shumë "thika" nga huliganët, u plagos rëndë dje nga një lojtar huligan"?!
A ka gazetari që shkruan në këtë gjuhë për një futbollist, që siç thashë, nuk është ndëshkuar me asnjë karton, qoftë ky i kuq apo i verdhë. Huliganizmi në sport nuk luftohet me shprehje, që cënojnë rëndë dinjitetin e njeriut. Gazetari kërkon të gjejë huliganë edhe atje ku ata nuk ekzistojnë. A është etike që një gazetar të japë urdhër, duke shkruar se në qoftë se duam të kërkojmë pastrim të vërtetë të futbollit... duhet sot të nxjerrë përgjithmonë Bushin nga stadiumet tona". Kush ia jep të drejtën këtij gazetari të urdhërojë në këtë mënyrë?
"Athlitiqi foni": Ata, kush do t'i arrestojë?
Por fatkeqësisht ka edhe më keq se kaq sa është shkruar tek "Ethnosporti". Gazeta "Athlitiqi foni", një gazetë pranë Panathinaikosit, ngre një version tjetër, duke bërë pyetjen sugjestionuese: "Ata kush do t'i arrestojë?" Fjalën e ka për gjyqtarin Briakos dhe futbollistin Bushi.
Këtu ka humbur krejtësisht logjika dhe sundues edhe në mendjen e gazetarëve janë bërë pasionet. Eshtë krejt e rregullt të shkruhet siç shkruan "Goal news", që "Briako me të drejtë nxori jashtë Papadhopullosin për shpullën që i ra Bushit, por ai duhej të nxirrte jashtë edhe futbollistin shqiptar. Një mendim ky që gjithsesi është në natyrën e një analize, që vetë gazetari bën ndaj fenomeneve që ndodhin. E njëjta gazetë shkruan se "Futbollisti shqiptar duhet të mendojë shumë sot për atë çfarë ka bërë dje dhe të kërkojë të falur". E kjo, pra, është normalja. Dhe Bushi e ka bërë një gjë të tillë. I cituar nga agjencia e lajmeve "in.gr." futbollisti shqiptar ka pranuar se ka bërë një gjest të keq ndaj Papadhopullosit, por ka thënë se atij i vinte keq që kundërshtari ka marrë karton të kuq. Një karton i verdhë do të ishte më i drejtë ka thënë sulmuesi shqiptar. E njëjta agjensi citon Bushin të ketë thënë për gjestin e tij pas shënimit të golit, se ai ishte një festim me dikë nga stoli. "Futbolli është një lojë që të nxeh gjakrat dhe kush është më i duruar apo më i zgjuar, fiton, kështu që fitova unë." Duke folur rreth përplasje së tij me kapitenin e skuadrës greke, Bushi ka thënë se nuk i foli e megjithatë i kërkoi ndjesë.
Diçka rreth normales e ka quajtur situatën edhe trajneri spanjoll, Viktor Munioz, i cili në konferencën për shtyp ka thënë: "Të gjithë e pamë se Bushi e pështyu Papadhopullosin, por në asnjë mënyrë nuk i jap të drejtë lojtarit tim. Ai është profesionist dhe nuk duhej të kundërvepronte."
Edhe më i zbutur në vlerësimet e tij ka qenë trajneri i Apollon Kallamariasë, Maqis Kacaqis. Tekniku grek mësohet të ketë thënë: "Nuk e pashë nëse Bushi e pështyu Papadhopullosin. Nëse bëri ndonjë veprim të keq, e bëri për veten e tij që të festojë. "Më dhëmb karta e Papadhopullosit,- tha Bushi për mediat vendase,- dhe për këtë i kërkoj falje. Nuk kemi për të ndarë asgjë. Në lojë, të gjithë kemi gjak të nxehtë. Të gjithë lojtarët e Panathinaikosit kishin diçka ndaj meje. Ndoshta se kisha bërë disa deklarata për këtë ndeshje",- citohet të ketë thënë sulmuesi shqiptar.
Prokuroria, hetim dokumentave të Bushit
E megjithatë, çështja ka shkuar deri atje sa nuk ia pret mendja askujt, te prokuroria, ku njëri prej tyre ka kërkuar që t'i bëhet një kontroll i imët dokumentacionit që posedon Bushi për qëndrimin e tij në Greqi. Të duket disi i dyshimtë ky veprim, kur futbollisti shqiptar nuk ka kryer asnjë veprim që bie ndesh me ligjet e shtetit grek. Më shumë një veprim ligjor, shihet si një mundësi për të zbutur tonet, që me thënë të drejtën në faqet e gazetave janë shumë të larta. Dhe kjo ndodh në një kohë kur futbolli vendës është përfshirë në raste të dhunshme, siç janë ngjarjet që kanë ndodhur në të njëjtën ditë në stadiumin e Agrinjos, ku pas rrahjes së futbollistëve të të dy ekipve në fushë, u plagosen 5 veta. Pas plagosjes në Larisa të një prej drejtuesve të Olimpiakosit. Pas rastit të rëndë të Rivaldos ndaj një futbollisti vendas etj. E me gjithë këto ngjarje, krejtësisht të veçanta, rasti i Bushit, ka dalë i parë. Ka dalë si një rast që duhet të ndëshkohet rëndë, që me të duhet të merret prokuroria e tj.
Sigurisht që kjo nuk është as punë e qeverisë dhe as e prokurorisë. Siç tha ministri i shtypit, kjo punë u takon atyre që merren me këto punë, pra drejtuesve të sportit. Edhe presidenti i superligës, Petros Kokalis, foli me tone më të qeta, duke bërë fjalë për respektimin e rregullave etj.
Megjithatë, askush nuk është për sjelljet e këqija në stadium. Edhe në këtë rast nuk është se ne po i dalim zot Bushit. Ai duhet kritikuar për mënyrën e të festuarit, për veprimin e pështyrjes së kundërshtarit etj. Futbolli është sport vlerash sportive dhe kurrsesi arenë sharjesh e zënkash. Por futbolli nuk është as sport ku gazetarët të fyejnë e të ngrenë gjithfarë akuzash. Nuk është një sport që në pendën e gazetarit rëndom më shumë pasioni sesa logjika. Futbolli dhe ata që e luajnë atë janë në radhë të parë njerëz, me nivele të ndryshme, me kulturë të ndryshme, me pasione të ndryshme. Megjithatë, mbi ta nuk mund të ushtrohet diktat mediatik. Thirrjet "Ata kush do t'i arrestojë?", apo "Largojeni tani nga futbolli grek", nuk u shkojnë gazetave sportive. Më shumë se gjithçka, këto tregojnë tifozllëk, për të mos u shtyrë më tej në hamendësime. Jemi të bindur se, nëse nuk do të kishte barazuar Panathinaikosi, nuk do të ndodhte kështu.
 




____________

Nga Athina, RAMADAN BIGZA

Intrigë, dashuri, respekt, poshtërsi, të gjitha këto dhe të tjera mund t'i lexosh këto ditë në shtypin grek, ku në epiqendër të tij është vënë qysh të dielën futbollisti shqiptar, Alban Bushi. Për të qenë më i besueshëm në këto që po shkruaj, mund të them se sot vetëm gazeta "Goal news" i ka kushtuar "Lokut" plot 14 shkrime të shoqëruara me fotografi!? Në to mund të gjesh pendime të gazetarëve vendës, që tani mbrojnë me guxim e profesionalizëm futbollistin tonë, por mund të gjesh edhe shkrime të tjera, ku i bëhet një radiografi "Lokut" që nga ardhja e tij në Greqi, pikërisht para 10 vjetësh. Në të gjitha këto shkrime vlerësohet lart futbollisti shqiptar për nivelin e tij cilësor, ku nuk harrohet të shkruhen edhe pjesëmarrjet e tij me ekipin kombëtar dhe qenien si golashënuesi më i mirë i kuqezinjve me 14 gola në 60 ndeshje, daljen e tij si futbollisti më i mirë në Bullgari, apo aktivizimi i tij në 13 ekipe të ndryshme, por i kujtojnë atij edhe gjestin e bërë pikërisht 10 vjet më parë, kur "Loku" luante për ngjyrat e një Apolloni tjetër, atij të Athinës, që në një ndeshje ndaj AEK i hodhi bluzën trajnerit të tij, Babi Tenes, e deri tek burgu që e kërcënon tani.
"Goal News": Po zv.prokurori ç'pati?
Por teksa lexon me vëmendje çdo rresht të shkruar, nuk mund të të mos tërheqë vëmendjen ajo që mësuam dje nga shtypi vendës, që zëvendësprokurori i gjykatës së lartë, Anastasios Kanelopulos, që ka kërkuar që të bëhen hetime për Bushin, është vëllai i ish- presidentit të Federatës Greke të Futbollit, Thanasis Kanelopulos. Nuk dihet se deri në çfarë mase është ndikimi i vëllait në këtë drejtim, por lidhja e tij me njerëz të afërt, që kanë pasur lidhje të forta me futbollin, tregon se edhe në drejtësi ka filluar të ndihet era "futboll". Për këtë ndoshta më qartë flet për "ngjarjen Bushi" një nga gazetarët e njohur të "Goal News", i cili shkruan: "Të vetmen gjë që nuk e ngarkuam Bushin, ishte ngjarja në Peanaia (ku huliganë të skuadrave Olimpiakos dhe Panathinaikos u përleshën midis tyre në prag të një ndeshje volejbolli femrash, ku gjeti vdekjen një tifoz i Panathinaikosit). Dhe gazetari vazhdon me sinqeritetin e tij teksa thotë: "Dje shkruam se duhet të ndërhyjnë organet kompetente, por nuk ma merrte mendja se për "çështjen Bushi" do të ndërhynte edhe zëvendësprokurori i gjykatës së lartë, Anastasios Kanelopulos, i cili kërkoi ligjshmërinë e qëndrimit të Bushit, por edhe dëbimin nga vendi. Avash more djem,- vazhdon gazetari grek në shkrimin e tij dhe shton: "Mund të ishte i drejtë dënimi nëse Bushi ofendonte simbolet tona, ose të bënte veprime të papara në dëm të futbollit grek. Ose më tej, të dhunojë historinë greke, ose të hedhë poshtë futbollin grek. Natyrisht, ai mund të dënohej për sjellje të padenjë ndaj Panathinaikosit. Por ajo që duhet vënë dukje është ndjeshmëria jonë në kësi rastesh. Për shembull, Kastiljo (futbollist i Olimpiakosit) ka të drejtë të jetë edhe pak rrugaç, ndërsa Bushi asnjëherë. Njëri është uruguajan e tjetri shqiptar. Veprimet e Bushit pas barazimit dhe të gjitha ato që u dukën në televizor, në raste të tjera, një tjetër "Bush" me fanellë të jeshile (e ka fjalën për ngjyrën e Panathinaikosit), me të kuqe (e ka fjalën për ngjyrën e Olimpiakosit) apo me të verdhë (e ka fjalën për ngjyrën e AEK-ut), i kemi quajtur shpërthim shpirtëror. Ato jo vetëm nuk janë dënuar si në rastin e futbollistit të Apollonit, por janë quajtur si një rast i gjallë i dashurisë së lojtarit për fanellën."
"Greqia, vendi që i zmadhon shumë gjërat"
Gazetari grek Andrea Dhimato, i cili i shkruan këto radhë, vazhdon duke bërë konkluzionet e tij për ato që thotë: "E vërteta është se Bushi është një futbollist që na shërben plotësisht, sepse i ka të gjitha të dhënat: ai paska edhe sjelljen e padenjë, edhe është shqiptar dhe luan tek Apolloni dhe jo në ndonjë skuadër tjetër të madhe, që ka shumë njerëz." Gazetari grek nuk harron t'u kujtojë bashkatdhetarëve të tij të gjitha ato që ndodhën të dielën në futbollin dhe pastaj bën pyetjen retorike: "A mos vallë edhe këto na i bëri Bushi? Për sjelljet e tyre Rivaldo dhe Papadhopullos kërcënohen me dënim më të madh nga Bushi. Dhe kjo sepse ndaj futbollistit shqiptar nuk është nxjerrë asnjë lloj kartoni. Megjithatë, - përfundon shkrimin e tij Dhimato, - problemi nuk është se Bushi duhet të dënohet si shembull për sjelljet e tij të palejueshme. Problemi është ndjenja jonë ndaj këtyre sjelljeve."
Në të njëjtën linjë me kolegun e tij është edhe gazetari tjetër grek, Dionisis Marinos, i cili duke u bazuar në ato çfarë po thuhen për "çështjen Bushi", shkruan: "Si vend që i zmadhon gjërat, ne vështirë se mund të gjejmë rrugën e mesme, të asaj që quhet kulturë sportive. Përse kaq ashpër në rastin e lojtarit shqiptar? Kjo është pyetja që ngre para opinionit publik gazetari Marinos dhe vazhdon: "Eshtë vërtet e çuditshme, që një veprim provokues brenda fushës së lojës e bën zëvendësprokurorin të dalë në përfundim se lojtari shqiptar jeton në mënyrë të paligjshme në vendin tonë dhe mban përsipër shenjën e "terroristit" të stadiumeve. Eshtë lidhja shqiptar provokim-Kallamaria, që përbën një masë kaq shpërthyese dhe njëkohësisht kaq të pafuqishme për mbrojtjen, por që nuk ka lënë pa mallëngjyer edhe gjykatën e lartë. Çdo njeri mund të kujtojë ngjashmëri dhe sjellje edhe më të këqija të futbollistëve gjatë zhvillimit të një ndeshjeje. Shumë prej tyre jo vetëm që nuk janë dënuar, por janë bërë të pranueshme, madje janë cilësur edhe si sjellje heroizmi.
Gjithsesi, ajo që i ka çuditur të gjithë ka qenë ndërhyrja e prokurorisë në "çështjen Bushi", çka vërehet se kjo gjë ndodh për herë të parë. Dhe kjo për arsyen se futbollisti shqiptar nuk ka kryer asnjë element të veprës penale. Eshtë pikërisht kjo gjë, është pikërisht kjo ndërhyrje, që i ka detyruar gazetarët vendas të jenë të ashpër. Madje në këtë rast, ata e hedhin vështrimin 10 vjet të shkuara, kur Mandi Rasulis në vitin 1997 këndonte "Tungjatjeta zoti prokuror me Xhenin e bukur", i frymëzuar nga dashuria e tij tragjike e shërbyesit të drejtësisë me transeksualin e njohur, nuk mund të mendohet se 10 vjet më vonë një tjetër prokuror do të urdhëronte kontrollin, sepse një futbollist në një stadium ka kryer disa veprime të pahijshme. "Jo vetëm në Greqi, por në të gjithë planetin të provosh,- shkruan media vendase,- nëse shan, provokon apo edhe të pështysh mund të dënohesh ose me karton të kuq, ose me disa ndeshje dhe gjithmonë nga gjykata sportive. Dhe për të gjitha këto veprime nuk mund të merret prokuroria. Thua se ato përbëjnë shkelje të procedurës penale, njësoj sikur Bushi vodhi apo vrau dikë. Po të veprohet kështu, - shkruan shtypi grek, - për disa vjet burgjet do të mbusheshin vetëm me futbollistë!?"
Ndërkohë që në mbrojtje të sulmuesit shqiptar janë hedhur edhe kolegët e tij të ekipit e në veçanti trajneri Maqis Kacavaqis, i cili i ka quajtur të tepëruara ato që po ndodhin me futbollistin e tij.
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------

Mbrëmë, të gjitha agjensitë e lajmeve dhe sajtet e mjeteve sportive në internet, kanë publikuar masën e dënimit ndaj futbollistit shqiptar, Alban Bushi. Një masë absurde, që nuk është parë ndonjëherë në sallat e futbollit e grek.
Njerëz, që kanë marrë pjesë në debatin për "Çështjen Bushi" sepse lojtari shqiptar, nuk ka qenë i pranishëm në sallën e gjyqit, bëjnë të ditur se ka qenë një seancë tepër e tensionuar. Ajo ka filluar dhe ka përfunduar e tillë. Kur ka parë se në sallën e gjyqit mungonte njëri prej gjyqtarëve kryesorë, zoti Karjani, sepse ishte i angazhuar në gjykatën e lartë, avokati që mbronte çështjen Bushi, zoti Kostas Barbas, kërkoi që çështa të shtyhej, por nuk ishte i këtij mendimi kryetari i trupit gjykues, Jorgos Purnas. Që në këtë prezantim të parë, u kuptua se palët kishin mendime krejtësisht të kundërta dhe nuk puqeshin asgjëkundi me njëri tjetrin. Sidoqoftë gjyqi vazhdoi. Avokati i Bushit, Kostas Barbas, që në fillim të seancës u mundua të sqarojë se nuk bëhet fjalë për shkelje të rëndë nga klienti i tij. Ai i kujtoj drejtuesit të seancës se ai që është adapt për këtë punë, pra gjyqtari i ndeshjes, nuk ka bërë asnjë ndëshkim ndaj Bushit. Në ndihmë të avokatit ka dalë hapur edhe drejtori i i përgjithshëm i Apollon të Kallamariasë, Kristos Gaçis, i cili theksoi: "Bisedova me Bushin gjatë kohës së dëshmisë dhe unë jam në gjëndje të konstatoj, nëse një futbollist thotë ose jo të vërtetën. Dhe Bushin pohoi pikërisht të vërtetën". Përfqësuesit e klubit kuqezi treguan se kapiteni i Panathinaikosit i tha Bushit "Alvanos" (shqiptar...) dhe pastaj e shau, por i menjëhershëm ishte reagimi i drejtuesit. Jorgos Purnas, i cili tha: "Fjalët raciste i kemi bërë marmalatë. Nuk janë racistë grekët, janë kozmopolitë".
Eshtë vërtetë për t'u çuditur me gjyqtarin që jeton me shijen e marmalatës. Ky lloj gjyqtari ka guxim dhe e thotë këtë fjalë, kur pikërisht nga racizmi i disa bashkatdhetarëve të tij, kanë gjetur vdekjen dy tifozë të pafajshëm shqiptar, dy djem të rinj, që në kulmin e jetës së tyre i janë gëzuar ndjenjave sportive. Nuk po zgjatem me raste të tjera për t'i mbushur mëndjen këtij lloj gjyqtari, që në seancën ndaj Bushit, ka ardhur me një vendim të marrë më parë, por duam t'i kujtojmë atij, që në këtë dënim ndër më të rëndët e futbollit grek, ai duhej të kishte lexuar se çfarë kishin shkruar gazetarët e njohur të vendit të tij për "çështjen Bushi". Ai, të paktën duhej të kishte parë në televizon se çfarë mbresash ka lënë futbollisti shqiptar te tifozë t e zjarrtë të Apollon Kallamariasë, të cilët e kanë duartrokitur si idhull futbollistin shqiptar, pikërisht një javë më vonë se ai luajti ndaj Panathinaikosit. Ai duhej të lexonte gjithçka çfarë ka shkruar shtypi i vendit të tij për "çështjen Bushi", sidomos kur ai u njoh me rastin e paprecedent të ndërhyrjes së prokurorisë në këtë çështje. Ky lloj gjyqtari, që jo rastësisht krahason racizmin me marmalatën, që mesa duket është gjëja më e preferuar për të, duhet të kujtojë ato çfarë shkruanin ditët e fundit gazetat më prestigjoze sportive greke për lojtarin shqiptar. Nëse ai nuk i lexon as gazetat, atëherë po i kujtojmë se çfarë shkruajnë ato për futbollistin shqiptar. "Siç duket nga masat e paparashikuara që mori sjellja e Bushit, duket se jemi të gjithë kundër dhe kërkojmë zhdukjen e tij. Të ulen tonet për çështjen Bushi, ku qimja u bë tra". "Eshtë vërtetë e çuditshme, shkruan një gazetë tjetër, që një veprim provokues brenda fushës së lojës e bëri zëvendësprokurorin të dalë në përfundim se lojtari shqiptar jeton në mënyrë të paligjshme në vendin tonë dhe mban përsipër shenjën e "tromokratit" të stadiumeve. Çdo njeri mund të kujtojë ngjashmëri dhe sjellja edhe më të këqija të lojtarëve gjatë një ndeshjeje futbolli. Shumë prej tyre jo vetëm nuk janë dënuar, por u bënë të pranueshëm dhe sjelljet e tyre u cilësuan si sjellje heroizmi. Atëherë përse kaq ashpërsi në rastin e lojtarit shqiptar?"
Pikërisht këtu këmbënguli gjatë seancës gjyqësore avokati i njohur grek, që mbrojti "çështjen Bushi". Ai solli prara trupit gjykues shembujt e shumtë që kanë ndodhë në futbollin grek. Ai solli shembullin e futbollistit të Olimpiakosit, Kristian Karrembe, i cili goditi me shpullë një kundërshtar të skuadrës së tij. Avokati solli si dëshmi sjelljen e futbollistit të të AEK ut, Navas, që me gjeste të ndryshme fyeu tifozët e Olimpaikosit. Avokati tregoj edhe shembullin e futbollistit me ngjyrë, King të Jonikosit, kur kapi për fyti futbollistin e Olimpiakosit, Kastilios. Por tifozët grekë mund të kujtojnë se vite më parë ka qarkulluar në shtypin vendas edhe një foto, ku duket qartë futbollisti i AEK-ut, Stelios Manos, tek kap për fyti kolegun e tij, Niniadhis. Teksa komentonte këto fakte, ku ishin më të rënda se rasti i Bushit dhe që nuk u ndëshkuan aq rëndë, ai nuk duroi dhe bërtiti, duke thënë: "Eshtë krijuar një klimë për të "ngrënë" shqiptarin". Më pas, ai tregoi foto pikërisht nga ndeshja Apollon Kallamaria Panathinaikos, ku shiheshin qartë futbollistë të Panathinaikosit, si Leontiu, apo Gumas, që tërheqin Bushin dhe protestoi, duke thënë : "Përse ato sot nuk janë thirrur të dëshmojnë"?
Por trupi gjykues kishte ardhur me një vendim të marrë më parë, i frymëzuar kushedi se nga kush, por edhe nga disa gazeta, që në vend që të shkruanin me objektivitet, bënin thirrje: "Largojeni nga futbolli grek", "Ata kush do t'i arrestojë" etj.
Ky lloj trupi gjykues, siç thamë i përgjysmuar, nuk mori parasysh as mbrojtjen e avokatit, i cili tha se Bushi nuk e pështyu Papadhopullin, thjeshtë ai bëri sikur e kreu një veprim të tillë, sepse kapiteni i skuadrës kundërshtare mori një penallti të padrejtë. Por, gjithçka ra në vesh të shurdhër, madje nuk u pranua as kërkesa e avokatit për ta parë së bashku videon e ndeshjes dhe pastaj për të gjykuar më mirë. Ndërkohë, që Bushi një ditë më parë, në një intervistë të gjatë për mediat vendase, kishte sqaruar me shumë sinqeritet gjithçka, duke thënë: "Kërkova falje për ato që bëra, veç dua të them se nuk kisha qëllim të ul dinjitetin e tifozëve dhe as të njerëzve të Panathinaikosit. Gjithçka që kam bërë, e kam bërë për ata 2 3 futbollistë, të cilët e dinë se kush janë dhe çfarë kanë thënë. Kur u dha penalltia në favor të Panathinaikosit, i thashë se përse simulove. I fola qetë dhe dhe nuk i thashë diçka të keqe, por ai me nerva m'u përgjigj: "Pusho shqiptar...". Kam luajtur sivjet në 24 25 ndeshje. Mund të them se në 19 prej tyre dëgjoj të njëjtën gjë. Vazhdimisht më provokojnë duke më thirrur "Alvane, alvane" (shqiptar, shqiptar. Stoperat që më mbulojnë, mbrojtësit, por edhe portierët, më ngacmojnë gjithnjë. Veç unë nuk fola asnjëherë edhe pse kjo gjë bëhet vazhdimisht". Pastaj, pa përmendur emër, "Loku" tregon edhe një fakt tjetër, që është më tronditës se të parët. "Dua të them se është një trajner, emrin e të cilit nuk dua ta përmend, i cili i këshillon lojtarët e skuadrës së tij, që kur të më markojnë, të më provokojnë duke sharë. Këtë ma kanë thenë vetë lojtarët e tij. Le të të më provokojnë në mënyrë tjetër dhe jo në kombësinë time. Jemi në vitin 2007 dhe këto gjëra janë të paparanueshme".
Mirëpo, kështu mendon Loku, por jo gjyqtari i seancës, i cilim dha edhe vendimin për dënimin e futbollistit shqiptar. Kështu sipas tij Alban Bushi dënohet me 3 ndeshje (Nuk luan në 2 ndeshjet e fundit të këtij sezoni dhe 1 ndeshje të sezonit të ardhshëm). Ai u dënua edhe me një gjobë prej 40 mijë e 160 eurosh. Nga këto 40 mijë u takon sharjeve që ka bërë futbollisti (shënimi ynë askush nuk e din se çfarë ka thënë Bushi, sepse ai ka folur shqip) dhe 160 euro për pështyrjen e ndaj Papadhopullosit (një veprim, shënim i yni, që nuk është kryer por që ka mbetur në tentativë). Ndërkohë që skuadra e Apollon të Kallamariasë u dënua me këshillim. Futbollisti shqiptar ka të drejtë ta ankimojë këtë vendim në një gjykatë të shkallës më të lartë.
Natyrisht, teksa je njohur me tërë këtë maskaradë gjyqësore, nuk mund të të mos kujtohet një shkrim i botuar ditët e fundit në gazetën "Goal", ku shkruhet: "Vërtetë tani e kuptuan papritur prokurorët e gjykatës së lartë se në stadiume ka futbollistë që bëjnë shenja me duar. Tani e zbuluan të gjithë njerëzit e futbollit se ajo botë e vogël nuk është e formuar në mënyrë engjëllore. Si përfundim tifozi i vdekur i Panathinaikosit në episodet e Peanias, erdhi të xhveshë krejtësisht të vetmin përgjegjës për tatëpjetën e futbollit tonë dhe të vetë shoqërisë sonë..."
 




____________
You feel you now have control, don't you?
You think you will walk away untested. I promise that my work will continue. That I have ensured.
You think it is over, but the games have just begun.

Download Forum









-----------------------------------------