Çfarë do të bëjë në të vërtetë Majkëll Shumaker? Askush, aq më shumë në Gjermani, nuk pushon së bëri këtë pyetje. Sa më shumë afrohet gara e parë e këtij sezoni (të dielën e ardhshme më 18 shkurt, Çmimi i Madh i Australisë), aq më shumë shtohet dhe interesi dhe kurioziteti i mediave dhe tifozëve. Megjithatë, Vili Veber, menaxheri i shtatë herë kampionit të botës së Formulës 1, i cili ka 19 vjet që e shoqëron ngado, ka bërë të ditur se e ardhmja e "klientit" të tij është diçka e paparashikuar më parë. Në të vërtetë, pozicioni i tij më i përfolur për të ardhmen ka qenë ai i drejtorit sportiv të skuderisë Ferrari, megjithatë një gjë të tillë e hedh poshtë menaxheri i gjermanit. "Majkëlli nuk do të bëhet asnjëherë drejtor sportiv!" Me sa duket, sipas Veberit, e ardhmja e Majkëll Shumakerit do të jetë një pozicion shumë më i lartë se ai që parashikohet. Ish shtatë herë kampioni i botës në Formulën 1 mund të jetë pronari i një skuderie, pra shefi i një konstruktori makinash garash.
INTERVISTA: Në një intervistë për një gazetë gjermane, menaxheri i Shumit, Vili Veber, duket se ka zbuluar një pjesë të së ardhmes së ish pilotit të Ferrarit. Në të vërtetë, ai nuk del asnjëherë përpara gazetarëve pa pasur një arsye të fortë apo pa paralajmëruar për diçka. Gjithmonë ai krijon një skenar të tijin, nëpërmjet të cilit përcjell një mesazh. "Ndoshta një ditë do të shkojmë tek ai miliarderi i pijeve energjike dhe i blejmë skuadrën e dytë," ka thënë Veberi. Pas kësaj deklarate, çdo gjë është shumë e qartë dhe nuk duhet shumë informacion për ta deshifruar atë që tha menaxheri i Majkëll Shumakerit. Ai duket qartë se i referohet një miliarderi, i cili aktualisht ka dy skuderi dhe për më shumë bëhet fjalë për një miliarder pijesh energjike që është Didi Mateshitz. Pronari i pijeve energjike "Red Bull" është futur me mjaft vrull në këtë sport dhe këtë gjë e tregon fakti që ai menaxhon dy skuderi të Formulës 1. Në fillim krijoi vetëm skuderinë Red Bull, duke blerë ish skuderinë Jaguar, e cila falimentoi, por kjo blerje u duk se nuk e kënaqi. Për këtë arsye vendosi të blinte një skuderi. Kështu bëri, krijoi skuderinë e dytë Toro Roso, ish skuderia Minardi. Në këtë skuderi ai ia shiti 50% të aksioneve mikut të tij dhe ish pilotit të Ferrarit, Gerhard Berger. Makinat me qendër në Faenca, për të paktën dy vitet e ardhshme do të përdorin motorët Ferrari. "Majkëllit i lejohet një gjë e tillë, ka shtuar Vili Veber. Nëse e bën këtë gjë, do t'i duhet të marrë një drejtues skuderie, një rol të cilin ai e bën vetë shumë mirë. Për asnjë rast atij nuk i lejohet të mos e marrë përsipër një gjë të tillë dhe t'ia lërë postin e drejtuesit të skuderisë dikujt tjetër. Gjithsesi, nga të gjitha këto nuk duhet të besoni shumë, pasi është thjesht një ide apo një variant në lidhje me të ardhmen e Majkëll Shumakerit. Të them të vërtetën, unë e imagjinoj dhe dëshiroj që Majkëlli të blejë një skuderi."
DETAJI: Deri këtu ishin fjalët e vetë menaxherit të Majkëll Shumakerit, Vili Veber. Megjithatë, nëse dëgjohen me vëmendje, kuptohet se ka diçka shumë të veçantë. Çfarë do të ketë pjesa tjetër e Toro Rosos që aktualisht e ka Gerhard Berger? Atëherë pse të mos mendojmë se ky skenar ka brenda tij diçka të vërtetë dhe që me sa duket është studiuar mjaft mirë? Ka shumë kohë që flitet se gjermanët po përpiqen të futen në Formulën 1. Ndoshta ish piloti austriak, Bergeri, mund ta shesë gjysmën e tij të aksioneve të skuderisë Toro Roso. Nuk duhet të harrojmë se Nikolas Todt, djali i Zhan Todtit dhe menaxheri i pilotit brazilian, Felipe Masa, ka filluar të shprehë interesin e tij për të blerë një skuadër në kampionatin GP2. Po sipas këtyre zërave që vijnë nga Gjermania, Bergeri do të vazhdojë të qëndrojë në Formulën 1. Sigurisht do të vazhdojë bashkëpunimin me mikun e tij Mateshitz, si drejtor në skuderinë Red Bull. Hipoteza tërheqëse ose ndoshta janë thjesht fantazi. Gjithsesi, Vili Veber thekson se Shumakeri, për momentin, po vazhdon të shijojë jetën e tij private. Oferta që i ka ardhur si këshilltar te Ferrari, mund të konsiderohet disi stresuese. "Majkëlli ka qenë i pranishëm dy herë gjatë testimeve dimërore, megjithatë nuk ka pasur asnjë ndikim në programet e punës së inxhinierëve të Ferrarit. Gjithashtu nuk ekziston ndonjë linjë direkte nga shtëpia e tij për të transferuar të dhënat te qendra e Ferrarit. Ata do të punojnë pa Majkëllin. Kështu do të vazhdojnë të jenë."
Mungesa në Melburn: Me siguri Majkëll Shumaker nuk do të jetë në Çmimin e Madh të Melburnit që do të zhvillohet javën e ardhshme dhe do të jetë gara e parë për këtë sezon. "Atë garë do ta shohim në televizor, thotë Veberi. Shpresoj që të paktën ta ndjekë drejtpërdrejt dhe jo të ritransmetuar," përfundon menaxheri i Majkëll Shumakerit me shaka.
 




____________
\"Mos shikoni kishat as xhamijat se feja e shqiptarit eshte shqiptaria.\"