Temperaturat e larta të stinës së nxehtë jo vetëm që shkaktojnë vapë, por shndërrohen edhe në një rrezik të madh për cilësinë e ujit që furnizon shtëpitë tona. Mikrobet që "sorollaten" jo vetëm në ajër, por që kanë gjetur strehë në tubacionet e amortizuara të shpërndarjes së ujit, gjatë verës kanë kushte të përshtatshme për t‘u shumuar. Madje ato mund të shndërrohen edhe në një "ushtri" sulmuese dhe tejet agresive kundër shëndetit human. Për këtë, atyre u mjafton të gjejnë terrenin dhe kushtet e përshtatshme e natyrisht portatorin që shkakton sëmundjet.

"Në temperatura mbi 35 gradë Celsius mikrobet gjejnë kushte të përshtatshme për t‘u shumuar. E rëndësishme është që të mos kenë portator, pasi në këtë mënyrë ato do të krijonin vatra sëmundjesh", shpjegon Përparim Kadareja, specialist i monitorimit të ujit në Drejtorinë e Shëndetit Publik për Tiranën.

Ndërkohë që në këtë stinë të nxehtë tubacionet në një pjesë jo të vogël të ditës qëndrojnë të boshatisura, në pritje të qarkullimit të ujit, sipas orarit të vendosur nga ujësjellësi.

Aktualisht Drejtoria e Ujësjellës-Kanalizimeve jo vetëm që nuk mundet të furnizojë kryeqytetin me ujë përgjatë të gjithë 24-orëshit (tashmë kjo duket si ëndërr), por as të garantojë ndërprerje të shkurtra në kohë. Sipas tyre, është rritur sasia e konsumit nga qytetarët dhe kjo bën që të bjerë presioni i ujit në tubacione. Ndërkohë që në një pjesë të ditës ato janë krejt të boshatisura. Por "sa më gjatë të qëndrojnë tubacionet e rrjetit të shpërndarjes së ujit bosh, aq më i madh është rreziku i shtimit të mikrobeve patogjene në to", shpjegojnë specialistët.

Kadare shprehet se uji që furnizon 70 për qind të qytetit të Tiranës e që ka si burim Bovillën është i pastër. "Uji vazhdon të klorinohet në nivelet e kërkuara me 0,8 miligramë për çdo litër ujë dhe gjatë këtij 6-mujori ne kemi realizuar vetëm për pikën e Bovillës 136 analiza. Ato kanë rezultuar pa ndotje", shpjegon Kadare. Po kështu ai shton se edhe në burimet e tjera atë të Selitës dhe Shën Mërisë nuk ka pasur ndotje të ujit që shkon në shtëpitë e konsumatorëve. Por këtë situatë normale të ujit ai ia dedikon vetëm përdorimit korrekt të klorit në të. Kjo, pasi vetëm sasia e domosdoshme e klorit në ujë mund të shkatërrojë mikrobe të tilla si streptokoku fekal dhe e‘coli.

Megjithatë, problemet e pastërtisë së ujit nuk varen vetëm nga rrjeti i amortizuar. Ndër faktorët që rrisin riskun për ndotjen e ujit të pijshëm janë edhe ndërhyrjet e paligjshme në rrjet. Specialisti Kadare shprehet se personat që kanë kryer lidhje të paligjshme përpara pikave të klorinimit janë vetë shumë të rrezikuar. Kjo, pasi uji që ata konsumojnë nuk ka përmbajtje klori, në mënyrë që në rastet kur ka mikrobe në rrjet, ato të mund të asgjësohen. Por nga ana tjetër ata shndërrohen në burim rreziku për ndotjen e ujit, pasi gjatë ndërhyrjes në tubacione mund të shkaktojnë dëmtimin apo çarjen e tyre e për rrjedhim edhe ndotjen. Raste të tilla ndodhin sidomos edhe prej bumit të madh të ndërtimeve në zona shpeshherë të pastudiuara nga ana urbanistike dhe pa kanalizime. Rreziku për ndotjen e ujit në tubacione shtohet dhe sipas vetë drejtuesve të ujësjellësit shpeshherë ka pasur raste të raportuara kur janë dëmtuar tubacionet dhe deri në riparimin e tyre banorët e zonës janë këshilluar të mos e përdorin ujin.

Edhe reshjet e shiut janë burim i mundshëm i ndotjes së ujit në tubacione. Ato tërheqin me vete mikrobet në zonat sipërfaqësore. Ndaj zgjidhja më e mirë për të eliminuar faktorët ndotës të ujit që konsumojnë qytetarët është furnizimi i rregullt gjatë të gjithë 24-orëshit, në mënyrë që tubacionet të mos mbeten bosh, si dhe të bëhen investime në këtë sektor, që tashmë duket se ka mbetur pezull edhe për shkak të kompetencave të ngecura nga ministria drejt pushtetit vendor të ndërmarrjeve të ujësjellësit.
 




____________
I think that someone is trying to kill me
Infecting my blood and destroying my mind
No man of the flesh could ever stop me
The fight for this fish is a fight to the death