Deputetët e parlamentit britanik u ngritën në këmbë duke duartrokitur për të nderuar Tony Blair-in pasi ai iu përgjigj të mërkurën për herë të fundit si kryeministër pyetjeve të tyre.

Ata lanë mënjanë shpotitë e zakonshme dhe shprehën nderim për z. Blair gjatë seancës gjysëmorëshe në parlament.

I emocionuar, z. Blair e mbaroi fjalën e tij duke e quajtur punën e tyre "fisnike" dhe shtoi: "U uroj të mirën të gjithëve, miqve dhe armiqve. Kaq. Ky ishte fundi".

Më vonë gjatë ditës, personi që në kabinetin e tij shërbeu si ministër i Financave, Gordon Brown, do ta zëvendësojë z. Blair në post.

Keqardhje

Z. Blair e filloi fjalën e tij duke nderuar ushtarët e vrarë në Irak, duke thënë se ndjente me të vërtetë keqardhje për rreziqet me të cilët trupat po përballen në Irak.

Udhëheqësi i Partisë Konservatore, David Cameron, tha se z. Blair gjatë dhjetë vjetëve si kryeministër kishte shënuar arritje "të shquara".

Ai përmendi mes tyre paqen në Irlandën e Veriut dhe punën e bërë nga z. Blair në botën në zhvillim.

Z. Cameron i uroi z. Blair "suksese në çdo gjë që do të ndërmarrë në të ardhmen".

Z. Blair e falenderoi z. Cameron dhe tha se edhe pse nuk mund t'i uronte atij suksese në politikë, "personalisht, i uroj gjithë të mirat atij dhe familjes së tij".

Urime z. Blair shkëmbeu dhe me udhëheqësin e partisë Liberal Demokrate, Sir Menzies Campbell.

Lindja e Mesme

Z. Blair pritet që të marrë postin e të dërguarit të posaçëm për Lindjen e Mesme pas largimit nga posti si kryeministër.

Ai u tha deputetëve britanikë se gjetja e një zgjidhje për rajonin ishtë e mundshme, por për ta arritur atë duhej përqendrim dhe punë.

Ai tha gazetarëve: "Siç mësova nga Irlanda e Veriut, është me rëndësi që t'i bësh njerëzit bashkë, edhe ata që kanë qenë shumë armiqësorë ndaj njëri-tjetrit".

I ashtuquajturi "kuartet": OKB-ja, Rusia, Amerika dhe BE-ja, mendohet se do ta njoftojnë emërimin e tij në post më vonë gjatë ditës.

Brown

Për z. Brown, që u bë udhëheqësi i laburistëve të dielën, marrja e postit të kryeministrit shënon majën e karrierës së tij politike që ka nisur në fillim të viteve '70.

Ai është ministri më jetëgjatë i Financave në Britaninë e epokës moderne.

Z. Brown ka synuar që të marrë postin e kryeministrit që në vitin 1994, kur vendosi që të tërhiqej për t'i hapur rrugën z. Blair që të zgjidhej udhëheqës i laburistëve.

Pasi të marrë postin e kryeministrit, ai pritet të bëjë ndryshime në kabinet dhe të emërojë minsitrin e ardhshëm të Financave dhe atë të Punëve të Brendshme.
 




____________
Galeria Shqiptare Direktoria Shqiptare Kërko në Google