DURRES - Rrënojat e disa objekteve arkeologjike të periudhës antike të qytetit të Durrësit, kanë dalë ditën e djeshme plotësisht në dritën e diellit. Mendohet se objektet kanë qenë depo drithi, si dhe kanali i madh i kullimit të ujërave të qytetit bregdetar. Teksa punonin për të hapur themelet e një pallati 12-katësh vetëm 100 metra larg qendrës së Durrësit, punëtorët kanë hasur në shtresa të forta të gurta e që më pas rezultuan se ishin konture murale të kohëve të vjetra.

OBJEKTET
Pas këtij konstatimi, në lojë hyri Instituti Arkeologjik, i cili mori në dorë gërmimin e mëtejshëm me mjete arkeologjike që zëvendësuan ekskavatorin. Pas disa ditë punimesh, arkeologët mundën që të nxjerrin në dritë, atë që toka fshihte prej shumë shekujsh. Zbulimi përbëhet nga disa objekte të lidhura mes tyre, të cilat mendohet se kanë qenë depo drithi të shekullit të III-të para Erës së Re. Janë 3 depo drithi si dhe një fragment i kanalit kryesor të Durrësit të lashtë, i cili vazhdon të funksionojë duke qarkulluar ujërat që grumbullohen në këtë pjesë të Durrësit.
Deri tani, arkeologët kanë heshtur për këtë zbulim dhe nuk kanë dhënë asnjë lloj sqarimi për zbulimin e ditës së djeshme. Burime nga Instituti Arkeologjik kanë bërë të ditur se gërmimet do të vazhdojnë edhe për disa ditë dhe më pas do të nisë puna për ta përcaktuar përfundimisht se çfarë përfaqëson objekti i zbuluar, i cili është i përmasave 20m X 15m. Depot e zbuluara, në kohët e vjetra kanë qenë pranë bregut të detit, i cili në atë kohë gjendej aty ku sot është bulevardi kryesor, pranë qendrës së qytetit të sotëm. Më pas, deti u tkurr gati 500 metra nga qendra e Durrësit, për të mbërritur në kufijtë e sotëm. Do të jetë Instituti Arkeologjik, i cili pasi të vlerësojë rëndësinë e objekteve të zbuluara, do të përcaktojë mënyrën sesi do të procedohet për vazhdimin e punimeve për ngritjen e pallatit.
 




____________
Galeria Shqiptare Direktoria Shqiptare Kërko në Google